Russia Kumpi Inkuan THE LAST DAY OF ROMANOV Inkuan Hamsedawng

Star InactiveStar InactiveStar InactiveStar InactiveStar Inactive
 

Bolshevik helpawl makaitute laka khat in, "I Kumpite uh tunga I thilhih uh khawvelin a theikhe zou ngeikei ding," ana chih bang ngei in a Kumpi nanung pen uh, Tsar Nicholas-II leh a inkuan a zi leh tate tunga thiltung mulkimhuai tak tuh bangchi bang thil chiah ahia chih tuh kum 70 val sung ving veng kuaman ana theikhe zou kei ngei ngut uh ahi. Himahleh, hiai thil kiselgu tuh mikhat in adamlai ngeia khovel theih dia phoukhiak ngei ngei tum in abei a, a lawhching zou takpi na diam maw I na en di uh?

 

Kum 1918, July ni 16 zanin tuh Russia gam lian leh zau tak maia vaihawmtu Tzar (King) Nicholas-II leh a zi, Tzarina (Queen) Alexandra te tuh a tutkhomna pindan sung uh kikhelah takin khut kilena kizut kom hiau hiau in ading khom ua, huchia mangpha a kikhak tuah nung un tuh amau lupna pindan lam tuak zuanin a kikhen ta uhi.

 

Tuazan tuh Bolshevik helpawl telawi in a Kumpi uh a paihkhiakma uh kum 1 leh kha 4 vel hunlai tuh ahi a. Kumpi inkuante tuh mat ahih nung ua a tanchin uh paitou zel tuh iim ahih bikbek ziakin a sulnung uh theihzui theih ding avang in atawm mah mah mai hi.

 

Tuabanga mat ahih nung zek un Rusian Emperor Nicholas-II leh a zi bana a tate 5 tuh aguk thei bang pen in Siberia khokhanglam tawp lama om khopi khat Yekaterinburg kichihna muna engineer pension ta khat Inn tuh luah sakin aom ua, huai ah tuh hiai Communist hel telawi in tuh akhum bichilh ta lenlun mai uh a. Hiai inn tuh basement toh goma sawng thum pha hiin, a tungnung pen ah tuh Kumpite inkuan tuh khauh taka venbitna nuaiah koih in aom uh a. Hiai inn tuh singphel sang tak tak te zanga um kimvel suak vek ahi a, kongkhak teng ah communist helte tuh thau toh ding thipthep mai uh a. Tuamun ah tuh amau inkuan member mi 7 ten tuh a maban uh mialtak mai tuh angak ta dimdiam mai uh ahi.

 

Khua avak hun ding naita chiin tuh Kumpipa leh a inkuante vengtu te laka a heutu lianpen uh, Yakov Yurovsky, tumalam hun paisa hunte a Sana bawla nek zong sek, tua communist helte laka tallang tak mai leh hihna poimawh huntok tak len lel in tuh insawng nuailam a kumkhe suk ding in a kaithou ta phut mai a. Amun di leng gen tuan selou in mundang ah a kisuan dek uh chihchiang kia in agen a. Insawng nuaipen a munawng letna laia ana ngak tadih ding in a theihsak zui zom ta ngal hi.

 

Commander thupiak bang in Nicholas leh a zi leh tate tuh innuailam zuan in ahong kumsuk diam diam ua. Kumpipa'n tuh a tapa kum 13 mi Alexei hawmthoh tak mai a pawmin ma a kai a, a nungah a zi leh a tanu 4 ten tuh azui uhi. A tanute tuh a upat dan uh dungzui in - Olga, Tatiana, Maria and Anastasia te hi ua, kum 17 leh 22 kikal a upa ahi uh a. Amaute nungah tuh a family doctor bik uh leh a suakte uh mi 3 ten leng azui sam uhi.

 

Commander Yurovsky in a sepaihte laka khat tuh tua inn kongtual a truck kikoih tuh suhing (start) ding in thu apia a. Cammander pa sepaihte tuh ama kimah ading thepthup uh a. Commander in tuh tua hunma dakkal khat paikhin ta zeka Moscow khopia Communist heutu lian te’n Kumpipa leh a inkuante omdan ding thupiak laia kigelh athot uh tuh ahon sim kheta a. Gari gin a bengseng ziakin kuaman bang thu ahia agen chih him him athei theikei uh a. Huchih laitakin Kumpipa Nicholas in tuh, "Bang thil ahia?" ana chi a.

 

Commander in tuh heh takmai in, "Bang thil e na chilai a maw?" chiin khauh khedeuh maia vin zui kong kom in a Pistol dokkhe zok in a mazon a ding, Kumpipa tuh mun leh mun kimaituah chihtheih phial in a kapta phut mai a. Tuaphet phet in a bula ding vengtu dang 11 ten tuh bang zula ding lauthong taka ding dinden, Kumpinu Alexandria leh a tate tuh dawpna leh lainatna om hetlou in a kap zuita zawt zawt mai uh a. Naa thuak a kikou leh mau husa ging tual tual thawm ten tuh tualai mun atuam adim ta a, Kumpi tanu ten tuh beidong mangbang leh mittui pawt zawih zawih koma hehpihna angen lawm lawm na ua a phatuam kei. Amau vengtu ten tuh zahngaihna tel hetlou in a kap zui zel zaw uh a. Numei ten tuh tuanglaia naa tuhak kom kom in amai uh a khut un ahum timtem ua. Kumpipa tapa Alexei ngei leng nathuak kom in tuanglai ah kithalsa in alum a, tuabanga om Commander Yakov in amuh in a Pistol in Nih vei akap behlap non a. A sisiangta chih atheih in a kiheisan panta chauh ahi.

 

A kap nasat tuk un Kumpi tanute tuh a si ta mai kei hial uh chih Commander in a muh in mak asa in lamdang asa mah mah hi. Tuabanga a kikap huan ek lai un thautang tuh a taksa sung ua lutlou in a leng kawi zel a, tua thautang leng kawi ten tuh aomna tung uh leh kimleh kiang vel tuh a theuh paat nengnung mai chih athei a. A tawpa asan leh aziak ahon theih un, numei ten tuh a taksa tung uah suangmantam chituam tuam pound 18 vel chiata gik tuh a puannak malam kal ua kizep a kikhui khom ana silh uh ahihdan ahon musuah ta ua. Tua suangmantam ten tuh thautang te ana dang teu zel uh ana hi a. Huaiin tuh tawp leh chiila sihna ding tuh bangtan hiam tan ana humbit nilouh ana hi a........

 

 

 

                                                                                               Russian Kumpi Inkuan

                                                                                         THE LAST DAY OF ROMANOV

                                                                                              Inkuan Hamsedawng

 

 

 

                                                                                                     EPISODE - 2

Huchia, Minute 20 vel ding kong mah mah nasa taka theihtawpa a soisak ek nung un tualai mun leh tuanglai vel tuh sisan ngen in a pum dim ahi pen mai a. Luang 11 tak vengtu sepaih ten tuh lupna khuhna in atuam uh a, tuamun apana suankhia a anawn khiak lai un tuh a tanute laka khat in akhut in amai ahum in a khuh bawl chih amuthei uh a, midang ten leng nathuak in a tangthei lai uh chih amu behlap lai uh a. Sepaih ten tuh a thau uh la zok in numeite mai ah a thau sialphei un dawp chih omselou in asu ta phok phok mai uh a. A si chiang mah mah ta uh achihtan dong un atung uah akhut uh akha zui ta uh ahi. A lak ua nungak khat ngial in tuh sepaih ten akap lai ua a Ui lem apawm kha ana pawm tel den lai hi. 

 

Zing dak 3 vel ahong gin in tua sepaih truck in misi luangte puain tua khopi khanglam sing mun lam zuan in a kikhin kheta luah luah mai a. Commander Yukov leh a heuten luangte tuh aguk thei bang pena koih hoih leh phum mang meng atuppi pen uh ahi.

 

KUM 14 NUNG IN:

Hiai thiltung nung kum 14 hong bei a apailiam meuh in tuh Moscow khopi ah Gely Ryabov achih mai uh Red Army officer tapa hiding in ahong piang a. A hong khanlet touh laia a tangthu theih minthang tak mai tuh a Kumpi uh, Nicholas tuh Kumpi  gilou leh huham mi thah mai mai leng poi salou ahihziakin Communist helten man in, a damlaia mi tunga a hih sek bang ngei in mulkimhuai taka thah in aom samta ahi, chih thu ahi. 

 

Ryabov in Moscow khopi a dan zilna school (Law Institute) a pana a graduate nung in Interior Ministry nuaiah Investigator (sulnung suui mi) Nna amu ta a. Himahleh, hiai a Nna muh sawt semlou in a tawpsan a, Television lama khahkhiak ding tangthu gelh leh short play gelh lamah a kizang ta zaw a. Hiai a Nna tuh nekzonna ding in hun sawt tak asem zuita hi.

 

Kum 1967 ahong kiheksuah in Communist solkar in Russia gam vaihawmna akhut ua alak nung kum 50 chinna champha thupi takin alawm uh a. Tanchin agelhna uah kum 300 val mah mah Romanov sungkuan ten Lalna atang dan uh leh Communist telawi in Lal tutphah apan a paihkhiak dan uh article ngaihnawp tak mai tuh Ryabov in asim a. A article sim in tuh a lungsim sunggil bangchi hiam khat in aman tang den ta mah mah tinten a. A thugelh sim — "Hiai Khovel ah tuh Nu leh Pa aom uh a, a iit leh hawmthoh mah mah uh a tate uh toh. Himahleh, ganhing bang maia gawh leh suklup ahita mai uh a," chih kigelh na lai tak in tuh a zou thazoh ta mah mah mai a. Tua thu a lungsim ah athamden ta mai a, ngaihtuah zui nonlouh atup chiang in leng akoihmang thei non ta ngal kei.

 

TUPNA NASA:

A lungsltang khauh sak tei tei in a nasep ngei mah phatuamngai takin asem tou non ta zel a. TV lama film Script a gelh leh a Comment bawl te tuh Russia gamsung na nana ah phat leh hoih sak alawh mah mah a. Hiai ziakin a solkar ua mipoimawh chinte chiang in tuh amah leng a thei minthang mah mah ngeimai uh ahi. A bik takin a solkar ua Interior Minister hilai, General Nikolai Shchelokov ngei toh leng a mimal takin a ki meltheih phah uh a. Huchih laia Communist General Secretary leh Russia gam makaitu pipen, Leonid Brezhnev leh General tuh a ki meltheih mai kia uh hilou in, Central Politburo member ahi zomah lai son son ua.

 

A TUPNA GAM ZUAN IN:

Kum 1976 August kha ahong kiheksuah in banghiam chi tak khata banghiam khat hih tum in Ryabov in a Kumpipa uh leh a zi leh tate akhum bingna uh leh a thahna khua uh, Yekaterinburg (tuin ahihleh Sverdlovsk achita uh) lama zin a, a film khat tualsung sepaihte ana kidin touh dan leh maa asawn dan uh tuh tualai bial a mite ana et theih tei na ding a TV Documentary a bawl a tum a. A kipatkhiak ma in Interior minister Shchelokov in a Office a mu ding in asam phut mai a. General pan tua a film bawl tungtang toh kisai in hun sawt vaklou sung a sermon khum cheuh a. Ryabov in pai tuma a ding tak chiang in General pan a awki khek in, "A sawt law nai kei, kenleng I Kumpipa te a thahna mun uh, Ipatiev Inn tuh ka va tuanta aka, hiai tungtang hih thil ngaihnawp tak aching ahi ve," achi khe ta phut mai a.

 

General in ‘ngaihnawp’ a chih paukam in tuh Ryabov lungsim a luah den mai a, huan  ‘poimawh tawpkhok’ chihna hi dan in ala a. General in "Na va pai ding a, Kumpipa leh a zi leh tate a thahna mun uh hi a agen uh, Innuai pindan hawm tuh....." achi zui tuan son son lai a. Tuani in ngentel takin tua mun tanchin tuh a kihilh ta uh a. Tua ni zingchiang in Sverdlovsk hoh ding in ni 2 sung ngat Rel a tuang in azuan ta a, Rel a tuan laiin General in abik cheuh dan kha a ngaihtuah kik neuh neuh a, mak asa in lamdang asa tawp theikei hi.

 

HEHPIHNA OMLOUHNA INN MULKIMHUAI:

Ryabov heua Kumpi inkuante a thahna mun uh, Ipatiev House achi uh a va sik nizing in tuh khua a lumin a hihehu mai a. Tua Inn tuh tua khopi a Municipal Corporation a Education Department ten enkawl in, Sinsaktu Training Centre bangtuk ngei dinga ana zattak uh tuh ana hi a. Ryabov in tua Inn ava sika ava tawt takah tuh a Staff te uh ngei leng ana kivontawi in ana phur mah mah uh a staff te laka khat in fel tak mai in ana kawkmuh zazat zel a. Sing tuangpek tuh siang taka nawt siang ahi a, Inbang leh Ceiling te tuh alui tak ziakin rawng tamveipi tak nuh ahi ta chih a theih theih ngei mai a. Ryabov lungsim tuh tuabang thilte sangmah in tua muna thiltung mulkimhuai tak mai in aluah zaw tham a.

 

Kongkhakpi te, tukvelh te leh a khakna letna zawl te tuh nounel leh chilgil takin a enkual dian dian a. ‘Hiai Inn sunga thilom teng teng tuh Kumpipa leh a inkuan ten ana aleen un akhoih ta awm ngal ua,' achih lungsim neuh neuha, a etvel vel kom in a hunlai ding vel khong a mitkha in a mu chuai chuai a. Huchiin, a halhkhe suah phut a, a tatdan leh adak kual leh a omdan leh khosak dan leh a phoklouh kala aom dan teng teng tuh tualaia semten amuh un lamdang satak mai in ana en demduam uh chih atheih in azakata sim a, a san ta tuai tuai a. A lungsim sunggil tak a kipana hong suak hehpihna leh lainatna lamdang leh mak tak mai in tuh Kumpi inkuante thuakna mulkimhuai tak va mupha leh va theihsiam pih in, a lainat in aneh anou mah mah mai a. A lu bang a aam chuai chuai hial hiin athei a. A pu General in hiai thil tuh thei tei ngei ding in adeih a, va hoih tei sam ngei leh chih ana deihsakna san a theikhe suah hiai hiai hiin a kingai a.  

 

Ryabov ngaihdan in a Kumpite uh tuh a lainatom uh hiam aw a gilou un a hiamgam uh hiam aw, hiai gama kum za tamtak Laltutphah a tua vaihawm ta ahi uh a, hiai banga Han mulmal natawm neiloua melmak singta gamlei a a guhkeu uh dalh mai ding tuh a lainatin, hoih asa theikei a. Aguhkeu sa te uh kaihkhom theih bang bang lakkhoma mulmal tak leh zahhuai zawa a Han di uh bawla sial non thak tuh Russia mipite’n a Kumpite uh laka abat uh hiin angai tinten a. Tuabanga hihding in a lungsim in thupukna abawl zui ta hial ahi.

 

THIL BAIHLAMLOU HIAL:

Kum 50 val paisa a thil khonung suikikna Nna va thakpat kik non ding tuh amah ading in thil baihlamlou hial ding abang mah mah. Abul vapatna laitak ding pen natawm theisiam theih mai zawk ding leng abang kei. Kumpi Inkuan thattu sepaihte lah chu theihkhiak a haksa ta un, atam zaw te lah a sihbei ta ngal ua. Soviet Russia thuguk poimawh pen a hih hial uh ziakin leh Kumpi Inkuan thattu sepaih heutu pipen in leng, "Khovel in hiai thil tuh a theikhe suah zou non ngeikei ding," chi khopa ana gen leh a sulnung uh a iim tinten uh kha ahi ngei mai a. A lampi di abei mah mah mai ahi.

 

KOIAH AHIA?:

Sverdlovsk khopi sunga leilung/leitang tanchin theimi leh minthang pen pawl tuh thil omdan theipen dinga ngaiin Ryabov in huchiin akiang azuan ta top mai a. A Insung ava lut tandong in leng Kumpite inkuan a kaplupna Inn a alut laia aom dan bang deuh in aom lai a. Tuapa Alexander Avdonin tuh tua khopi history leh a gam aomdan, tuma leh tunung tanpha a theipen ahi ngei namah a. Ama ana ngaihdan in bel tualai kuam gamnuai kawtong gam dap ngot in hun leh tha ane tam lotel ding a. Tuasang in tuh Moscow khopia Communist Archive (record kep hoih na mun) zuana, lehkha lui leh record lui te dap masa ding in ana hasuan zaw a. A nasepna in a zil bok a, tuabang thil luite tuh Ryabov in muh theih mai ding Alexander in a gingtak pih zaw tinten a. 

 

GUHKEU ZONNA HAKSA TAKMAI:

Huchiin, Ryabov tuh phil takin Moscow lamah a kik non ta a. A tunphet in Interior Minister General Shchelokov mu in, amah tuh Lenin Library a Director kianga October kha a helna tungtang gelhna bangchi bang chi hitaleh zawn phalna gelh sak ding in a ngen ta a. Tua lehkha ah tuh a poimawh teng teng dap theihna order tuh a neifel ta diam ngal a.

 

Ryabov in tua khasung pumpi tuh lehkhabu leh report za tamtak simna hun ding in azang a. Kumpi Inkuan tanchin te, Secret Police te chetdan te, a ginlelh te uh adap dan uh leh thutheitute kampaute leh Police leh solkar thuguk tamtak, poimawh dan chituam tuam nei te asim nung in tuh a poimawh bik takmai a chiamtehna uh "O O" (double zero or Top Secret) kichi tuh a thaipawt ta nawlh mai ahi.

 

Huchiin, report chituam tuam te tuh kaikhom in a tangpi sutuah in ahon lemkhom sin a. Kumpipa leh a zi leh tate athah chimih dan uh kha a mulkimhuai bang bok in aphumna mun uh leh a Han uh ngei leng a mulkimhuai lua hiin Ryabov in tuh a ngai a. A thattu te laka heutu pipen, Yurovsky in tuh amasapen/achil pen pen in misi luangte tuh suang kuangthei laihsuahna khuk lui ah akoih ta hial ngei a, himahleh agim ahong namsiat tak ziak in phum hoih thak na ding dang adam non ta ahi.

 

Thu masa lamah kik thak non zual talehang — huchia misi luang pua Truck a taikhiak in khopi laigil a kipana Km 15 vel a tung uh chih in gari tuh dawplak (dawplak khong chisuk maini ka chiang kei) ah a tang ta mai a. Tai ngaihna aom non taklou chiang in Commander in luangte tuh lamkhang (hiai le ka sure kei a loupa vom chiin gen mai ni) loupa vom/leivom te laka phum mai agel ta a. Mi'n amuhkhiak suah khak zen zen ding uh khualna in, kuate ahi ua chih a theihkhiak theihlouna ding in amai teng teng uh Rifle bula thihkhiak zawhloih ding khopa suse ding in thu ape zui lai a. Tualai muna phum mang ta dinga kisa a leisai avuk khum ma un a taksa uh amuat mang baih theihna ding in chiin Sulphuric Acid abuak vek zawmah lai uh a. Tuabanga deihtoka a soisak khit ek nung un abul nai ua om lemtang, Rail lampih phahna dinga azat uh singtum lui lian tak mai in a phumna lai mun uh tuh a delh den sak ta a.

 

Hiai lai muna a luang uh aphum fel khit nung zek un Kumpi lama pang sepaih ten tuh hiai lai khopi tuh ahon lasuk ta uh a.   Kumpi inkuante suulnung suui ding Team adin zui ta ngal ua. Ahon suui tak ngialna ua a Han mun ding ua awm leh kilawm him him azong muzou tuan ta bik kei uh ahi. A nung kum 60 aliam nung in leng Ryabov tak ngei leng tua a Kumpite uh Han mun in tuh a khem touta zel ahi. 

 

SEPAIH TANU :

Ryabov in Yekaterinburg khua a aom lai in Kumpi Inkuan thattu te laka a heutu pipen uh Yurovsky tanu tuh tunai in damin Leningrad khopi ah ateng lai chih athei khata ta zen zen a. Kum 1978 chil lamin hiai numei muding in Rel in akuan ta veng veng a. A kimuh chil un tuh Rima Yurovskaya in Ryabov a mu tuh a kipah mel mah mah a. Ahihhangin, apa thugen leh lehkha a kepbit vel a kipana Kumpi Inkuan sihna tungtang theinuam a hong pai ahi chih ahon theih nung in amul tuh avul ta geih mai a. "Ka Pa tuh athat ngei aka. Himahleh, kum tamtak a liam ta a bang achia a nidanglai thil na hichi ngaihven khonung?" achi ta bauh bauh mai a. Himahleh, mikhual laka hichia a vin tak val mai tuh a kisiamlouh thak sim deuh a. Atawp in, "Ka naupa'n banghiam na deih zong ding chi a thei kha maithei," achi thak non ta zaw a.

 

A zingchiang in Ryabov tuh Leningrad khopi mah a om thou Admiral retire ta Alexander Yakolevitch Yurovsky Inn nuam taka mai a tutkhomna pindan ah a tu lenlan mai a. Cinema Film a lang ding bang mai in amel atai in a kipak mah mah hiin athei a. Sawtlou chik a houlim khit un "Ka Pa'n ahon omlouh san dek song in hiai thil hih a lehkha dang te lakah akoih tel a," chikom in drawer tuh ahon hong a, a lehkha apiak kom in a Pa'n a thilhih uh tungtanga a report, Central Committee kianga a khak tak Carbon Copy lehkha rawng eng a gelh 4 tak a lekkhia a. Ryabov in asim suk zek na a himahleh, a khut ahong ling nasa lota mai a, deih bang in leng a sim hoih theikei ta hial a......

 

 

.

                                                                                                  Russian Kumpi Inkuan

                                                                                            THE LAST DAY OF ROMANOV

                                                                                                  Inkuan Hamsedawng

 

                                                                                                  EPISODE - 3

 

Tua laipek ah a Kumpipa uh a zi leh tate athahdan uh mulkimhuai takmai te, luang apuak khiak dan uh, han dai tak tak a phum aom ahihdan te uh, a vuina mun leh mual leh agam omdan, gam nawl gamdai deuh, chik hun laia leng hawng deuh gige, Sverlovsk khanglam Koptyaki singtang khua apana gamla lou chik, railway crossing 184 na lai vel chih te a tuang dimdiam a. Hiai laipek poimawh tak a nei thei tuh a kipak mah mah a. Himahleh, han zongkhe ding in ahihleh ava kuan zui ngal maikei a, a nasep ngeina film script gelh a sutzop san tadih phot a.

 

SIHNAIN THUK TAKIN A KHOIH:

A thil tuah leh theih ten tuh Ryabov lungtang leh ngaihtuahna thuk takin a luah ta a, a lungtang sunggil tuh temta a dawt bang maia naa hiin athei a. A suangtuahna mitkha ah Kumpipa leh a inkuante sih ma leh a nunglam hiawm tak tak te khong film bang mai in a kilangkhe duan duan den mai a. Kumpi tanute, nungak melhoih leh piannalh tak tak te hehpihna leh lainatna tel hetlou a thah ahih dan te uh leh Kumpi tapatang neihsun, naupang nunnem tak khosakna beia kaplup ahih dan te a ngaihtuah zel a, a lungsim naa lotel chihngaihna theilou in tuh Moscow a biakin a va kikhawm in, khamuanna a zon phah ta hial ahi. Hiai in tuhun tanpha in sahkhua ngaihsakna lamah sau tak a hinkhua a makaih phah denta ngeimai ahi.

 

HAN KHA CHU AW! :

Tua kum nipi lai in Ryabov tuh Sverlovsk khopi ah a valut kiknon ta ngeimai a. Tua khua a Geologist khat, Alexander Avdonin toh Han mun diktak zong mu ngei ngei ding in abei zui ngal uh a. A chilin a gintak pen na lai uh, mawltual li zet taktheihna khopa lian gam awng zapi mun tuh ava dap sin masa pen uh a. Himahleh, Han mun gentaklouh, Rel lampia phah dinga zat singtum mel di takngial natawm leng amu zou kei uhi. Nna kul leh poimawh dang ziakin Ryabov tuh Moscow khopi lamah a kik non a. Han mun zonna tuh Alexander leh tualsung mi khenkhat khut ah a koih non tadih phot hi.

 

Ryabov omlouh kalin Alexander leh a lawmpan tuh asiam bang tok uh leh a hihtheih khom khom un Han mun zonna nasep asem uh a. Tuma kum 1920 vela lamlianpi metal louh leh a bula gam awngna lai te ah amit uh atusak ua, a hithei awm asakna uh leh a upmawhna munteng uh adap kual uh a, himahleh athil zong uh tuh "Meithai te laka Chil zon abang mai a," avang mah mah mai a. A denchiang in adang khat zaw pen tuh akiang nai ua singkung a kalin tualai gam mam pelpul mai tuh ahon gal e t ta veng veng mai a. A gam lah alian in azau tham ngal a, mun pong hiam leh mun kuak hiam Han mun hithei ding avang mah mah mai hi.

 

A beidawn leh singkunga ading na a khe a kham dek kuan lamin tualai gam kiphah mam phei ziai zuai ah kawngguh lui hingei ding a gintak huai tak mai tuh agal muta phut mai a. Kinawh leh manmawh pha deih maia kumsuk zuau zuau in tua athilmuh nalam zuan in atai veng veng a, aphul luat tel ziaka thudang leng gen hoihthei zezen lou in Rel lampi singpek tuh a dawmkhe ta luai luai mai a.

 

Tuaphet phet in Avdonin in Screwdriver zangin thuk deuh in tuamun tuh a dawt suk ta a. A tawp in tuh ana sak in ana tak tangei mai a. Rel lampi a singpek kiphahte sunkha ahih chiang mai, ginlel di vual ahi kei. Himahleh, amaugel kia in tua mun tuh akhuat kei ua. Moscow a om Ryabov tuh athilmuh uh tanchin ahilh ta ua. Aman tuh awingaih a muangchang theih chi hiin angai kei hi. Aziak tuh tua hunma zekin solkar thupiak in Ipatiev House, Kumpite inkuan a thahna Inn uh tuh Bulldozer zang in aphu dalh sak vek ta ua. Tuiin tuh mun awng ngeina mai mai ahi ta a. A thilmuh suah uh ngei leng solkar in atheih ngei ngei a ahihin tuh tuabang mah in ahon ahon hih kha ding uh chih alau a, a daih ua a iim uh tuh akul ahi. 

 

KUMPITE INKUAN GUHKEU: 

Kum 1979 May kha ahong hiin Ryabov leh Avdonin ten tuh a zite tuak uh banah lawm dang Nih tonpih in Suahdur leh vanzat poimawh dangte keng in siluangte aphumna mun uh hingei a atheih uh tuh ahon akhuat panta uhi. Rel lampi a phah bang singpek a kalhkhiat nung ua thuklou chih a khuat behsuk man zek uh chihin, luguh hingei ding uk vom deuh lampang leh lum sim hiawm tak tuh ahon sun khata uh a, alakua khat in, "Mihing luguh ahi chiang lotel" chikom in ahon lek khia a.

 

Phur deuh sim leh dawm kom kom in a khuat zom zel ua, sawtlou nung in tuh guh li  tak alaisuah ta ua. Huanah luguh 3 tak hawktui in a khoh kuak a kipan in a pholhkhe zui non ta ua. Luguh a lakkhiak masakpen uh tuh mi piching lu ahi a, a ha-ah suangmantam khong ana kivuah sepaih a, a Nihna pen ahihleh luguh lum deuh, numei tuaidawng lai deuh luguh hingei ding amu non uh a. A lu ah thautang lutna vang lian khollou leh apawt khiak non na vang lian deuh amu uh a. A thumna ding in naupang lam teirol lampang deuh luguh a mukhe non bok uh a. Hiai luguh te tuh a biang uh leh amai lam uh asia un a kibal thazawh mah mah a. A ziak tuh miten amuh khak zen zen ua lehleng a theihkhiak theihlouh ding in sepaih telawi in a suse ek uh ahi.

 

A dang zong beh non tuanlou in luguh thum a pholhkhiak nung un adeihkhop un a hunsak uh a, tuate tuh hoih taka tun in awla etchiang ding in, achi uh a. Hankhuk tuh a vuk kik non uh a, khosung lam manawh in akikta uh a. A zingchiang in Ryabov in tuailai deuh luguh hi a a theihte uh tuh Moscow lam zuan in Rel in a paipihta a. Kumpipa Nicholas luguh hi ngei dinga atheih pen uh ahihleh Avdonin in a kem ahi. 

 

HAKSATNA DANG:

Ryabov in Forensic lam siam doctor ten tua luguh te tuh a etchiang nung un a kum zah uh leh Pasal hia Numei chih a thei thei mai ding uh chih a theisa him mah ahi a. Himahleh, tuabang hih dinga achih khempeuh te lakah a lawhsam ta zel a. Atawp in Ministry khata ami muang deuh khat kiangah tua luguh neitu melput mel leh puam hithei dinga a gintak bang bawl khia a dinkhe suah ding in a ngen ta top mai a. Tuaphet in alawmpa'n tuh, "Hiai thil hih KGB te lawi in amuh ngei ngei ua ahihleh bel buaina lian tak na maituah ahimai. Luguh zong dinga na kuan dan teng teng leng athei vek uh ahi ve. Midang kuamah tualai mun a paia hoh ngam aom louh pi a. Hiai thil teng teng tuh manghilh vek zaw in chih ka hon vaikhah leh kon deihsak thuhilh theihna omsun tuh ahi, achih khum ta daih a.

 

Ryabov in tua thu azak in a lauthong guta sim mah mah mai a. Bangchi dana a thilhih leh sulnung vel te ana theih uh a tadia le? KGB ten atheih tak tak chiah a na di uam?

 

Tuanung a kipan in KGB te a lauhna tuh a daithei non ta hetkei mai a. Atawp lam ngial in tuh hihdan tuan didan a theihlouh ziakin ava lakna mun lama va koih kik non mai hoih zaw hiin a theita a, gukeu pua in ava pai kik non ta ngei mai a.

 

Zankhat tuh Avdonin toh Torchlight toi in tua gukeu te tuh kuang (hankuang) neuchik bawl in ava lakkhiakna mun ngei uah ava koihkik non ta ngeimai uh ahi. Kuang sungah Russian Orthodox Kross lem abelh ngei uh a. Tuabang a kuang neuchik koih lem tuma lei akhuat lai un luguh dang khat amuh khiak beh non ta uh a. Ngun taka a vel chet ualeh a ha lem kivuah dan apan in Kumpi sikha/suak luguh hingei ding in angai ua. Huanah, Kumpinu Czarina Alexandra luguh hingei ding a agintak uh leng amu tel zeu bok uh a. Himahleh, khoih lamdang louin leiin avuk ta zaw uh a. A vuk zou apai kom un Ryabov in tuh, "I thil muh leh theih te tuh I genkhiak ngei ngei ua ahihleh I damsunga I thugen tawpna pen pen ahi ngei ding," chiin agen ta mawlh mawlh mai a.

 

THIL KIKHEK LAMDANG:

Tua hun a kipana kum bangtan hiam a liam nung tandong in Ryabov in tuh bangmah ana genkhe kei a. Himahleh, a thil muhsuah un tuh a hinkhua ah bangchi dan hiam khata nawl/phut na nei hiin a thei a, tualam ah leng a lungsim akoih ngei mai a. A lawinu toh leng a kimilh louh lawh un a kikhen phah ta hial ngei mai uh a. Ahihhangin, vangphat huai tak maiin nuthawi melhoih tak khat atuak fun zen zen a, tuanu toh sawtlou nung in a kiteng ta ngei a. A sahkhua zuih uh leng ana kibat zawk mah toh. A zi thak tuh lungsim hangsan tak pumi ana hih son son zomah lai a, a kikawp lem zui viau ta ngei mai uh ahi.

 

A zi thak hangsanna leh ban ah Russia gam kivaihawm dan hong kikhek lamdang tou zel in tuh Ryabov leng Kumpi Inkuan te guhkeu toh kisaia tungtang ah hangsanna nasa tak ahon pe sam ta ngei mai a. Kum 1989 in Moscow a kipana suak Magazine khat ah nih vei tak Kumpi Inkuan te Han lui muhkhiak ahih thu leh dan ngeina banga vuai hoih thak akul thu te tuh asuah sak ta ngei mai a. Tua tuh lemtang a zang in Avdonin in leng Han laih hong phalna solkar lakah angen zui ta ngal a. Gintaklouh dan bang tak maiin solkar in tuh lem asakpih ta zen zen a. Kum 1991 July kha in tua Han mulmal lou takmai apan in Kumpi Romanov inkuan te leh a sikha te guhkeu te tuh lakkhiak ahong hita ngei mai ahi.

 

Guhkeu te a lakkhiak zoh ua kipan in misite tuh sihna naran hilou, mulkimhuai thei tawpa suklup ahih dan uh a phoulang chiang ta mah mah mai hi. Luguh ah tuh thautang lutna, bayonet lutna leh thau sialphei sukna/tauhna nung leh ma tam tak muhtheih ding in alang a. Han mawl chik a kipan in thautang 14 zet muhkhiak ahi a. Kumpi Inkuan ten a ha (teeth) uh a bawlna uh leh a chei na dinga azat sek uh, Suangmantam leh Platinum bangzah hiam muhkhiak tel ahi bok hi.

 

Death Squad heutupa, Commissar (Police Inspector chihna ahi pen mai ding) Yurovsky gintak louh deuh thil khat amuh suah uh tuh Sulphuric Acidin a taksa uh a suksiat viau ding a gingta a. Himahleh, huchi lotel in a taksa uh tuh a khoihse lotuan khol kei. Guhkeu amuhkhiak uh li te tuh DNA kibang nei ahi uh chih muhsuah ahi a, Kumpinu leh ata uh naupang pen DNA in tuh Britain Kumpi tapa Prince Phillip DNA piak toh a kimil diam chih a suichiang/proved lai uhi. Hiai thil om zia tak ahihleh Romanov sungkuante tuh Queen Victoria suan te vek ahi uh chih chiang takin a ensak ahi. Guhkeu te lakah tuh Kumpipa tapatang khat neihsun Alexei leh a tanu, a u amatung a chiah, Anastasia te guhkeu ahihleh muh tel ahi kei. Amaute thattupa Yurovsky gen bang in mite muhkhiak non ngeilouh dinga hal leh phum mang det ahita ua adiam? Ahihkaleh, gamdanga a hihna uh selsaka thot mang hita zaw uh hia?

 

Kumpi sungkuan in sihna mulkimhuai tak a thuakna uh Sverdlovsk khopi leng tuin tuh amin masa Yekatenrinburg chih mah putsak/puaksak ahi non ta a. I gentaksa bang in sihna mulkimhuai tak maituaha athuakna mun uh Ipatiev House achih leng nuaimang ahi ta hi. Tua mun ah tuh haksa leh gentheih atuahna uh etsakna dinga bawl Kross ahihleh tangkhat tak leng lungleng takin amahkia in ading ahi.

 

BIAKIN AH GUHKEU:

Huchiin, hun ahong paitou zel a, kum 1995 February 25 ni in Kumpite Nupa guhkeu leh a ta uh mi thum te guhkeute tuh ana sial masakna uh melmak gamlei apan in hoih tak leh zahna lianpi toh lakkhiak aom in, St.Petersburgs khopia St.Paul leh St.Peter Biakin ah khamuang taka tangtawna kholtawldam ta ding in sial ana hita uh ahi. Hiai mun te ah a pi leh pute uh leh amau suangtute ngei leng ana sial tasek uh ahi.

 

A guhkeu uh sialna leh lusunna kikhop tuh chitak taka lungsim teng teng toh hoihtak zeta zat zawh ahih nung in Russian numei khat, samkang vekta kum 63 mi di vel, amah ziaka tuabang thilte teng teng hong tun theihna, Commander Yurovsky tanu, Rima Yurovskaya in tuah guhkeu sialna mun nanung tuh va tawt tei atumguh tei mah mah mai a. "Han ah tuh khukdin in thumna ka nei dinga, atung ua ka Pa leh a lawmte thilhih mulkimhuai tawpkhok takmai ziaka a kha uh ngaihdamna nanung pen ngetsak in ka kun ding a, a khate uh hotdamna ding leh kei a ding in ka thum bok ding," achi a, tel tei atupguh luat tel ziakin tuamun ah tuh pitung in aom ahi. Chitak tak leh mittui luang zoih zoih in Kumpi leh a Inkuante Han  thak ah tuh Pathian hehpihna leh zahngaihna ngen in a kithum tei ta ahi.

 

                                                                                                           THE END ---- TAWPTA

 

Search