Paite Lavui/Poems

Star InactiveStar InactiveStar InactiveStar InactiveStar Inactive
 

 

Tuni’n Khat Toh I Kingai A ||

By ~ Vz Vualnam

 

Tuni’n khat toh i kingai peetpeet a
Miteng’ theih ding bang in i kipulaak!
Zingchiang in i hong kikhen heelhuul a
Honna thei tengteng mai ah i zahlaak!
Khat toh i hong kimaikha nawn geet a
Itkha ngeilou mah i bang zel kei hiam!
Hiai in leng lah sawt hon daih tuankei a
Mite’ hon muh dingdan i khual ngei hiam!
Zu dawn haat, chialpi om teng a piangthak
Testimoni gen a kap pepulh zel
Lah a khonung sawtlou a nungtolh pah zel
Mi’n koihna khat a neih huai mi piangthak!
Baihlam kei mah veh e, limzon mah ni!
‘Mahleh pilvang tak in pai khiankhian ni!

 

©Siamsinna leh Vakiangbu

 

 

Tunlouhna Ding Gam I Tung Khanaak ||

Kholai dung teng a mite’ mullit dia
Na pianma a na vaang namkip sa hiam?
Khansih leulou a nu-le-pa’ vui dia
Leilung pianma a namkip na hi’a hiam?
Mite’ deih leh lunggulh lohchinna saang
Nang a ding a seh hilou bikbek hiam?
Mite’ zahtaak leh tung-et dinmun saang
Tum le teh leng ngah ngeilouh ding adiam?
Michih taang chiat dia siam ahih ka um
Eimah khawnvaktui ding kizon peuh leng!
Saangpi tung chiat dia siam i hih ka um
Lamdik-lamtang zui a tawn chiat hi leng!
Sa utnate’n hon pimang naakkhem a
Tunlouhna ding gam i tung khanaak a!

 

Zan A Ging Kilawm Pen ||

Sunni lenkil kia a khua a mui chia’n
Thousi-thouvai a hong haam selsel ua
Khua hong mial a zan a sawt hiaihiai chia’n
Khausite’n a la uh a hon pan uh
Nipi in lengte a hong kipan ua
A la uh sakkhit manlouh a lau uh
Tuuk chiang in ute a hong kisaan ua
Vuahtui ngen in zankhua in a thum uh
Innka a pan a la uh ka ngai a
Ka kha thawmhau a hon khamuan uhi.
Zalkhun a pan a la uh ka ngai a
Lungtai in a hon ihmusak uhi.
Himahleh zan a ging kilawmpen zaw
Naupangte’ laisim chiilcheel ging ahi!

 

Thai Leh Tuun ||

Tuun ngaih naa e zatam lai ah
Lenkawlni suah laikhun zuangthoh
Tuu’n mel mu masa nuam ing
Ziing khat laikuang umkhawm louh
Siangsung hawm e gial bang khing zou e
Sunni lenkil kiat in siang zong leng
Tuun mah chi’ng e suihlung muangsak e
Tuun tohlou sunni ka tumlah ngawn e
Deih bel sum bang tuah in
Sau ah ngaih bel hong tang leh aw
Tuun ngaih a theu tuam diam chi’ng e
Zingchi’n tuun aw i chichi lai diam
Zanchi’n tuun aw i chichi lai diam
Thai leh tuun tan bang teh takei ve ni e
Theisen kil bang khan a hon huai i tuun hi e
Kumsawt lou bang tulpih ding i thai hi e
Tuun ngaih lai ah thenglou dia
Thai deih lung a kiamlou ding aw
Tuun toh hei leng suihlung muan nuam e
Thai toh hei leng suihlung zuan theu nuam e

 

Vualngaih Vang A Khosial I Lelh Ni’n ||

Vual lianu’n lungsit simthu hon leel ni’n
Kei ka laidiip hawm e gu bang zen e
Vual lianu’ siang nau bang ka nui khem a
Tang liang in heem ah luankhi nuul ing e

Thangvan mau leh thelvuah luang nuai ah aw
Kei zong ka sinlai huiva bang mau e
Maimit luankhi tung thelvuah bang luang ve’n
Gawl bang khaam maw’ng e khamlu zeelsuak e

Sian’ hawm chita ni e ngaih i sial zong
Lelliang in pai bang i pomlah hal a
Kungtung hong tu e heem ah khiatmoh e
Kulsin i zaal chia’n tualkheta ni e

Sian’ hawm chita ni e i saangmoh zong
Laitan hi e zu bang nialmoh hi e
Beng bang saang ding simlei ah omlou e
Puaksing bang lelh kulsin ah nga ni e

Vualngaih vaang a khosial i lelh ni’n aw
Lungsit omlouhna lengvan ngou bang lang
Vangkholai ah dialdial in i leng ding a aw
Simlei khosial mel a mata ding aw

 

 

Taang Ka Sinlai Ngaihsial Toh Lawm Bel ||

Taang ka sinlai ngaihsial toh lawm bel e
Simlei ngaihsial zingdai bag theu moh e
Taang ka maimit luankhi toh lawm bel e
Lungngaih luankhi damtui bang kiam moh e

Taang ka duang sawl bang vul toh lawm bel e
Lohlah vual ngai a vul toh lawm bel e
Lou bang phong ding lungtuak liavual’ tongdam
Taang kei a’n nau bang san ni omlou e

Nuai simlei khankhua guikhau bang suut le’ng
Nun i nop na’ng tam e suut senglouh e
Hizong al bang dahna malneu ziing in
Sinlai sing bang deep e ling bang dou e

Sian’ hawm sunni lenkawl sial bang suak in
Al bang dahna nahzing a heu ding sa’ng
Sian’ hawm sunni hong suak nailou hiam aw
Suaksa taang in lam bang haih ka hiam aw

Sian’ hawm pomta ning chi’n heh kineem ve’ng
Eimah kinep dahluat neem tuamlou e
Al bang dah sinlai lii bang ching buang a
Nunnop sin ding kei aw zilzou la’ng e

Tung sianmang mah chizel ni e lelliang
Nuai simlei ah a hawm i pomlah zong
Nunnop kiamlouhna lengvan in samlai
Chiamsa hi e hai bang na ngak ni e

 

 

Hinna Tulliim ||

Nisim nunna tuanglam
Zui a khau bang chiah lai
Theisen tuanglam phei
Nisim mang hiaihiai
Tuaglam hak semsem
Lunggaih lummei hong ziing
Dahna khimkhua hong ziing
Hiai nunna’n bang sam hiam
Chi in lungngai ve’ng

Tua laitak hiai nunna ah
Ngaih aw nang sial bang n’ong suak
Hehnem ding, dahneem ding
Lungzuan dai bang thengsak ding
Na angliim ah tawlnga in
Simlei lungngaih ngilh ning e
Lengvan tulliim nuam a
Tutkhawl limnga bang bual ma
Ngaih aw kei di’n nuai simlei ah
Hinna tulliim nuam na hi

Tu in tuang i lam ah
Baanzaal khak in chiah le’ng
Touding tuanglam zong
Chiau a damtui zong
Lungtuak a kheng in
Lungngaih lummei ziing nuai
Heh kineem, dah kineem in
Lou bang lelh kidawn in
Ma chiang suan ni e

 

Tuun Omlaivei ||

Ka zua' sakluang luangsing bang a zaalna
Kulsin buanlei pa bang mual manlou a
Ka tuun in omlai paitem bang kuah aw
Von lianu'n khamkha'n veiloh ngawn ing e

Ka zua tohlou simlei gua bang hin ding
Tuun aw sinlai khau bang na hualmoh hiam
Tong kupmoh a zalkhun saam bang na zaal
Na von lianu'n mal bang hon kou ve'ng e

Tuun in zua' siang sihsial bang zuan lechin
Tuai toh ham bang vaih ding geelngam la'ng e
Tuun in simlei khosial na maa zong in
Von liang kei a'n ngaihsial vansang ding aw

Phamsate lengvan ah nunkhua nuam chi
Tuun aw ngaihkhua tuah nawnkei ni e
Zuang hong thou aw tang bang damta ni e
Na huai ding von nih thei bang senlai e

Kumsawt chiklou bang dam ni e tuun aw
Simlei ah lungchim in khawllai ni e
Tusawn momnou haam bang huailai inla
Tum bang vuai chia'n zua' siang na zuan ve aw

Hawmsiam sian aw ngaihkhua hon tuah inla
Tuun dit baanzaal neem in huailai ve aw
Tang bang dam zaitha phel bang khauhsak inla
Zua' nuachiang von teng huai di'n siam ve aw

 

Ka Aw Neem ||

Written by: Vz Vualnam

Ka aw neem teng mikhualte ka pia a
Ka aw khauh leh gum teng ka innkuante ka pia.
Ka migiitna veng leh paamte ka khol a
Ka gitlouh leh lungtom ka innkuante.
Ka sumphalna ka lawmte’n a mu ua
Ka sumchiilna ka tanau lainate’n.
Ka thanopna khotaang in a mu ua
Ka thadah leh thazoi ka sungkuante’n.
Kuate’n koipen tan kilawmzaw ahia,
Deihhuaipen leh deihhuailoupen tuaktuak!
A beina tuak hileh kua ka pe dia
Deihhuaizaw leh deihhuailouzaw tuaktuak!
A beina beek pilvangtak in pe le’ng,
Ka luang kiim ah kuamah khasekei leh!

©Siamsinna leh Vakiangbu

 

 

 

Sannem Ning Zou Nuam Ing ||

Khosak mual nuamnou ngaih toh kholhna
Ka lai lun e sunkim vul law'ng e
Kuivum nuamnou deih toh tutkhawlna
Chik kum in ke'n ngilhkei ve ning e

Taang in deihbel sawnbaan ka kaih ni'n
Baanzaal a let khau bang sut ngam la'ng e
Taang in meldeih um bang ka kholh ni'n
Sunni neem in gi bang khen ngam la'ng

Kuivum nuam a ngaih toh sang bang nou
Nuai a simlei lung in ngilh law'ng e
Thangvan a silmu kop a laam bang
Kei ka laukha thangvan ah laam e

Thangvan ah silmu kop in laam e
Tual a nihgel houlungtuak bang e
Nihgel houlungtuak laukha kihual
Tung sunni'n gi bang khen ding hi e

Sunni lenkil kia muikhozin in
Thangvan silmu zalna kikhat dia
Lung kihual nihgeel muikhozin in
Sam bang zalna laikhun dang ding aw

Um bang kholhna sul ah va leh leng
Nuhsawl zong a vulta ding hi e
Ka ngaih aw ngaih lungnem duangkuai aw
Kei zong lia nang ngai in vul ing e

Tuun beta ni e zua beta ni
Nuun khat ah ngaih aw luaitonta ni e
Nuun khat a deih toh heisa bang paal
Kumsawt sannem na ning zou nuam ing

 

 

Tuun Vangsel ||

Thei bang sen zu bang mom lai in
Na tuun in haam bang hon huai a
Machiang khankhua ding geel in
Lam-etna toh maimit hon suan
Nuachiang zaitha dawn ding von sen chi'n
Sang bang nou nau bang hon awi

Kil bang khang sial bang n'ong let in
Na tuun' lam-et machiang khankhua
Na kungtung ah thei bang huut e
Sunchin-zanchin hon suanna maimit ah
Lungzin lungngaih luankhi luang
Simlei tuunnu zatam lai ah
Vangsel tuunnu hita e

Vangkholai ah singta' tuun in
Von deih sakmin lou in sial e
Vangkholai ah nang' tuun in
Von deih sakmin lou ngamlou e
Vuallai a hei ding kai in zak e
Sau ah lungzuan ngaihtam sial e

Lam-etna toh maitai lakmai
Ngaihtam sial in pa bang mualta
Von dawng hon oihna zaila
Phamlouh kahtam in suan zouta
Von in lah lunghei simthu leellou
Vangsel tuunnu hita hi e

 

 

 

Sinlai Chiimsak E ||

Sen a simzawng melthei hi'ng e
Kiallou hal a nianglou hi'ng e
Tuun toh khohlou ah hei ve'ng e
Zua toh lulvok sungnek sa'ng e
Vual' en melthei a kil bang khang
Khankhua kiheek hai bang ngak ing

Tatna sian in siam a hiam aw
Zua' lamlouh sesum lam ing e
Vual a'n namzu a man zong in
Kei a'n sawmsial man e sawmsial
Vuai kuan tuun leh zua zaitha kiam
Laukha a muanna'n na'n hunzou e

Tu in thai deih la ta ning e
Von deihnou hon tawi ta ning e
Sian' huai in von deih n'ong khang dia
Von aw zua' lam na khuupzou n'am
Tuun toh vuai kuan zaitha kiam chia'n
Von aw laukha ka muang ngam na'm

Sen a simzawng lai ka tan aw
Sinlai gial bang na khing ing e
Tu a sinlai ka hualhual chia'n
Sian in hon siamna hi chi'ng e
Simzawn lah zil hauta lah zil
Sinlai chiim bang chiimsak hi e

 

 

Lengvan Lenkawl ||

Simlei ah zaw nunnop vuiching theilou
Lenkawlni suak peuh galsial bang don ve'ng
Nunnop sunni koi a vaitham hiam aw
Nau bang nuihlai sunni a tomlua e

Lengvan lenkawl don nuam ta'ng e
Tua ah nunnop sunni nichin in suak
Nunnop ngoumei sunchin in zaam
Tua a bualte'n al bang dah mel theilou

Nunnop sunnni'n lenkawl hon taan hihiai
Al bang dah lummei a thengta ding sa'ng
Meldeih nunnop sunni kaai manlou in
Lummei hong kai khimziing in hon tuam e

Tutkhawllou machiang suan zel leng
I nuai simlei tuanglam i khin ding a
Lummei kaina simlei tuangnungsiah in
Ngoumei zaamna lengvan i tang ding hi

Simlei a ngaihtam sial zatamte aw
Tuang i tun na'ng maimit suan zel le hang
Luanli toh tuanglam zuihna simlei ah
Pheiphung khailai a nuamtuam ding hi e

 

 

Zamluang Mau ||

Tu a zamluang mau ngiingei nou aw e
Gamlei lungtup khuamual suahna hiam aw
Lungtup khualmual i suahna hilou e
Ngalliam kulsin a i khaakna hi e

Pupa' khan a zamluang a mau leh aw
Teitui sumlu i laak a mau hi e
Tu a vangkhua thawn zamluang aw e
Teitui baanzaal a i puukna hi e

Tu in ngalliam kulsin ah i kha zong
Gamlei simthu khohlou bang taamlai e
Khangsawn lungpil zata zuangthou ni e
Ngalliam phamna huantuu bang chiing ni e

Pupa' khan a liimsawl bang beelte
Teitui luun toh khau bang kihual hi e
Khau bang hualte'n heina peuh pal bang nang
Ka namtem a paai ah hiam lai hi e

Ngalliam salpha mun na muangta hen aw
Gua bang hingte'n gamlei zuunta ni e
Pupa gamzaang nuam singta' henkol khai
Luainam bang suut ding hanlung chiam ni e

Kumsawt i thamna zolei salsuah ding
Tu in zaitha puan bang suukta ni e
Chiamna Tuitha chiautui na luang inla
Na siang a zaal' batphu na zong ve aw

 

 

Kua'n Nau Bang Hong Nem Dia ||

Theisen nau bang nuihlai liammangta e
Seinou vual nuam a heilai zong liamta
Machiang lenkum sil bang paallai dingte
Suihlung zuang a luanli nuul na'ng hi e

Hun tui bang luangliam ding ka phal theilou
Paallai ni zong tomkaal in liam ding a
Nunlui sial a sunkim zaitha neem ding
Tum bang vuai kua'n nau bang hong neem ding hiam

Sunni leh solkha lah danglou ding a
Lenkawl leh lenkil dangta mai ding aw
Paallai baanna gamlei hong dang ding a
Lungzuan koi ah sawl bang i baang ding hiam

Kholhlai vualngaihte'n sau suang chiat ding a
Simlei zilza ah gi bang khen ding a
Meldeih hawm a taanna nuai simlei ah
Ei aw kua' ang ah i zaal sam ding hiam

Sen tongsan alva tongluang lah danglou
Kumchin lengtal lah a zai oih danglou
Ni khat chiaului lumsuang a pou chia'n zong
Zou huihkhi'n a laan baanglou lai ding aw

Tu a deih toh um bang kholhna pahtaang
Tum bang vuai chia khattang ngaihtam sial na'ng
Kholenmui kaal ah nunlui hong lang dia
Sial vansang toh pahtaang a vei ding aw

 

 

Ka Lung Aw ||

Ka lung aw bang simthu leel na hiam
Hehluat lung a bang vai hawm na hiam
Nuachiang lungsiiklou ding na hiam
Nuachiang luanli nullou ding na hiam

Dahluat lung a bang simthu leel ka hiam aw
Sialtam toh bang vai hawm ka hiam aw
Lungsiik ing e hizong leelzou ta'ng
Luanli nuul ing e mualkhum ta e

Muhchiil a sinlai kuai chita chia
Kua' ang ah a zaal diam chita chia
Nangmah ang ah zaal leh chita chia
Ang a zaal kuan bang simthu hiam aw

Muhchiil laikuai ngiingeinou hi e
Tongsan ding zanchiang zaalmang hi e
Ginlouh zaalmang tuang hong tung hal a
Tawilai huihkhi'n seem e tualkia e

Nihgeel khankhua ding khuam bang na geel
Vondeih tawi a sausuan ding na geel
Singdang englou tulkhawm ding na chih
Tu a thei bang huut ta ding hiam aw

Sial tam thei bang huut ding hita e
Singdang enlouh lung in ngilhta ni e
Pham dong singdang eng ding hi ta'ng e
Deih hal a loh ngamlouh laikuai e

 

 

Mualdawn Tulsing Bang Ka Pou Nuam ||

Ka lawm ka vual' lunggulh khopi kilawm;
A sung a na-aphuai thil tengteng toh.
Kei' lunggulh mualdawn zou vot et a lawm;
Luita luangging leh vasa' ham ging toh.
Zu inn bengseng ah lungkimna mu ua;
Huihnin leh meikhu lak ah tawldamna.
Mualdawn luita kei' lungkimna hi a;
Huihkhi leh singliim kei' dia tawldamna.
Kawl sang tung ah vualzohna ka mu a;
Guam thuuk leh mial ngemngom ah hansanna.
Huai munte khawng ah vual ka engkei a;
Huai mun khawng ahi kei' dia khamuanna.
Den chia khakia kulsin ka zal chia'n leng
Mualdawn tulsing saang bang ka pou nuam hi!

 

 

Nungakte Kiang Ah!

Hiai leitung a mi khat kia na piak theih
Huai thil kua tan di'n a kilawmpen a?
A tang ding a kilawmpen a na theih
Huai mi'n tangkhalou di'n a omkha hia?
Hinkhua ah itna a hong suak baih a
Itna'n ki-etlahna a hon tonpih.
Ki-etlahna'n itna vun a silh a
A tup tangtun ding in a hon tonpih.
Huai lampi a pan na kiheikeileh
Kisikna khitui in a hon zui ding.
Hon pite'n hon nuse dia himahleh
Khitui in a hon nusekei hial ding.
Den chia'n a tang ding mi a hong pai dia
Amai a na di'n chia'n bang na gen dia!

 

 

Zaktamoh!

Nungak' kiang ah k'on it chi le teh
It himhim a hon neikei ding.
A tunung ding ngaihsun hetlou in
A neih teng uh a hon pekhin ding uh.
Pasalte'n hiai thuguuk a theih uh
Leitung in a lunggimpih!
A kingai kichi taphot in
Meh chep in a chiam thapai uh.
Nou kia a chiam ut kisa na'i umaw!
Mi dang chiamsak nungak khat kiang a
'Kei le hon chiamsak sam in,' ka chih leh
'Zaktamoh! Ka hai nawnkei! Ka pil ta!
Chep maimai di'n ka kiphalkei,'
Chi in mangpha a hon khak!
Itna suanlam a va zuante' a di'n
Phal tak in ana leem ua
Thutak masuan a va zuan kei a di'n
Angnem nangawn phallou in,
Zaktamoh pa! a hon chi uh.
Ke'n leng itna suanlam leng
Phal tak a leem ding uh hive'n!
Khatvei a chep nung uh
Nihvei chep bang a poi a? Thumvei?
A'ihkaleh pil baih deuh uh henla
Khatvei le ana chiamkei vanglak le uh!

 

 

Lallou Lal Chi'n Biabiakei Ni ||

Vangkho seisang zingvai hawm zatamte
Suihlung chiim bang a chiim chiat ding sa'ng e
Sinlai va bang a pil chiat ding sa'ng e
Ginlouh sinlai sok bang mawk tam ta e

Vangkho miza'n deih a chi bang i teel 
Sum bang biak dia i teel a hiam chi'ng e
Khangsum bang biak ding hilou a vual aw
Sik a simthu sa dia teel hi ngawn e

Sik a simthu sa dia chi bang teeltuam
Mal bang kouh a i siang lai hong len ni'n
Lunta chi'n sum bang bekei ve ni e
Simthu sak ding houlung kumzaw ni e

Vangkho mi zata' baanzaal a siamsa
Lunta chi a sum bang i biak leh aw
Selungmawl vaimang in zong a baanzaal
Tung sianmang chi'n sum bang bia hi e

Bilh bang thou ta ni e seisang zata
Chi bang teelte'n i simthu a nial leh
Zingchia'n deihlouh tualkhiat in khia ni e
I simthu sa ding a pha zong ni e

Sesum lamtam i ngaih man in vual aw
Lallou lal in bawl tapeuhkei ni e
Nuachiang ginlouh henkol khai na'ng hi e
Henkol khai a nunnuam mi omlou e

Henkol a khai tengkhawi zatamte'n zong
Puaksing bang lel e salsuah simthu leel
Ei aw henkol khai nuam in vangkhua ah
Lallou lal chi'n biabia takei ni e

Top of Form


 

Pupa' Lamlouh Langlam ||

Pheiphung khailou vaimang' baanzaal
Tuanglam a damtui bang luang aw
Tang kei a'n a lawmlou sa'ng e
Chik a lam di'n kiging la'ng e

Sian in siam bang ei siam a aw
Pupa' lamlouh vaimang' baanzaal
Huang ah sawmsial bang a kual e
Phung in bahkhipha bang veel e

Tulkuan zuapa zaitha kiamkuan
Lenkum luangtam simzawn zil sa
Tomte hautawi zilsak nuam ing 
Vuallai pak bang tawi nuam ing e

Simzawn siah bang niangsa tuunnu
Tomte hauta zilsak nuam ing 
Khohlou tuanglam pheiphung suan ngilh
Vaimang' baanzaal vaang zou hen aw

Sian in machiang huai zel hen aw
Ziat leh vei ah khiang dih hen aw
A vaang ning bang zohna langlam
Kumsawt nunnop guitung hen aw

 

 

Bang i loh dia ||

Bang i loh dia,
Lungtang a puakgik pozou lou a i puuk chia'n?
Bang i loh dia,
Zingchiang nangawn mu ngap nawn lou a i om chia'n?
Bang i loh dia,
Kal khat nangawn suan ngap nawn lou a i tawl chia'n?
Kah a phatuam diam?
Thuum a phatuam diam?
Sih a phatuamzaw diam?
Hiai lungziinna meivom khen ah
Lungtaina ni a suak lai diam?
Hiai lungngaihna khitui nung ah
Kipahna mittui a luang lai diam?
Kua'n a thei a!
Ngak lai ni!
Kikhin nai kei ni!
Hon neem tuan kei mahleh
Kap tadih lai ni!
Dawn louh bang mahleh
Thuum tadih lai ni!
Vaiveng ding bang mahleh
Sihna teel nai kei ni!

 

 

Lanva lui a naungek kiang ah ||

Niinneng na hi a hia,
Niinbuakna mun a na om!
Hon lainat ding om lou hia,
Deih louh paih a na om!
Lanva lui a paih maimah dia,
Ba hong piang na hia bawi!
Itna himhim ngah lou dia,
Ba suul hon nusia na hia bawi!
Ka mualphouna uh khuhna dia,
Nang niinneng na hong tan laizang!
Ka kileekna uh gah lou dia,
Nang seh a na om laizang!
Nu dang' suul ah hong suak leteh,
Deihthohpen hi ding hi ve chin!
Pa dang' suan a piang hi leteh,
Duatpen hi ding hi ve chin!
Vangsia hina tel chia maw,
Leitung a khatvei pian sunsun!
Vangtah hina tel chia maw,
Khut-le-khe kim a piang sunsun!
Na thuakna kou' dia sinlai hi hen,
Khuhmang ngai lou hinkhua hon zang ta n'ung!
Na sihna kou' dia hinna hi hen,
Hinna' manphatdan hon theita n'ung!

 

 

Hileh ||

Biakinn a khut kilaamtou teng
Khut siangthou hileh!
Thohlawm kithoh teng
Muhna siangthou hileh!
Phatna la a sa teng
Muuk siangthou hileh!
Thuumna kisamkhe teng
Lungtang tawng a pan hileh!
Gam-le-nam it kichi teng
Sum-le-pai a chihna uh hikeileh!
Sepna-panna ngah teng
A chitziak chit ziak uh hileh!
Lampi kibawl teng
A tou dia bawl hileh!
Khohausa ka hi kichi teng
Khua-le-tui it a keem ngen hileh!
Saptuam upa dia thaunilh teng
A khamiit ziak ua nilh hileh!
Pathian' nnasem dia kipe teng
Khamangthang vei ziak hileh!
Thuhoih-lahoih ka gen teng
Ka zuihkim zoh hileh!

 

 

Lampam sikkhial lou om lou ||

Zingchiang khual lawzen le hang lah
Tuni a nop ding zah a nuam lou thei a;
Tuni a noptheipen in zang le hang lah
Zingchiang-thaichiang a nuam het lou thei a;
Tuni a nuamsalua khenkhatte
A zingchia kisiikna a dimthei ua;
Tuni a nopsakna laan ngamte
Zingni-thaini a nopsakna ngahthei ua;
A hunphet theihhaksa mahmah a,
A theitheite mi hampha hi uhi.
A laitak zuih haksa mahmah a,
A zuitheite mi hampha hi uhi.
Zan, tuni leh zingchiang in a bawl hiai hinkhua,
Lampam siikkhial lou om lou hiai khankhua!

 

 

Mihing hi'ng ||

Thuhoih-lahoih ka gen hang,
Mihoih-mipha hi tuan ke'ng!
Tasam-chimoh ka huh ha'ng,
Itna-lainatna nei hi tuan ke'ng!
Ka lungsim a suak peuh a gen hi'ng,
Ka zoh ka zuih a gen hi ke'ng!
A kilawmdan a gamta hi lel h'ing,
Itna-lainatna nei hi ke'ng!
Mihoih-mipha chia n'ong naihleh,
Denchia lungke pah ding hi teh!
Itna-lainatna nei chia n'ong ngaihleh,
Denchia kisiik pah ding hi teh!
Mihing hi'ng, hoih leh hoih lou paaikim hi'ng,
Hoih zong seem, hoih lou zong seemkim hi'ng!

 

 

Ngap nawn keng ||

Tawlta ing, bahta ing,
Kal khat zong suan ngap nawn ke'ng.
Hunta hen, khinta ning,
Zan khat zong ngap nawn ke'ng.
Hiai simlei khualzinna
Ngap nawn ke'ng.

Gawtmun hiam, vangam hiam,
Misi khua nuainungpen hiam,
Ka tangtawn mun ding ah
Toupa aw kei hong khata in.
Hiai simlei lou siah
Mun khat peuh ah
Kei hon koihta in.
Hizong mikhialpen in
Na zahngaihna ka ngah dingleh
Na kha nuai lim ut ing.

Hun nai lou, khin nai lou,
Chia n'on laak kei dingleh,
Thahatna, hangsanna,
Kei dia kihun hon guan in.
Na huhna tel lou in
Ngap nawn ke'ng.

Zingchiang bangzah in sam lai hiam,
Luankhi bangzah in sam lai hiam,
Kei hong kipaizaw ding ka hiam,
Nang hong pizaw ding na hi hiam!

 

Na Angsung Kia Ah ||

Laakmang a om tuihute bang in
Laakmang in ka om a
Tawlngalou a leng vialvial tuihute bang in
Tawlngak na’ng neilou in ka leng vialvial.
Kawl killi ka tawnsuak a
Kei di’n tawldamna a omkei.
Khamuang a ka bualna tuipi ah
Kua'n a hong kha dia?
Ni khat mualmong ah meivom a hong kizial a
‘Hong in,’ chi’n a hon pi a
Leitual ah a hon kha.
‘Paita in, Paita in,’
‘Na khamuanna mun ah paita in,’ a hon chi hi.
Hawkguam tawn in ka luang a
Luita-luipi tawn in ka luang a
Huchi’n ka lunggulh tuipi ka tungta hi!
‘Na itna thuuk leh zaa ah,
Tangtawn in tawldamta ning,
Khaal ni hong sa mahleh,
Hon khah ke’n la, hon hum in,
Na angsung kia ah lah,
Ka khamuanna a bukim ngal a!’

 

 

Ni khat sunni hong suak hen

Zanchiang laikhun a sam bang zaal,
Sial louh ding teng ka sialsial kaal in
Gilkhang buh-al hong khuang ngelngel e.
Taikhovaal ding zingdam solnou taang,
Buh-al aw khuangkhuang lou dih ve aw,
Tangliang sam bang zaal ding sam lai e.

Simlei lungngaih tomkaal ngilhna di'n
Zanchiang sam bang zaal maimit siin zong
Tang lelliang in ka phu lou hiam aw!
Sunchin-zanchin ngaihtamsial toh hei
Ka sinlai in dawl lou ding bang e,
Ka sakduang in dawl lou ding bang e.

Maimit sing lou hal zuangthoh khiapmoh,
Pelhmoh mazap zuanzel ve ni e.
Sunchin mazap a ngaihtamsial di'n
Khohban ah mazam tapeuh ni e.
Zaitha tawl e sinlai khamkha'n zeel,
Khokhaal tung thelnah bang kiak law'ng e.

Sunni kidang, solkha kidang e,
Ka zuan zingdai bang a theu ding sa'ng.
Theu lou lai e sum bang ziing sawn e,
A kumchin in ziing semsem hi e,
Tangliang kei ka kungtung diingdiang ah
Nunnop sunni hong suak lou ding hiam!

Ngaihtamsial luankhi ka nuul kaal in
Simlei gua bang hin ding ngilh law'ng e.
Nunnop sunni sakmel mu lou in
Kulsin mial ah ka zaal ding hiam aw!
Ni khat kei a'n sunnni suak hen aw,
Lungchim in nau bang nui nuam ing e!

 

 

Ngaihdam zoh ding ||

Mihoih tah chihman in
Teel mawkmawk ke'n.
Denchia a hoih louhna na muh chia
Pom thei lou ding hi teh!

Sum hau tah chihman in
Teel mawkmawk ke'n.
Denchia sum-le-pai a haksat chia
Pom thei lou ding hi teh!

Melhoih tah chihman in
Teel mawkmawk ke'n.
Piansual kikhel ngei lou ahih chia
Pom thei lou ding hi teh!

Himahleh mi khat om,
A hoih louhna a le na it,
A zawn lai a le na it,
A melsiat lai a le na it,
Amah teel in, amah len in,
Hinkhua ah ngaihdam tampi kisam,
Na ngaihdam zoh ding mi teel in!

 

 

Kikum le'ng ||

I lungsim a omte kihilh kei le'ng
Bangchidan a kitheisiam ding i hiam?
I haksatnate kihilh kei le'ng
Bangchidan a kihuhthei ding i hiam?
I lungzin-mangbatna kikum kei le'ng
Bangchidan a kinem thei ding i hiam?
I deih leh lunggulhte kihilh kei le'ng
Bangchidan a kipethei ding i hiam?
I lungbuainate kikum kei le'ng
Bangchidan a lampi kikawkmuh thei ding i hiam?
I kipahnate kitheisak kei le'ng
Bangchidan a kipahpih thei ding i hiam?
I hehnate kihilh kei le'ng
Bangchidan a ngaihdam kingen thei ding i hiam?
I lungtun louhnate kihilh kei le'ng
Bangchidan a kibawlpha thei ding i hiam?
Kikum le'ng, lungsim kikum dialdial le'ng.
I lungsim genkhiat ding kihta kei le'ng,
Leitung in hon thei hen, en leng leitung thei ni!

 

 

Na hi mai de!

Na khua ua mi hausapen
Tasam loupen ding in sep ke'n!
Na veng ua inn nei hoihpen
Tawldampen ding in sep ke'n!
Na lawmte lak a melhoihpen
Lungkimpen ding in sepke'n!
Na lawmte lak a nuitampen
Kipakpen ding in sep ke'n!
Hau napi tasam den om a,
Inn hoih napi tawldam ngah lou om a,
Melhoih napi lungkimna mu lou om a,
Nuiden napi kipak ngei lou om hi.
Nang suan ding nei lou kichi a,
Kua phawkphak dia leng kikoih loupen,
Mite' guuk-enpen houh na himai de!

 

 

Zuheisuktun (Orion Constellation) ||

Si-al! Si-al! Thangvan aidak buukta,
Lungtuak kuate' um bang kholhna hiam aw!
Si-al a zep thangvan aidak buukta,
Lungtuak kuate' tut a khawlna hiam aw!
Sunkam lungzuan thel bang a thoh hun chia'n,
Thangvan aidak buuk ah galkhua daak le'ng.
Itteng-ngaihteng ngou bang a lat kim chia'n,
Lungzuan khamkha'n veiloh luankhi nul le'ng.
Kei hong chiahta ning e si-al nang' siang,
Khattang ngaihsial simlei luankhi nul sa'n,
Tungchiang thangvan luankhi nul le'ng nang' siang,
Si-al nelkai'n luang le'ng, khattang luan sa'n!
Zuheisuktun nuailim galkhua daak le'ng
Simlei ngaihsial kaina i don nuam diam!

(Nitak a Zuheisuktun/Orion constellation ka gal-et chia'n aidak buuk hileh kilawm in ka mu a, a liim ah kuate a khawl ding ua aw chih bang ka ngaihsun thapai...)

 

 

Tua khawng mah hi ||

Leitung zaw kibulhlemna ding ngen,
Ei deihlam kia chihtheih gige louh.
Hinkhua zaw zalenna lat ngai den,
Ei thu kia a paithei gige lou.
Deih nei le'ng a man om man piak ngai,
Pe ngap maw, taan ngap maw, khat teel ngai.
Ngaih nei le'ng lungtuak a kikholh ngai,
Tuahna dia i lungtang khiatniam ngai.
Eimah kia kipahna bukim lou,
Kipahpih ding khatbeek om lou in.
Eimah kia nunnopna guitung lou,
Noppih ding khat lel beek tel lou in.
Sungte khual, lawmte khual, mikhual khual,
Eimah kia kikhual det hithei lou.
Utlouh sem, peihlouh bawl, mite khual,
Ei peih kia, ei ut kia hithei lou.
Tua khawng mah hi mihing hon hisakte!
Tua khawng mah hi hinkhua paisak zelte!

(Thumthumta in sim in

Leitungzaw kibulhlem nadingngen,
Eideihlam kiachihtheih gigelouh.
.
.
.
Tuakhawngmah hi mihinghon hisakte!
Tuakhawngmah hi hinkhuapai sakzelte!)

 

 

Ode to Phung Makaite ||

Phung vai hawm gik mahmah
Liangkou khauh kisamlua
Phung vai geel vai lianlua
Lunglian puu kisamlua
Hawmkhelh baih, geelkhelh baih
Khat theihna buching lou
Phung vai geel, phung vai hawm
Lung tampi ngakkhawm kuul
Thazoh ta'ng chihman a
Ei deihdan talkaih lou
Ngamthoh ta'ng chihman a
Lung dangte nawlkhin lou
Geelkhial le'ng phung in thuak
Hawmkhial le'ng phung suploh
Lamsa teng lamlouh suak
Lepsa teng leplouh suak
Tamzaw' deih, tamzaw' lung
Ngaikhe ngam, paipih ngam
Makai khauh, makai neem
Phung in kuul, phung in sam
Khangnoute hanchiam ni
Ei nunung, phung masa!

 

 

Tapa hawmthoh tung a kahtam ||

Na pianlai in ka om a,
Kei leng lam-etna a dim naupang ka na hi a,
Na awsuak masapen ka bilkha ah a thaamden.
Puan in a hon tuam ua,
Naungek deihthohhuaitak na hi.
Nang a lam-etna nga
Nakiim-nakiang a hon um khiukheute
Kum tampi a maigum uh hong nel in
Nang a hon muh un nuihmai a hon puu uh.
'Hiai maw i tha hon dawn ding,' chi in
Akhat-akhat in a hon nou uh.
Huaite lak a ke'n leng
Ka honna deihthohdan tel!
Ka khamuanna na hong hihdan tel!
Theihlouh kaal in na hong khanglian a,
Valnou' duhgawlna na hon thei a,
Himahleh na kihei ding lam-en in
Hawmthohtak in a hon keem uh.
Sawt lou sung in na hong piching a
Mite'n a hon lam-et laitak un,
Mite'n a hon muan laitak un,
Nu leh pa tung ah na hong hel maimah!
Nang hon khotuahte na zuausan maimah!
Ka kipahna uh a thengta!
Ka lam-etna uh a huutta!
Ka nuihmai uh a mualta!
Nang ziak in veng leh paam lak ah
Ka maizum khinta uh! 
Nang ziak in melmate lak ah
Ka zahlaak khinta uh!
Nang ziak a khasia hiaizah zouzaite' khitui
Na ngapzou mahmah dia hia?
Nang ziak a lungzing hiaizah zouzaite lungzinna
Na pozou mahmah dia hia?
Khitui hiaizahta' kiakna
Nang a di'n vualzawlna a om kei!
Lungtang hiaizahta' lungngaihna
Nang a di'n lamzanna a om kei!
Tapa taimang in leng kiik hun thei buang,
Nang leng kiik hun thei in hong kiik inla,
Na liangkou a mohpuakna hong buchin in!

 

Unau henkol suut dia kichiamte ||

Tangthu khat a gen uh
Ke'n za ing, khanglui thu.
Khua khat om, luun mahmah,
Tua ah om innkuan khat,
Tapa nih naungeklai,
Nu leh pa zong haatlai,
Himahleh nunnopna
Mun khat ah tengden lou,
Zingsang khat phalvaak in
Galte'n khua hong sim uh,
A pa that, naupang hawi,
A nu uh sal in kai.

Galte pahtaang leel ah
A tate ngai in vul,
A kolbuh lel in zoi,
A tate kua'n don ding,
Chih geel in sunchin kap.
A tate kua'n keem ding,
Chih geel in zanchin mau.
Himahleh hiai thil khat
Hehnepna a neihsun
A tate melmawllai,
A thuakna theihpih lou,
Omna peuh uah lungtai.

Hun leh ni liam zungzung,
Naupangte khang hulhul,
Nu leh pa ngaihdan thei,
Kandan thei, zondan thei,
Im theihlouh hilh khong ngai.
Tangvalnoute thangpai,
Sisan lum, sisan sou,
Ka pa' phu ka laak ma,
Ka nu' kol ka suut ma,
Tolh lou ding chi'n kichiam,
Lum leh tei toh kisa,
Lungtuak in kuankhia uh.

Mual leh guam galkai uh,
Zaitha tawl poisa lou,
A nu un zaitha guan,
Kilen in masuan zel,
A tawp in tung khong uh,
Galte' khua guukluut uh,
A nu uh simzon uh,
Hausapa' pahtang ah,
Henkol khai, vul ningniang,
Galte tam, galte laang,
Innnuai ah kibu uh,
Hunlem ngak, hunpha ngak.

Tua tak chia'n a nau in
Hausapa' dakpi mu
Deihgoh in la ning chi.
Tua tak chia'n a u in
Hausapa' tanu mu
Deihta in pi ning chi.
A u in a nau khaam,
A nau in a u khaam,
Amau geel kinakloh,
A aw uh hong saang in,
Galte'n za, uumchip uh,
A nu toh kol bulh uh.

A zing chia'n pahtang ah
A thum un galte'n veel,
Galte'n thoh, chiamnuih uh.
A nu un a tate 
A tuung in thei pah lou,
Mi khat peuh ding in koih.
A den chia'n hon theikhia,
A nuam ngial tahal in
Mangbatna in pumtuam,
A tate henkol khai
En zou lou, thuak zou lou,
Khakhamvei in kha kia!

 

 

Itna' kiang ah ||

Itna' sang a manphazaw
Hiai leitung ah bang a om dia!
Kopkhat itna a muh ua kipaak
Huai sang a kilawmzaw bang a om dia!
Tuni a na itpen' khut len a
Damsung tonkhawm dia na kisakleh,
Na hampha! Na vangpha!
Kiptak in len inla, khah ngei ke'n!
Denchia'n hinkho huihpite nung mahleh,
Hinkho kialte ke mahleh,
Hinkho ziinte liing mahleh,
Hinkho meivom kaai mahleh,
Huai hun chiang in leng khah ke'nla,
Lenkip semsem in!
Tuate thuakkhawm dia
Kalsuankhawm na kei uhiam!
Tuate pal galkai dia
Kichiam na kei uhiam!
Zingkal khat na thoh a,
Itna koi a omta hiam na chihleh,
Itna a mang hikei e,
Itna a mit hikei e,
Nang a gammang hizaw teh!
Nang a mit hizaw teh!
Hinkho leivuite'n na lungtang tuamkhin a,
Khosakna meikhu in na mit siipsak a,
Lampi muthei nawn lou hi teh!
Na lungtang nulsiang inla,
Na mit phiatsiang inla,
Na lungtang tawng ah hong kiik le teh,
A mit ngei lou, a dai ngei lou,
A dau ngei lou, a tul ngei lou,
Itna na munawn ding hi!
Na kipahna bukim huai ah
Na munawn ding hi!
Na muh bang itna
Miteng in mu kim lou!
Na tan bang itna
Miteng in tang kim lou!
Itna tang zou lou tampi om,
Itna ngah zou lou tampi om,
Lungzuang ngoihngoih a nitum,
Khuangai vungvung a khuavaak,
A lungsung uh khuamial den,
Kipahna nivak in sal ngei lou,
A lungtang un khitui nul den,
A damsung teng uh lungzuang,
Kah leh hagawina a dim,
Tawldamna himhim om lou,
Vaang in amaute hehpih lou!
Tua bang a ni khat lel leng
Na zat khaklouh kipak in!

Na tung a vaang a hoihdan
Thei inla nuam in!
A khut na let kipsem in len in!
Itna in a hon teel leh
Na hampha! Na vangpha!
Itna sang a manphazaw
Hiai leitung ah bang a om a!
Kopkhat itna a muh ua kipak,
Huai sang a kilawmzaw bang a om a!
Itna'n a hon teel ke'h,
Hinkhua bang ding a hia!
Kap leh hagawi ding lel in
Nite' tamna bang ding ahia!
Itna tang lou a tangkhat,
Huai sang a hehpihhuaizaw kua a om dia!
Itna ziak a vakvai a,
Zingchiang a tawpna hileh
Chih lunggulh vungvung tampi lak a
Nang itna na muh zenzen!
Na hampha! Na vangpha!
Vengbit in! Kemhoih in!
Mitsak ke'n, mualsak ke'n,
Muutkuang seemseem in!
Khangsak seemseem in!

 

 

Khristmas ||

Khristmas! Khristmas!
Hunpi! Hunnuam!
Puan thak! Van thak!
Ah! Neulai! Noplai!
Tu in zaw ka lianta a,
Vanzuakna mun ah ka vaak nawnta kei.
Tutung zaw ka lungsung ah ka vaak dia,
Ka neih ngeilouh thilte ka zong zaw ding.
Ka pumpi in van thak a kuul nawn kei a,
Ka lungtang in van thak a kuul zawta hi-
Itna, migitna, ngaihdamna, sianthouna,
A dang bang ka zonglai dia?
Kumthak! Kumthak!
Gan kai! Gan ching!
Sial hiam! Bawng hiam!
Ah! Neulai! Noplai!
Tutung zaw ka lungsung ah
Goh ding kai in ka kuan dia,
Gitlouhna, khaatna, huaihamna,
A vek sipsip in ka gou dia,
A buuk namsia uh ka hahsiang ding!
Tutung kumthak a n'on haih leh,
Lawm aw lamdang sa ke'n!
Ka lungtang ka hahsiang a,
Puan thak in ka tuam a ahi!

 

 

 

Zin bang hon kha aw ||

Vual ngaih taan a sunkim lungzuan
Kei ka sakduang vul ningniang e
Lengvan sumtual nuam galdon ve'ng
Lungzuan lan bang ngak na'ng hi e
Simlei ah zaw vualngaih vang in
Sunchin-zanchin luankhi nul ve'ng
Sinlai ling bang dou nalua e
Kei ka nunna vangsel sa'ng e

Lengvan tualnuam gual gen minthang
Nunnop zaila'n a luan chi uh
Tua mun a limnga bang bualte'n
Simlei mu bang ngai lou chi uh
Kei zong tua ah mim bang bual leng
Ka lungngaih dai bang theng ding aw
Ka luankhi a hulta ding a
Nau bang ka nui samta ding hi

Simlei a ngaihsial a vul sa'n
Tua gam nunnuam manoh nuam ve'ng
Ka tuun aw e ka tuun dit aw
Tua gam sihsial bang zuan nuam ve'ng
Na von khau bang na chiah leng aw
Luankhi toh mal bang n'on kou diam
Ka nuachiang ah ham bang vai in
Lungngaih luankhi na nuul ding hiam

Ka tuun aw e ka tuun dit aw
Luankhi toh mal bang hon kou ke'n
Kei ka lungzuan a nalua e
Khamkha'n ka veiloh ding bang e
Ni khat khamkha a k'ong phamleh
Nuachiang ham bang na vai lou aw
Ka von in lungngaih ngilhta chi'n
Nunnuam in zin bang hon kha aw

 

 

Lunglau ve'ng e ||

Tem bang deih toh tui bang ton ding
Chi a nunnuam ka heilai in
Ziin in lung in a thiik hiam aw
Kal simthu khau bang hong nok e
Simthu khau bang nok pallah in
Deihbel taan in luankhi nuul ve'ng

Nunkhua nuam a sawl bang hei ding
Ziin in pal bang a nang hiam aw
Ka suihlung doh-ai a khim hiam
Simthupha'n ka luangzou lou e
Ka suihlung sok bang mawkzou e
Ngaih in lentual ei kheta e

Ka suihlung mawl, ka tongsia loh
Tang in sul ah leh nuam ing e
Ka suihlung mawl tomkal sung in
An bang itpen meldeih heisa
Melmak lanu tangzouta e
Luankhi'n mal bang koulahta e

Lanu' vaang lou bang tulpih in
Lamkhuang bang ka khuulzaw ding hiam
Singdang siang a laitual leng in
Paal dang ang ah ka zaalzaw diam
Simlei singta zatamlai ah
Sinlai luun dang a paal ding hiam

A mi singta zatamte aw
Tem bang deihpen tong sangte aw
Kal simthu mei bang a ziing zong
Tongnem in sum bang kibia un
Tem bang deihpen puan bang taan zaw
A nalua e khamkha hi e

Khamkha'n suihlung mawksak sawn e
Gua bang hin ding zaitha neem e
Sunchin-zanchin lengvan tualnuam
Lungngaih omlouhna hon donsak
Ni khat nuaiziin doh-ai' khim a
Simlei khen ding lunglau ve'ng e

 

 

Itna ||

Itna piang thei a
Itna si thei hiam?
Itna khang thei a
Itna kiam thei hiam?
Itna paak thei a
Itna vul thei hiam?
Tuni'n itpen i chi a,
Zingchia'n huatpen i chi a!
Bang in itna piangsak a
Bang in itna sisak hiam?
Bang in itna khangsak a
Bang in itna kiamsak hiam?
Bang in itna paaksak a
Bang in itna vulsak hiam?
Itna'n ngaidam gige zou lou hia?
Itna'n maisak gige zou lou hia?
Itna'n dohzou gige lou hia?
Itna kiniamkhiat gige zou lou hia?
Itna lungduai gige zou lou hia?
Banghang a kiamsak pahpah?
Banghang a vulsak pahpah?
Banghang a sisak pahpah?
A kiam thei lou,
A vul thei lou,
A si thei lou,
Om mah ve'n chia!
Ngaihdamna, maisakna,
Dohzohna, ngakzohna,
Lungduaina, niamkhiatna,
Tuate' gaal ah om!
A galkai zoute'n ngah!
A galkai zou loute a zaw
A kiam ding mah,
A vul ding mah,
A si ding mah hi.
I piak zahzah ngah hi lel hang!

....khawng chi peuhset...

 

 

Biakinn' ngetna ||

Khristmas kuan
Phalbi suukpilai a
Nitak khat
Kongzing a ka vaakleh
Biakinn kilawmtak a zep ka mu.
Ze tuamtuam a vaak,
Suktai, toutai,
Ze tuamtuam a gial,
Dungkham, vaikham,
Kelkong tan a kichingtak a zep.
'Kilawmna e,' chikawm a
Peel dia ka kisakleh,
'Khawldih! Khawldih!'
Hon chi somsom ka za a,
Dinkhawl a ka nungheileh
Kuamah ka mu kei.
Kal ka suannawnleh,
'Kei ka hi, Biakinn ka hi,'
A hon chinawn a,
Ka ettouhleh 
Singlamteh a hon vaan a,
'Kongzing tawpna ah
Meithai genthei khat a khosa.
A thuum ka za,
Zaan tampi a thuumna.
Bangmah dang a ngen kei,
Sum leh pai, neih leh lam,
Hiai thil khat kia a ngen-
A tanu a ding puanlum gina!
A thumna za ding hiai veng ah
Kuamah dang a om kei.
Kei kia'n ka za a,
Ka bil a dimta!
Hehpih in hiai ka kizepnate suut inla,
Tua naupang va tuamlum dih ve,'
A hon chi hi.
'Ah, kei mikhual lengla maimai,
Hiai thil ah kigolh kei leng.
Bilngong vek sam kei un teh,
Mitdel vek sam kei un teh,
Koikil hiam ah a thuum za ding
Khat beek omsam ve'n chia!
Koikil hiam ah a taaksap mu ding
Khat beek omsam ve'n chia!
Na ngak hen, thuumlai hen,'
Chia dawng in
Kisiamtan ngel lou napi in
Biakinn kiningchingtak a tuam a
A unau tasam maihkha
Tua veng ka nusia hi.
Himahleh tuni'n ka kha a muang,
Tua meithainu zantam a thuumna
Nang na zaak taak ziak in!

 

 

Khanlohna ||

Khenchia lah zalmang himai hen la
Kikhanglou taleh chih lunggulh,
Khenchia lah a tak himai hen la
Kikhanglou ngei kei leh chih lunggulh,
Bang a chia hiai hinkhua a haksat chia
Khanloh chih om thei lou ahia?
Bang a chia zalmang a noplaitak a
A tak hong himai thei lou a hia?
Nuam taleh, haksa taleh,
Eimah hinkhua chiat kihin ding,
Pha taleh, se taleh,
Eimah zalmang chiat kimat ding,
Michih khanloh nawnlouhna a i ihmut masiah!
Hinkhua leh zalmang a bei masiah!

 

 

Khitui ||

Khitui! Lungzuan khitui!
Zankhang in na hong luang a,
Sunkim in na hong luang a,
Ka lut theihlouh itna pakhuan
Galdot a lungzuan ka sial chiang in.
Hinkhua a pan kithalawpna na luanmang a,
Lakmai a pan nuihna na taimang a,
Kithalawpna leh nuihna om lou hiai hinkhua,
Kua a hing ngap nawn mahmah dia!
Khitui! Lungzuan khitui!
Nisuah in na hong luang a,
Nitum in na hong luang a,
Ka lut theihlouh itna pakhuan
Galdot a lungzuan ka sial chiang in.
Khente'n itna ah kipahna a mu ua,
Khente'n itna ah khitui a mu ua,
Khente'n itna ah sihna a mu ua,
A'ihleh itna a khitui i muhleh
Ba khasia a phun i hia?
Sihna mu dia seh hi leng leng
Bang phun theihna i nei a?
Khitui! Lungzuan khitui!
Zing in hong luang inla,
Zan in hong luang inla,
Sihna'n a naak a huk mateng
Hiai mitte ah hong luang zel in!

 

 

 

Ngolvei ||

Zungolvei' kiang ah,
'Ba na zu it na hia?'
'Na hinkhua suse gawp hi lou hiam?'
Ka chi a,
Khamtheih goih mi' kiang ah,
'Ba na khamtheih tawpsan lou na hia?'
'Hinkho manpha na deih ka hia?'
Ka chi a,
Sum a kimawl mi' kiang ah,
'Ba na kimawlna nuse lou?'
'Na innkuante na khual kei a hia?'
Ka chi a,
Khen chia'n i hinkhua hon susia thilte
I khahkhe ngam kei kha naak!
I hinna a sesak deuhdeuh ua,
I lenkip deuhdeuh.
Ka hinna zawngkhalsak hiai itna,
Zungolvei in zu a it bang in ka it hi!

 

 

Koizaw gikzaw hiam ||

Suihlungzuan leh omlai vei aw
Koizaw puaksing bang gikzaw hiam aw
Koizaw'n duangtham a zenzaw hiam aw
Sinlai khau bang hualhual ngawn ing e

Vualngaih vang a lungzuan khuam bang dou
Sakduang neem ve'n gawl bang puuk law'ng e
Solkha kimkhen luankhi toh ngaihsial
Tangliang khamkha'n ka pham ding bang e

Omlai vei a sakduang a vulleh
Vaimang banzal in let thei hi e
Vaimang banzal in a lehlah leh
Kha kia'n nuai simlei khenta ni e

Lohlah paal ngai a lung a zuanleh
Nuai simlei ah leh na'ng om lou e
Lungzuang a phamna lah om lou a
Luankhi toh kumvei ding neem ing e

Omlai vei a khakiak a omleh
Lungzuan khakiak zong omleh chi'ng e
Lungzuan lou bang lel a kha kia in
Simlei khosial mel in ma nuam ing

 

 

Thuaksak kei ni ||

Mi khat leh nih i kihuat man in
I nam thuaksak kei ni!
Mi khat leh nih i kideihsak man in
I nam thuaksak kei ni!
Sum leh pai i lunggulh man in
I nam thuaksak kei ni!
Hamphatna i lunggulh man in
I nam thuaksak kei ni!
I deihgawl man in
I nam thuaksak kei ni!
I duh-am man in
I nam thuaksak kei ni!
Thuneih i ut man in
I nam thuaksak kei ni!
I nam' thuakna i tate' thuakna!
I nam' siatna i tute' siatna!
I nam' puukna khangsawnte' puukna!
A pil leh pil loute'n leng thei hang,
A lamdanna zaw nasep ah ahi!

 

 

Ngilhta na hiam?

I kituahlai ua nuam i sakdan uh
Ngilhta na hiam?
Dialdial a i luanlai ua mi'n hon endan uh
Ngilhta na hiam?
I pankhawmlai ua mi'n hon zahtatdan uh
Ngilhta na hiam?
Thukhat a i luanlai ua ma i sawndan uh
Ngilhta na hiam?
Khekhat khai a kal i suanlai ua i hatdan uh
Ngilhta na hiam?
Takheh! chia hanlung i chiamlai uh
Ngilhta na hiam?
Kituahlouhna in a hon suksiatdan
Ngilhta na hiam?
Kisat-kivuakna nung a meimapawn' melsiatdan
Ngilhta na hiam?
Kikhen-kimak in supna a hon tutdan
Ngilhta na hiam?
Kikhin-kigal in a hon nenniamdan
Ngilhta na hiam?
Kituahna in hon domsang ding a,
Kikhenna in hon nengniam ding a,
Pha i sak bang in vaihawmta ni!

 

 

Chiah tonta ni e ||

Ka tuun aw tuun nunneem aw e
Kei ka lungzuan nalua hi e
Sunchin puaksing bang lel ta'ng e
Simlei gi bang khen nuam ta'ng e

Chiahta leng, tuun aw chiahta leng
Nuachiang ham bang na vai ding hiam
Chiaukuam leng bang na khuang ding hiam
Sinlai sok bang na mawk ding hiam

Kei ka lungzuan hon thei le chi'n
Lamkhuang bang hon khou ngam lou in
Ngaihsial a theuna lengvan ah
Zin bang n'on kha nuam ding hi e

Lungzuan ngilh di'n chiahta leng lah
Nuhtuun huai ding bansam ding a
Nuhtuun lelliang ding geelngam la'ng
Lungzuan a sial ding geelngam la'ng

Nuhtuun huai di'n khawllai leng lah
Suihlungzuan dai bang nawk ngam la'ng
Luankhi toh tui bang ton ngam la'ng
Ngaih teng galsial bang don ngam la'ng

Chiah tonta ni e nuhtuun aw
Simlei a zuang tuam om lou in
Khosial dai bang thenna lengvan
Tuun aw zuantonta ve ni e

 

 

Ka son momnou ||

Ka son momnou mel a deih aw
Tuunhuai-zuahuai a kil bang khang
Seisang na hong tang ding sa'ng e;
Ka ang ah na seilian ding sa'ng e.

Tuun-le-zua' suihlung mawl vang a
Sanggah na tan lai ah naa sa'ng!
Puvon in luankhi toh don ve'ng,
Tuun' anglum na ngai ding hi e.

Tuun' mel thei lou a kil bang khang
Son aw suihlung na zuang hiam aw!
Guallai sawl bang na heina ah
Ngaihsial sial bang a lian hiam aw!

Puvon toh lou khankhua zat ding
Son aw suihlung na khing hiam aw!
Mi a puvon chiat in huai dia
Nang huai ding koi a hei hiam aw!

Son aw gia bang hon zuun nuam ve'ng,
Hizong ma bang pat na'ng mai maw'ng.
Son aw haam bang hon huai nuam ve'ng,
Puvon chi'n n'on lou ngam diam aw!

Sian' huai in kil bang hong khang aw,
Tulsing nahluun bang hong pha aw.
Tuunnu lungmawl hon ngilh lou aw,
Puvon lungmawl hon chi lou aw!

~~~~~~~~~~~~~~~~~~~~~~

Search