DAINAWL A KEIPUANG MAN ZEIH MAI -Valte Ginkhenpau

Star InactiveStar InactiveStar InactiveStar InactiveStar Inactive
 

Singngat khua a ka innmun uh bel dainawl mahmah khat a om ahi. Singngat khua tawlam pek a om ahi a, Galleng Lui in Thadou Veng toh hon hal hi. A tamzawte theih dingdan in gen leng, Singngat Standard High School saklam deuh a om ahi a, SDO Office toh leng kigamla lawtel lou ahihman in Headquarters Veng in huamkha hi. Lamlian paidan apan gen ding hileh bel, Guite Road leh Tedim Road kikhenna bultak apan Tangpijol khua leh Behiang khua zotna lampi Tedim Road saulou zuihphei a, lamlian apan mualbou lianlou pang a kumsuk nawn ahi hi.

 

Ka innmun ua ka teen tuung lam bang ngial un ka inn uh toh kinai in midang kuamah a teeng om lou a, innveng chih ding ka nei mumal kei uhi. Kou om nung in Sir GM (Goumang) in lamlian bul a kou pialkhiakna kiangtak ah inn hong lam a, kinaih lawtel hi kholkei mahle ung agal ah kikou a kisap phakna ahihman in innveng nei khat ka suak uhi. Anunglam in bel awlawl in inn hong kilam toutou a, 1998 a ka pemkhiak tan un bel inn buk mahmah man hi. Ka om nawn louh nung uh kum sawm nung in Tangpijol ah ka va hohkha a, huai hun in lamlian in a totkhak ka Veng ua lamnawl khawngte in ana vang mahmah in ana taam lenglung hi. Ka teenlai hunte uh toh ka teh chiang in lunglenhuai bang ka sa hi. Nidang a huai lamlian dung a lawmte toh ka kizuihlai khawng uh ka phawkkik hial hi.

 

Ka huangsung uh lian huntawk thou a, ka unau teng un ka khousiang zelzel uhi. Ka pa’n inn mun ka neih tuung un singnou leh haichi tuamtuam tamkhop ana suan pah a, kei khotheih tan bang in bel theigah nek ding tamkhop om theita hi. Nahtang, hai, suaklu, lamkhuang, zawngtah, taat, singtheimi, theihe, lengthei, sapthei, chihte leh adangdang ka nei tiltel uhi. Nek ding huanhaigahte a om lam chiang in school a ka lawmte uh hong hoh kithalawp deuh un ka thei hi. Akhenchiang bang in school naupangte’n ka haigahte uh, ka saptheigahte uh leh lengtheite khawng enlah in hong guksak zel uhi. Ka huandai pawlamte uh ahihleh gamlak ahi pah mai a, singlukham ding khawng poimoh hun in baihlamtak in va sat zual theih mai hi. Ka vasa mat masakpen ngei leng ka huandai pawlam uh gamla lawtel lou gamlak a ka mat ahi hi.

 

Huangvulh ganta ka nei zek ua, ak bang a hunkhop ka nei uhi. Sehal khawng a tam a, nitak chiang in, agal lam a hamte kia gentaklouh kou inn apan gamla lou chikchik khawng ah leng hong ham zel sek uhi. Ka huandai zuul ua sazawi ngiltaktak omte leh ka thaang kamte khawng uh tutan in leng ka mitkha in ka mu theilai hi. Kou kia in huchibang mun ah ka khosa ua, a nopnatak khat om hi. Bazar Veng dung a gari leh khopi husa chihte ban ah niteng phial a zukham-ankham a kikou a kisual ging lomlomte leh heipi leh singkhuah tawi a kidelhtuah hehute thawmging lauhuai kizapha lou hi. Migiloute sang in gamsa giloute hong paikhak ding kilau zaw hi.

 

Sehal in ka akte uh hong laaksak zelzel a, ka nungdelh tonton hun uh bang leng om hi. Ka theih gige khat tuh, ka aktal uh let-a-lian leh hoih petmah a hoih maimah khat, sehal in hong la hi. A thawmging ka zaktak un kikou vengvung kawm in akgil lam ka va delh uhi. Ana tuahna sulnung muh theih ding a akmul om ningneng ahihman in kikou loiloi kawm in ka ute’n a nungdelh uhi. Saulou a delh nung un ka aktal uh pheipi langkhat hiam chauh mukik zou lel uh hi in ka thei hi. Huai a pheipi khat lel bangle meh khop phathei chihdan hi in ka thei.

 

Genlai zualle. Ka kho lui uh Aibulon apan ka pa’ pianpih ka nite a hong pem tuung un ka huangsung uah inn ka bawlsak ua, huai ah teeng uhi. A kum chet zawle ka thei nawn chet kei a, himahleh 1980 beikuan or 1990 bullam tuh hi peuhmah ding in ka um hi. Huai hunlai in ka akte uh lak ah aktal san khat gitlouh toh hansan petmah thuah om hiven. Khatvei, daileng ding a ka ni’ tate lak a nautum Suankhanlian a paileh ka aktal hangsan pen un ana delh. Chihleh amah leng lau lua inchin tai toh kah thuah. Amah bang huailai a a pau mawl sim tahtah zawmah inchin, a khonung a i gensakleh ngaihnophuai leh nuihzathuaipi suak. Huai thu ka theih gige kholoh hi.

 

Khonawl a khosa a om ka hihman un, kou aa ding in sehal leh gamsate apan kivenna hoihpen khat tuh huandai zuul teng a thaang kam ahimai hi. Thaang ka kam ngei uhi. Tumlam pang a om ka kelkong pam deuh ua sehal zawi hi ding a ka gintak uh khat ah leng, lamen ngelloupi in thaang khat ka ute’n kam uhi. Ka ute’n huai muntak pen palan lua leh koute ban a hong hohte kiviallehna mun kiang zek ahihman in sehal hi in ak laak sawm gamsa khatpeuh hitaleh huai zawi tawn a hong mawk pai ngam nawn ding in gingta lou uhi. Huaiziak mah in huai mun a thaang kikam pen uh ka vil ngei kei uhi.

 

Sawtpi ka vil louh nung un khatvei, ka ute lak a kua pen hiam in huai thaang a zohngeu dandeuh banghiam awk om hileh kilawm chih hon theikhia hi. Huchi in, ka ute’n kintak in va enchian pah uhi. Sehal leh sangak i chihte hilou deuh ahihman in ka ute’n bang sa hi peuhmah ding hiam chih ngaihtuah nilouh uhi. Anunglam a ka pate gendan hiam hi in ka thei a, huai thaang a awk gamsa tuh keipuang ana hi hi. Keipuang kichi tuh, kei theihdan in, eilak a zohngeu lian huntawkte sang a lianzaw deuh ganhing ahi. Zohngeu zaat khat tuh ahi peuhmah a, gialbem bang sim in a gial pai hilhial om hi. Huai thaang pentak kivil ngeilou chih mahtak ana awkna sawt simta ahi ngei ding a, ka theihkhiaktak un ana nam man hial hi.

 

Hiai keipuang ka mat malam uh hia ahihkeileh anunglam chih ka thei zou nawn kei. Khatvei mah lah inn pamlam deuh a ka ute thaang kam khat ah let petmah a lian ui khat ana awk hi. Ka naupan deuhlai ziak in ka thei sau chet kei a, himahleh ka ute gendan leh tuma zek a ka unu’ hon hilh thakna apan ka theihdan in huai ui pen lian in thau petmah hi. Huailai khawng a sa lah huchitel a kiduh ngellou ana hi ding inchin, a sungkua khawngte paih in a taksa hoihna lailai tamlou atkhia in khindang ah kihou hi. Hong hohkhate a duh peuhmah in huai khindang a uisa hou tuh a duh dandan un lakhia in kinek lelmai uh chihdan ahi. Tuni tan huai ui pen kuate ui hi ding hiam chih ka theikhe zou kei ua, zonkhiak nawn leng ka sawm tuankei.

 

Abang abang hitaleh, inn kiang a dainawl naichik a keipuang khat thaang a man tuh ana kihi mawkdan eive!

 

 

©Valte Ginkhenpau, 2019

Search