KA PA’N TEMPAWNG IN SAKHI MAN!

Star InactiveStar InactiveStar InactiveStar InactiveStar Inactive
 

                   KA PA’N TEMPAWNG IN SAKHI MAN!

-Valte Ginkhenpau

 

Singtangmite’n thaang hiam ahihkeileh thau toh gamsa tuamtuam a mat uh thil lamdang lua ahi kei. Singtang khosakna leh samat kichi a kizui ngitnget thil ahihman in. Himahleh, tempawng khat a sakhi mat chih mawk pen thilpiang mengmeng lou kia thamlouh, a om vaang mahmah thil ahihman in lamdang mahmah khat suak hi. Ka pa’n a tempawng kia toh sakhipi pum khat a hon mat zoh mawk pen a lamdang mahmah khat ahihban ah ka innkuan uh a ding biik in kisaktheihpih tham ching leh thukipahhuai ahi hi.

 

A kum chet bel thei nawn ke’ng. 1990 leh chihlai kum vel zaw hi peuhmah. Nitaklam khat, aisawk ding a kuankhia ka pa tuh sakhi pum khat toh inn hong tung lunglung mawk hi.

 

Ka huangsung uh leh ka inn uh luut theihna ding kelkong mun thum ah om hi. Khat pen ahihleh ka zat tangpi uh leh mite a hong pawt chiang ua a hong luutna tangpi uh ahi a, huai pen tumlam pang ah om in kelkong thum omte lak ah a lianpen hi. Simlam pang ah leng kelkong khat om a, huai pen ka biakinn kuanna lampi uh ahi. Adang khat pen ahihleh tui tawi leh school kuanna lampi a kizang ahi a, mallam pang ah om hi. Ka gam uh pen, Singngat SDO Office lam apat gen a Singngat Standard High School paina lamlian khoutung dung a om ahi. Mallam pang a luttouhna apan ka kongtual uh tuntouhna ding in lamlian khoubang ah mi khat tatzohna ding lel a lian lampi kawchiktak kibawl hi. Huai apan i kahtouh zoh chiang in ka huangsung uh, ken sim didiai ah paitouh nawn ngai hi. Anunglam in huai munkenna munlak ah ka nite inn ding kilamsak a, kivialleh theihna ding lampi lianlou alai ah kihawi hi. Amau mun dang a inn a luahkhiak nung un huai mun lak ah vokbuk kibawl in vok kikhoi a, kum 1997 leh 1998 sung a namkal buaina om tan in leng vok ka khoilai uhi.

 

Mallam apan i luut a huai a ken sim didiaina mun i pelhtouh chiang in taklam pang ah zawngtah kung liankhop ana pou a, a kim-le-kiang ah nahtang kung leh zawngtah kung dang khenkhat leng pou hi. Den a kigen zawngtah kung pen toh ka inn uh kikal ah munawng lianlou om a, ka kongtual uh a chih theih mai ding hi. Ka innbang ua kipan lam nih ding khawng lel a gamla ka kongtual uah kawlsing kung bul nih vel poukhawm om hi. Huai kawlsing kung apan tumlam pang lam li ding vel a gamla ah theimul kung leh hai kung pou om nawn hi. Tumlam kelkong apan i luutleh lampi nawl teng ah hai kung saang lawtel khollou bangzahhiam kivualsuk zingzeng a, ka kongtual tan uh kizomsuak zou phial in om suak hi. Huangsung teng ah bel haichi ban ah theikung leh singkung dangdang leng tamkhop pou om hi.

Ka pa tuh kipahmeltak mai in, sakhipi khat liangpuak volvol kawm in huai mallam a luut theihna om apan hong suakkhe tou thilthil hi. Kou unau lak a kua pen in ana mu masapen ka hi ua chih ka theikhe zou nawn kei. Huai sakhi ka muhtak un kipahna in ka pumdim ua, unau hunkhop ka hihman un a um kheukhou ding khop toh kidaih mi ka om pah uhi. Ka nu pen mehzuaktu khat ahihna ah a zuak ding gamsa hing muang khat a suak phot mai hi.

 

Ka pa’n huai sakhi bang hon chi mat hi peuhmah ding hiam chih kuapeuh theih nop ahita hi. Huchi in ka dong ua, amah leng a matkhakdan gen ding kilawp mahmah mai hi.

 

Amah hon gendan apan in huai sakhi tuh ka pa’n a tempawng a a satlup ana hi mawk hi. Tempawng a satlup theih hial ding a sakhi hai koilak a om hi ding ahia chih ngaihtuahna hon pe pah hi. Sakhi i chih gamsa lak a a tai hat mahmah ganggang pawl ahi a, a zuangang toh tempawng kia a mat zoh mawk vual ding hilou ahi chih mi tangpi koihdan leh theihdan ahi hi. Ahihleh, bangchidan a ka pa’n hon man zou mawk ahi ding?

 

Ka pa bel aisawk, gamvak leh sabet chihte a lunglutlamtak ahi. Huai ni in ka pa tuh aisawk kawm ding in gam va vakkhia hi. A hong kiklam a Galleng Lui a hong tuntak in sakhi khat khoubang ah ana kahtouh sawm in ana pheten hi. Himahleh kahtou zou lou in tolhkhe ding in kisa zel hi. Ahuchih chiang in ka pa’n lapphei man a, huaitak in a sakhi lau in a khunglam ah diangtou ek nawn zel hi. Huchia a hong buai nilouh chiang in, atawptawp in sakhi pen hong gimse gawp khong a, a kahtouhna ding lam en kawm zel leh ka pa lau kawm a en zel in ding hi. Ka pa’n a tempawng lakhia in va naih a, sakhi pen khoubang lam a kahtou ding a kisalai a zadang ah ban ek hi. Huchia a zadang a bansak ek chiang in, a thaguite bantan ahihman in, sakhi tuh paithei nawn lou in puk hi. Huai hunlemtang khahsuah lou in ka pa’n a tempawng mah zang in banlum hi.

 

Tempawng kia toh sakhi hinglai pum khat man zou mi tampi om lou ahihna ah kei mimaltak in ka pa ka kisaktheihpih mahmah mai hi. Vaang thu hithou mahleh, ka pa’n a damsung a mang ngei nawn lou ding thil khat semsuah chu ahi ka chi hi.

 

Tuni tan a tempawng toh awlsamtak a sakhi man zou ka theih omsun amah, ka pa, kia ahilai hi.

 

 

©Valte Ginkhenpau, 2019

Search