SAPHU BANG ANA KIMANKHA SAM HI’N MAW

Star InactiveStar InactiveStar InactiveStar InactiveStar Inactive
 

              SAPHU BANG ANA KIMANKHA SAM HI’N MAW

-Valte Ginkhenpau

Saphulip kichi na zakha ngei ding maw? Aman tam huntawk khat ahi. Bang bawlna ding a a kizat ziak a saphulip hichi mantam hiam chih bel ka thei kei; a kizatna leh a poimohna gendan tuamtuam bel ka zakha tham hi.

 

Mawltak a gen in, saphulip kichi tuh leilak a gamta leh leikawm a kua nei gamsa “saphu” kichi lip genna ahimai hi. Saphu tuh a sa bang leng kine hi. Bangteng hileh, saphu tanchin gelh sawm ka hi zenzen kei. Saphulip manphatdan leng gelh sawm ka hi tuankei. Saphu kichite ka na matkhak ngei teidan uh hon taklang nuam ka hi zaw hi.

 

Sunnunglam khat hi in ka thei. Ka inn ua ka omlai un ka uipi uh Johny in ka tumlam kelkong sak deuh ua gamlak ah banghiam bauh nilouh hi. Ka ngaihsak pah kei uhi. Johny in nakzawsem leh patau zawsem hileh kilawm in bauh ginging mai hi. A daih louh nilouhtak in ka ute’n leng va enkhia uhi. Enkhe di’a kelkong lam a zotlai un banghiam a luum vilvel, lian huntawk khat hong tuuksuk mu uhi. Ahuchih chiang in lamdangsa ua, kou khawng leng hon sam ua ka va en uhi. Gamsa ding a muangmoh napi in huchibang a kiziallum gamsa mukha ngei nailou ka hihman un lamdang ka sa diakkhol uhi. Kiziallum a ana om ahihman in bang gamsa pentak hi ding hiam chih ka thei zou kei uhi. Ka uipi un a bauhbauh nilouh ziak a lau a huai gamsa tuh ana kiziallum hihtuak hi.

Ka ute’n leng huai a thilmuh uh lamdangsa in, bang hi peuhmah ding hiam chih thei nuam in chiangkang peuh in dawt uhi. Kei bang neulai ka hihman in lauh sim toh muh nop ka thuah a, lau sim kawmpi in ka va en gakgak hi. Ka unau lak ua a upapen hiam in, “Saphu hi ding eive,” hon chikhe thei khong a, huai apan in saphu hi dingdan in ka koih chiat mai uhi. Huai ni a omkha kua teng ka hi ua chih leng ka thei vek nawn kei. Himahleh kou unau bangzahhiam toh ka u’ lawmte khat leh nih leng om hileh kilawm in ka mangtheih mialmial hi.

 

Ka mitkha ah tuni tan in huai saphu a kiziallumdan leh a hong kiphelkhiakdan khawngte ka mu thei lai hi. Himahleh kua pen in bang zang a that hiam chih bel ka theizui nawn tuankei. A lipte khawng ka va khoih lamtak uh ka thei hi. Tu khonung a ka unu hon hilhdan in, huai a lipte zuak ding ahihlam leng kithei lou in huansung ah kipaih a, sawtpi muatmang lou in om chi hi. Huai ka mat nung uh sawtlou in saphulip lasawn ut a mi hong pai om ahihdan leng hon khonung hilh hi. Hiai thil tunnung lam pek, chiklai hiam in ka ute’n saphu dang khat man nawn ua, huai pen bel mi khat in Rs. 60 hiam a leisak ahi chih leng ka unu mah in tunai in hon hilh hi. Ka neu deuhlai ziak ahi ngei ding a, huai thute ka thei nawn kei hi.

 

Nidang, ka naupanlai un singtang lam ah saphu beng a gamvak chih kigen bang zak in om zeuhzeuh hi. Tuchiang in bel saphu beng kichi a kiza tam nawn kei sim abang a hiven. Ka khonung theihdan in, Singngat khua ah saphulip lasawntu bang ana om ngei uh hihtuak hi. Ka theihkhelh keileh, gamlak a piang thil manphate lasawntu deuh a kigen tuh Singngat mahajon minthang phamsa Pu K. Vungluai leh a innkuante hi tangpi uhi. Tua hiai thu ka gelhlaitak in leng amau inn bang lamlian apan in ka mitkha in ka muthei hial hi. Tuchiang in hiaidan a lasawntu a omlai diam chih bel ka theizui nawn kei.

 

Saphu toh kisai ka na theih teidan tamlou gen thak zek zualle. Gamsa lianzawte’n saphu a nek sawm hiam ahihkeileh a thah sawm chiang un kintak in kiziallum vilvel a, a huchih chiang in a lip taak petmah a taak ahihman in bangmah in khoih thei lou in suakta thei zel hi. Huaiziak in, a lipte tuh saphu aa ding in a hinna humbit thei phaw bangbang ahi zong a chih theih hi.

 

Saphu mankhate lak a telpha tuh ka hi peuhmah mai a. A sa bang leng meh ngei ding ka hihman un ka nekkhak ngei zong ka gingta hi. Himahleh, a sa pen lim hia lim lou chihte ka theikhe zou vual nawn kei maimah hi!

 

Saphu bang ana kimankha sam hi’n maw. Hehe...

 

 

©Valte Ginkhenpau, 2019

Search