H. Kamzathang Tanchin

User Rating: 5 / 5

Star ActiveStar ActiveStar ActiveStar ActiveStar Active
 

Thianmang' Salpha
H. KAMZATHANG TANCHIN

Missionary thupi Kamzathang Hangsing Mizogam NE Tangnuam ah March 2, 1952 in piang hi. A pa H. Tunkhokam ahi a, anu Gouching ahi. Anu leh pa mipolhnuam leh Pathian thu a lunglut mahmah mi ahi uhi. Kamzathang mifel leh taima ahihman in apa loukuanna, pukpuakna leh gamkuannate a zuizui hi. Kamzathang bel michitak, lungsim sia himhim neilou, ngaihtuahna paitang mahmah mi ahi.

Kum 1959 in NE Tangnuam apat Bungpilawn ah pem ua, tua ah Kamzathang in class IV tan sin hi. 1973 kum in Songtal ah pemlut nawn uhi.

Kamzathang in innkuan khosa a awlmoh mahmah banah khalam thilte ah lunglut sem hi. Khawmpi hoh leh saptuam in nasep dinga abawl peuhmah ah thanuam takin tel gige hi. Thuneihna leh hamphatna lam himhim midangte khiatdan asiama, sep ding leh mohpuaknate aman len pahpah hi. Khawmpi bang a om chiang in aman liai leh pellou in hoh a, mite zawnkhomtu, thathousaktu, ahatloute dawnzangtu in pang ngitnget hi. Khosung a pawl tuamtuam YPA, Siamsinpawl, Youth Club leh a dangdangte ah Pathian lunglut ahi, chih a thupi ahi tawntung hi. Khosung a mi lungkham, panpihngai, a thawmhau leh haksatna neite thumsaktu, panpihtu leh hehnemtu in pangzou den hi.

A inkuante leng amalmalin Hotdamna toh kisai in houlimpih vek a, zouvek in leng kithei hi. Missionary a azinkhiak dekin, akhua ua Saptuam upa khat kiangah "Ei khosungah inchih a lutin, chialpina bawlsuak zou ka hihmanin, eikhote sisan apan ka hul hi" achi hi. Hiai innchiha luta chialpina leng amah leh amah program akibawl tawm a azat ahi.(Saptuam program bawl ahikei)

Missionary nasepna ah leng nakpitak in lunglut in Kuan khiak mah na sawm tinten hi. Kum 1974-77 sunga eilam tuailai tamtak Missionary nasem dinga Tiddim lama a diankhiak souhsouh lai un amah leng a na utlua hi. Himahleh, inkuan khosa nutsiat theihvual hilou a atheih man in nakuan khethei lou hi. A  Missionaryte min a lupna gei ah tak a, alupdek teng leh a thohdek tengin amaute adingin thumsak gige hi. Leitung mun tuamtuam a khamangthangte Khrist kianga pilutna nasem tengteng a dingin khitui luang keuhkeuh kawm in thum gige hi. Aman niteng in Bible simna leh thumna hun zang gige hi. Aman Songtal saptuamah naupang thumkhawm pawl pankhia hi.

A kuankhiak dan:
Saptuam sung leh a insung ua poimoh leh manpha lua himahleh, Khamangthangte iitna, Tangthupha zanailoute awlmohna ziak in innlam ah omthei nawnlou hi. February 8, 1983 in Songtal khua nusia in Missionary a kuan sawm in Lamka lam hon manoh hi. February ni 10 apan niteng in tuahun a Missions Director Rev. Dr. Luaichinthang toh nitengin thumkhawm in kikum khawm uhi. Kamzathang in Directorpa kiangah hichibangin gen hi. "Heutupa, Pathian in Missionary dinga ahonsap kazak a thumveina hita ahihmanin kuanlou thei ka hi nawnkei. Kum 1975 vel a Unaupa T. Pumzathang leh tuailai dang tamtak Tedim biala a kuan souhsouh lai un leng ka na utlua a, Pathianin leng honsam hi'n ka theia, himahleh, ka innkuante nutsiat theih vual ahihlouh manin, utpipi in kana kuan kei hi. Tu in leng ka inkuanten hon phallua uh hikei mahleh gen mun lota ka hihmanin hon khouhngaihna ahon thei nonkei ua, thumna toh hon khakhe mai uhi. Ka kuan utnapen, Burma Nagate lak ahi, mundang kuan ut hetlou ding chihna bel ahikei. Amaute lak ka tun theih dingdan hon gelsak in"  chi in va gen hi. Directorpu inleng  akipiakna thupi asak dan leh a phatthu gen kom in, tuhuntak a saptuam in Missionary poimoh zah ana lakhinta a, adang lakbeh hitheinonlou ahidan gen in, tukum a dia kikhel phot ahihman in kumnawn ngak din na genpih hi. Himahleh, Kamzathang in hichin dawng nawn hi. "Heutupa'n hitheilou bikbek na chih aleh Pathian lemsaklouh bangin ka pom thei ding. Himahleh, kei ka hongkuan dan in, Saptuam in Missionary in honla henla, loh pia in honsawl hen chi a hong kuan leh hong ngen hilou kahi. Burma Nagate lak katun theih dingdan hon kawkmuh thei lechin, amun va tung himhim leng, tua munah ann ngawl in ka si kei ding, ka sih leh leng ka kipak veve ding" chi hi.

Tua hunlai in, ECC(tua EBC) Saptuam in Makuri Nagate lak a sem agammi 10 vel nei hi. Tuate sinsakna peding in Directorpu Namihan, Moreh apan gamla lotel lou Burma gamsung ah kuan dek chih Kamzathang in atheihtak in va gengen ahiman in Directorpu'n leng Missionaryte'n Kamzathang amau gam a sem ding in a tonpih thei uhiam chih enkhe ding in a kizuisak hi.

A nasep dan:
Naupangte a sun a zanin kem hi. Nin thei mahmah ua, chithak, meima leh hah khawng in kidim uhi. Aman tua naupangte giahpih a, Pathian thu hilh a, laa zilpih a, thumdan sinsak hi. Naupangten amah ngai mahmah uhi. Sunchiang in, a sahbon puak sunsunte in hiai naupangte sil in, a puante uh nasan sawpsak hi. Naupang khenkhatin ngailua uh ahihmanin va giahpih zomah uhi. Unaupa Kamzathang' va tunma in hiai lam a Khristian a kichi sunte'n Laizial, zu leh thilchin hoihlou tuamtuam hih uhi. Amah atun apat "Azipa Chuvachu" in hihlouh ding chi ahi, chiin tawpsan thei vek uhi. "Azipa Chuvachu" kichi amau pau ahi a, "Heutupa, hangsantaka tanvakpa", chihna ahi. Makuri pau nakzil mahmah hi. Biakna leng nakpitakin limsak a, khawmpi tuamtuamte ahleng kihel hi. Bialfan utpah a, himahleh a omnapa'n, pau na thei naikei, chi'n khoukhou hi.

Asih dan:
June 25, 1983 in Vongpeh kichi khua ah Gospel team khat vapai uh a, hiai program ah Kamzathang leng va kihel hi. Hiai program zangzou khosiksa in inn hong tung kik hi. Tua kipan a damsiang ma nna gumlua semlou hi. Naupangte kep, amaute toh lui a kisil, puansawp, thumkhawm, lasak khawmte bel ahih ngeiin hih veve hi. A hong dam panta a, a omnapa leng tuabanga khosik hong damsuah hi. Huchi ahihmanin, gongthak hiding uh hiven, a ui uh khat goh hon sawm uhi. Kamzathang in, kou gamlama ka huan dan geih un ka hon huan dinga, lim nasa lo ding uh, chi hi. Innteknu'n singpo ding in kuansan hi. Hiailam gam a tun uapan a vangkima Kamzathang in a gengen khat om a, huai tuh, "Kei tangval dekdekta ka hi", chih ahi. Huan, hiai a sihni dingin leng, "Tuni ka tangval ni ding ahi, tuni chiang a kei tangvalta ding ka hi," a chi mawk hi. Tuani in Kamzathang in a sana phelkhe vekin bulhkik nawn vek hi. Jinglam dak 9:30 vel dingin a annekna inn apan a giahna inn ah paiphei hi. Innka a tunin nakpitak in kikou a, lua hi. A omnapa in kintakin va delha, aman, hon thumsak in, chi hi. A omnapa'n thumsak hi. Tua khit in Kamzathang Paite pauin hong thum a, "Toupa aw, na khut ah ka kha, ka hinna, ka sapum, ka bangkim ka hon pekhia hi", chiin thum a, tuazohin nak nawnlou hi. Hiai ni in New Moldum khua pumpi kah petmah a kap leh mau in om uhi. Bialfang a khualzin, a khua uh tot ding a program hikhalou Evan, Lalkhosei in, hiai kah leh mau thawmging, gam gamlatak apan a zakin lamdangsa lua a, bangthu hi peuhmah ding hiam chiin a khua va tawn a, Kamzathang sihna va mukhatu, va vuikhatu in pang hi. Hiai pen July 9, 1983 ni ahi.

Kamzathang kum 31 lel leitungah dam mahleh, a hinkhua in na thupitak sem ahihdan a muhtheih hi. Damsung a sawt leh tom in thupo zolou a, i nasepsuah in thupozo ahihdan kilang mahmah hi.

"Missionary zatam sawl in, Toupa na simthu puang ding in,
Na von kha pham sakluang tawn in, halhna tuangtun in.
Van Laukha siangthou aw hong leeng in lungdeihte siang ah."

"Lia leh tangte aw hong thou un, simthupha gen ding in,
Toupa ngalliam mapatna sulnung giabang zuun ding in,
Khelhna saltang a mangkhate zong di'n kua hiam kuan ding?"

"Ka leitung hinkhua ka latkhiakna Makuri Nagate lakah ka sepna maban sunzom ding kua hiam??"

Search