Lamka leh Music

User Rating: 0 / 5

Star InactiveStar InactiveStar InactiveStar InactiveStar Inactive
 

Lamka a Music Program i zat dan uh etthak tuak mahmah.

~ Ginza Vualzong.

Tunitak Hmuia Veng ah Mizoram lasa siam Kimkima in concert nei hi. Social Media ah video clips kimute tungtawn in lasate dia mun kibawl stage tung a mipi tampi kaltou in lasapa lem vakilak pih ahih kei leh va kawi gawp chih muh ding om hi. Ka thuzak dan in numei khat in Kimkima lasak lai va kawi a, ava kiss ziakin show a hunloutak a suktawp chih ahi.

Ahimhim thu in, stage a bangziak a mipi va kaltou sawm sese i hi ding uh aw? Stage tung va kaltou sese lou a le lasatu i ngaihnatna latsak theihlouh ahih diam? Stage tung va kal sese lou a music enjoy thei nailou i hi diam?

Stage tung a mipi a va kal chiang in, lasatu leh musiciante buaisak a, a lasak uh leh a music tum uh va subuai suak uhi. Huai ziakin concert/musical program himhim ah omzia neitak in mipi omna di leh lasate omna di (stage) tuamtuak a bawl ahi.

Sum tampi seng a lasasiam i chial ahi a, zahna i piak uh a poimoh ban ah, mipi in le sum tampi seng a ticket i lei ahih man in, lasa siamte'n siamthei pen ua ahon performed theihna ding ua, i sukbuailouh uh poimoh ahi.

Stage tung a pak va piak ahih kei leh sum va piak chihte thilhihthei kisakna i sa kha ding a, thil haihuai pi ahi. Stage tung a pak va piak ahih kei leh sum i va piak pen in lasate pakta ut hizaw lou a, ei leh ei va ki show off hi zaw daih ahi.

Lasa siamte pahtakna i piak ut leh stage a hong kum khit lam chiang in kimuhpih a siam i sak dan kam mahmah a va gen theih a, panpihna bang le va piak theih ahi. Tua banah panpih ut taktak i hih leh a music album a bawlte uh tampi leisak a, amau pahtawina social media khong ah bawlsak zaw leng amau a ding a phatuam zaw kha ding ahi.

Organizer ten le mipi stage tung a akaltheihlouhna dingin pan nasatak a lak uh poimoh mahmah ahi. A ziak mipi bel hong phur ding uh ahih a, zu kham toh bang lou teng kham ahih na ua, stage lam hon zuan tamkhop om di ahih manin, hiaite venna a security khauh mahmah poimoh ahi.

Music ngaina a, enjoy ut i hih leh stage tung va kal sese ngailou a enjoy dan i kizil uh poimoh mahmah ta ahi. A hoihlam ah khantouh sawmta ni e.

Search