MIZORAM PAITE TANCHIN | Dr. H. Thansanga Ex-Minister, Mizoram & Patron, MPCS

Star InactiveStar InactiveStar InactiveStar InactiveStar Inactive
 

                                                                                                                                                                                                                                    2007

                                                                                                                                                                 

 

THUMAPI:  

Mizoram Paite Cultural Society (MPCS) tuh March 4,1982-in kiphutkhia a, tukum 2007-in kum 25th ching ding hi. Silver Jubilee leh theihgigena program lopna patdek hita a, huan MPCS heutute’n tukum Mizoram Paite Union (MPU) General Assembly masapen leh MPCS Cultural Festival (Conference) Champhai ah neih sawm uh ahihmanin MPCS Souvenir bawlfel mandi in pan kila hi. Hun tomchik kineita ahihziak deihthusam taka bawllouh khakdi kilau a bawlfel man diin pan kila hi. Mizoram Paite tanchin, Mizoram alût ua pan hunlui tangthu gelhdia guat kahihna ah hun kinohtak kal a tangthu sui a gelhkhe ditdet dingin kei-le-kei kakisit sim a, laibu pumkhat ching theidi ken tomkim deuh a kagelhkhiaktheih kaki muangmoh sim hi. A kimlou leh adiklouhna theite’n honna theisak pah dingin kong ngen ngal hi. Hiai hunlui tangthu kim zaw a gelhnadi hunlemtang i mailam ah hong omna inteh chih kalam et a, mun leh khomin tengteng kigen man loudi ahi a gelhkhelh khak omthei ahihna ah mawl deuhin atangpi chauh kon gelhkhe di.

MIZORAM A OM MAPEK UH HUN:

Khovel a namlian deuh kikhat(Race) kikhen omte lak a Zousuante (Mizo/Zoumi) telna leh hongki patkhiakna Mongolian Race ahi a, Mongolian gam tuh China gamgi toh kizop simlam a om ahi hi. Barma/Mayanmar lam zuanin i paikhia ua, hunlui tangthu gelhtute gen danin nam kikhat pawl tuamtuamte lak a Tibeto-Burman kichite toh hon mekkhawm uhi(Lushai-Kuki Clans–by J. Shakespear). Zousuante kipatkhiakna abul I sui theihtan tuh ‘CHHINLUNG’ ahi a, Paite leh Thadoute’n ‘KHUL’ chi uhi. Hiai kha tangthu dandeuh ahihmanin I kisui theihdan uh hiai ten lel ahi. Chhinlung chih leh Khul chih thu kibang ahi a, leibawm hiam kawlbuk hiam chihna ahi. Hiai akipan Zousuan tengteng hong pawtkhia I hi uhi..

MIZORAM AH  ANA LUT UH:

Mizo tanchin gelhtu, Rev. Liangkhaia in agelhdanin kum 1700 A.D. velin Zousuante tuh khokhang lam zuan in Mizoram ana lut ua, akigen dan in Mizoram a mi ana teng masate, suang hiam(sharp stone) zangtu hon nangtu kum 900-1500 velin ana tengkhin daihta uhi. Kum 1700 A.D. malam pekin Zousuante laka nam Mizoram ana tung khin omta uh chih ahi a, huaite ahihleh- Darlong, Biate, Hrangkhawl, Dawn, Pangkhua, Tlanglau, Bawng, Mualthuam, Kaihpen, Bawmzo, Hmar, Khiang leh Chawrai te ahi uh. Amau zoh ana lût thakte ahih uleh, Zousuante mah ahi ua- Aimol, Anal, Chawhte, Chiru, Kawlhen, Kom, Lamzang, Purum, Tukhup, Vaiphei, Khokhang, Khosakte ahi uh, Vaiten Old Kuki achihte ahi uhi. Mizoram Encyclopadia gelhtu Dr. Subhas Chatterji in kum 1330 A.D. lai velin Mizoram a ana lutte lak ah Paite Vuite (Guite) ana telkha chi a, Paite min mékkhawmna dana genpalh ahi. Run gaal akipan Paite hausa/lal Sianthuam toh mi bangzah hiam in Palian hausa nung na zui ua, Dungtang in Palian hausa Bulpui leh Pubuar-te toh ana tengkhawm uh chih Rev. Liangkhaia in nagelh hi. Dungtangte toh a tengkhawm lai in Sianthuam zong hausa bangin ana omtei hihtuak. Vuite (Guite) tuh Paite mi lak a hausa suan deuh ahi ua, huan Sianthuam zong Guite mah ahi hi.

PAITE CHIH HONGKI PATKHIAK DAN:

Mayanmar(Burma) gam a Paite kampau zang tenna munpi Tedim khokiang a om ‘CHIMNUAI-GELTUI’ ahi a, nekzonna haksat ziak leh gaal lauh ziakin "Tiau lui" kaan in honpai suk uhi. Hong paikhelou apaikhete hong zuilou le om ua, huan ah ‘Pai-Khete’, Paite chidanin ana lou uhi. Paite kichi tuh ‘PAITE’ thumal mah ahi hi. Nam min himhim I sui chiangin ahong kipatna ana hou mahmah lelsek a, amau akisapdan ua min hong piangte suantu masate min tungtawn a phuak a omte, huaikia hilou nam dang daih vaite hiam in ana sapdan uh min a zangden ana ki-om a, Kuki, Chin kichite leh a dangdang midang min piak ahi uhi. Tuikuk kichite leng Mizote’n ana sapdan min ahi a, amau akigen chiang un Riang kichi ua, tun bel BRU chih ahidaihzel. Abangbang hileh British Solkal honglian deuhdeuh in ei hong optu in hong pang a, British thunuai a I om uapan PAITE tuh Zousuan Zoumite lak a namlian kikhat/peng ahi chih chiamtehna ah tel ngal chat a Solkal record in ana chiamteh dan leng ahi hi. BEH tuamtuam chih om tuam sese lou in Paite kichi in hon gakkhawm in hon chiamteh ua, namdang in honna phuahsak ahikei a, eimah kampau ahi hi.

PAITE PAU:

Nam leh chi kibang ichihte i omna mun zil in ana tuampian thei a, huchimah bangin Paite awkaih (Dialect) dangdangte lak ah huam liandeuhte hiai dan ahi: Tedim, Teizang, Lamzang, Dimpi, Lousau, Bukpui, Dapzal, Valpau, Tuichiap, Khothak, Ngennung. Mizoram ah Dapzal awkaih zang atampen ua, Teizang pau zangte hong paikhe zekai deuh ua awkaih zangte mizoram ah om sim nual uhi. Mizoram sunga Lamzang awkaih zangte atamlawkholkei uh. Pau kichi tuh i omna munzil ahi a, i behpihte tanpha a omna mun uh zil in a awkaihdan ana tuam deuhzel hi. Pau tuh i omna zil in na tuam thei a, ‘BEH’ tuamtuam, aneupen tanpha genkimdi hileng 100 val ahidia, hilehleng huai dana kisui sese angaikei a, avekin ‘PAITE’ I hi uh.

DAPZAL PAITE:

Dapzal Paite tuam dang a omkei ua Dapzal awkaih zangte Mizoram ah atampen uh. Dapzal Paite kichite tangthu suidan chinih a om a: Khatna ah, Guite hausa Sianthuam toh Palian hausa ana zuite’n khokhang lam zuanin kizui zel ua, Chilui tang ah a om lai un Bulpui tupa Bakate toh Keihak tang na tungdek ua thagim tawldam phot kawmin mau dapzal nuai a ana khosak laitak un Lalpuithang Sailo valút kha hi, huan ah Dap-zal nuaia khosate tuh ‘DAPZAL/DAPZAR PAITE’ chidanin ana kigen kha hi. Akigendan nihna ah, China gam a aom lai un hausa sawng kua/nine na Guite pa nau Keizang hausa Sianthuam in awkaih thak ana bawlkhia a huai Dapzal awkaih ana himaithei chi uhi.

PAITE PUPA NGEINA/CULTURE:

I omna mun zilin i awkhiah kia hilou i innsunga vaihawmdan, sabiakdan leh khotang I ki-etkai dan leh i lungput, I zia leh ngeina dante ana kibanglou thei a, nêk duh zawngte, thu leh la, lam dan, tangthu i gendan leh i theihdan, kichei ut dan leh i thil ngaihsàng tanpha ana tuam deuh zel hi. Hilehleng i Nam zia detdoutak kingahna bul tuh mangnghilh leh paisan maimai theih ahitaktak kei. Paite Pupa Ngeina tuamtuamte I genvek mankei a, sungkuan vaihawmdan fel aneih uh kon taklangdi: Mikang pau a Family Council kha ‘INNDONGTA’ kichi a, hiai danin akidot in kilem hi:

President/Chairman : Intek/Intekpa

Vice-President/Chairman : : Thallouh Mang

Chief Whip Ambassador : Thallouh Thusa

Director : Thusapi

Deputy: Beh Thusa

Joint Director: Tanupi

 Tanu Nihna, Tanu Thumna, Tanu Dangte, Nuphal, Pu Pi, Pu Nau, Zawl..........

MIZORAM A PAITE HAUSA/CHIEF:

Mizoram a Paite hong paisukte’n Sailo leh Palian hausa ana bel ua, Sailo hausa suantu lah Paite Guite Ngeknguk ana hidaih zel. Paite tengkhawmna khua tam kholloute  ah hausa ana nei ua, Dungtang leh Keihak hausa khat ahi ua, Sianthuam zohin Khampau, Khamgou, leh Roupiang hausa in ana om uh chih ahi hi. Britishte hong lut hunlai in Mimbung ah Kamzamang hausa in na om a, hun sawtlouin Manipur Hanship hausa diin pemkhengal hi. Huai hunlai mahin Khokawn ah Ngaihthang Guite hausa ahi a, Kamzamang Guite a pem zoh in Mimbung hausa diin kisuan ngal hi. Huan hausa hihna tuhtu numei, pasal banga kibawl, Patil amin Ngulzen kichikhat in suhsawm in subuai a, Borhsap Perry Mikang pa kiang ah ana kihêk uhi. Borhsap in Ngulzen tuh numei ahihlam atheihphet in ana nang  ngal a huan Ngaihthang mimbung hausa hong hithei hi. Ngaihthang a sihzoh in a tapa Luanzakham hausa hong hi a, Kidoupi II om laiin Japan gal Mizoram hong lût ua, lauhthawng huaisim ahihziakin Luanzakham in Ngoupa hausa Lalziding kianga lai ana thot a, Japan khut a kipiak khiak mai hoih himailou hia? Chihthu na khak hihtuak. Borhsap Mac Donald mundanga ana zin laitak ahi a, Lalziding in huai lai thot a simzoh in Luanzakham tuh Japan gaal lau hausa taak ahikei chi in Aizawl lam ah anapi khia a, ahihna kisutsak maimah uhi. A mun awng luahtudi in kidouna a sipaih sephoihziak Military Cross (MC) mu, Pu Ralkap ana luahsak hi. Paite hausa dang tuh Chhingvung Hauzel, Selam neitu ahi a, Zoutang leh Kawlbem zong ana enkai hi. A nau Lalbuang adi Zoutang ana seh a, Lalbuang in Kawlbem a khosa kawmin Zoutang na enkai hi. Teikhang hausa Pu Chhingvunga nau Thangtual Manipur Bungmual ah a pem ziak in Chhingvung tapa Taivelan in Teikhang ana kem hi. Sialkal tang saklam Vaikhotang a hausa Thangsing Khuptong ahi a, hiailou midang Paite hausa kichi a omkei uh. Borhsap nuai a sem C.I. senior a kaisang Lushai Clerk na asep lai in Pu Chawngler Khuptong tuh a omna Vengnuai khua hausa bang in ana om a, a nasep thuneihna toh letkop ngai ahihziak ahi.

MIZORAM A PAITE MI:

Khosak lam a kipan Mizoram a ahong lût suk dan uh aki gualkei a, hong paisuk tamlawlou uh hihtuak. Khenkhat sim-lam, khenkhat mal-lam ah, khenkhat khokhang lam ah, khenkhat khosak leh malsak lam ah ana om ua, ana teng dalh zengzung uhi. Huai hunlaia kikawm tuahna hoih om nailou ahihziakin ana kitheituah khollou ua milip phazah theihdingdan pianglou hi. Paite mi atangpi in tuantual leh mawl sim deuh ahi ua, Zousuan dangte toh akipolhkhawm chiang un bang ahihna diktak gen ngamlou sek uhi. British Solkar nuai a kisimpina (Census) masapen 1901-ah Paite mi 2,870 om uh chih ahi a,1921 Census kum 20 zohin mi 10,460 in  ana pungman ua, kisimpina a min kigelhzah sàngin atamthamdi uh chihtuh chiangsa ahi. Lamdangtakin India independent zoh in Census masapen 1951-ah Paite kichi nam min ana telkhalou maimah a, a san le vang tuh India solkar kisimthak ahihin Assam State-a Scheduled Tribe List kibawlthak ah Paite tuh Zousuan nam laka a lian pawl British Solkar inle ana pom leh achiamteh kha a thaka telsak ngaizel ahihlam hilhtudi leh panlatudi ana omlouh ziakin bawlkhak louhin na om nilouh hi. Scheduled Tribe List tuh Constitutional ,1950 a bawlthak ahi a, India Danbupi a tuangsak ahi. Constitutional Orders,1950 tuh kum 1956 in siamthakin om nawn a, ama a nakigelhlut khalou Hmar chihte ana kituangsakta a ahihhangin Paite telh ngai ahi chih hilhtudi ana om khalou zel adiam ah ahihkeileh khophawk lou deuh uh I diam, ana kipelut khalou zel hi. Thil hiai dana ana omkhaden ahihziakin kum 1980 in Mizoram Paite Organisation (MPO) min in heutute’n Mizoram, Assam leh Meghalaya State-a Paite omte tuh Scheduled Tribe List-a guanlutdi ngetna Memorandum India Solkar kiang ah ana pelut uhi.

NEKZONNA LEH MASAWNNA:

Paite mite atangpi in kuhkal leh thuak hat ahi uh chih midangin hon muhdan ahi a, loubawl mi ahi ua, thagum a nêk zong ahi uh, sumsinna leh nêkzonna dang ana ngaihtuah phalou uh hihtuak a, khopi a lutte dawrbawl leh solkar nasem ana tamlou uhi. Vual phalou deuh ua midang muhsit in om uhi.. A phaktawk ua kuhkal in nasep hât mahleh uh masawnna lungtang tasam deuh ahi uh chih chiang mahmah hi. Tuhun tanin kuhkalnalam ah keniam mahmah ua, sumdawnna hiam ahihkeileh laisinna lam ah vual phalou deuh uh chihtheih ahi. Paite sumdawng chi a mi’n ana theihphakte Mizoram polam a i unaute, Myanmar leh Manipur pana hong kuante ahi tangpi uh. Kitoudelhnadi thil dangdang sawk kawm a ipil uh hunta, solkal kia a kingat mai lou in, eimah sepsuah a dingsuah phamoh hi. I seppeihnàk leh solkal inleng hon panpih ût hi chih theini.

SIAMSINNA LEH SEPNA:

Vual phak utna khuak leh  tupguhna neilou deuh idiam I mi masate laisinna leh sepna lam ah sepna sang nei a omkei ua, matric (huai hunlai a Entrance) pass masa Viala, Khawlian Tangnuam sinsakpu, Vankhum, I.A. (PUC tan), a nau Vandailoute ahi deuhdi uh tuh. Viala a dam sawtkei a nalian tham semkhe manlouin ana mualliam hi. Pu Vankhum tuh High School sinsakpu in a pension a, anau Vandailou tuh Borhsap office Head Clerk hiin Political Assistant (ADC) tan kaisang in pension hi. Police lam a i theihphak tuh Pu Tawnluai, nasep siam leh mi hangsan ahi a Addl. S.P.-in pension hi. A nau Laldouchhung leng Central Intelligence Officer, ACIO ahi a, gam buai lai in a vangse kha hi. A nau leh Thangsei (Baia) leng U.T. Secretariat Superintendent in ana pension hi. Hiai teng I mi masate solkar nalian nei igentheihsun ahi ua, sepna niam zodeuh Clerk, C.I. chihte gendi adang le a omthou di uh. Graduate ichih, B.A., B.Sc. leh adangdang zilzou I mi masate lak ah ana omkei ua, hiai lai gelhtu in kum 1957-in B.A. ana pass a, a masapen chihtheihdi ahi. Engineer lam ah Graduate kinei hak mahmah a. B.E. pass masa pen tuh Pu Clement Lalrem PHE Department Chief Engineer tanin na kaisang. Huaizoh adangin hongki thuahtou sam uhi. Medical Science lam a Doctor zil ineitam kei ua, tu Atomic leh Computer Age ah Technical Education lam I pibawl ua athak a pan ilak uh kul hi. General Administration leh Police Department lam ah mi bangzah hiam I neita ua, MCS exam kigelh ching chihdi i omnai kei uh. MPS le I dinmun uh hiai dan mah ahi a, IAS conferred (promotion) mu chihtheihdi inei naikei uhi. Tunlaitak a Chief Secretary lenlel Pu Haukhum Hauzel Manipur a om, IAS kigelh ching (Regular) chauh ahi a, amah nung hong zuitudi kua hong hidiam? Khangthakte’n theihtawp a panlak poimoh lua hi!

MIZORAM PAITE CULTURAL SOCIETY:

Nam khat i hindan leh i zia in bang nam I hi uh chih aphoulang a, huai nam zia leh hindan tuh NGEINA/TAWNDAN /CULTURE’ kichi hi. Mizo/Zoumi ‘Culture’ nam cheimawitu, paaknalh saktu khat tuh ‘PHATTUAM NGAIHNA’ ahi. Zousuan kikhat tuamtuamte’n thil hihdan ei a chiat inei a, a tangpi in kibangin kizuul sim mahleh a danglamna khat om thouthou ahi. Paite nam in thu leh laa, lâm dan leh thil khenkhat ah Zousuan dangte hihdan toh kibanglou inei ua, lâm chi 30 vel kinei hi. Dah ni leh kipâk ni, ahun leh munzil a sakdi chituam akinei zengzung bok uh. Lou (kaihna) lâ, Saimai lâ, lâpi te, lakawi achihte uh asangei nonkei uh. Lâm kawma sak chi Zung lâ, Paak lâ, Khuai laa-te a om a, lam chituamtuam ineihte zilsiam vek lehang, akul hunhuna phoulang thei diin kimansa gige a om hoih ahi. Nam ‘NGEINATE’ zuun leh kipbet nadiin March 4, 1982 in ‘MIZORAM PAITE CULTURAL SOCIETY’ kibawlkhia a, nam puan, kicheina, dakkuang leh dakbu, kuang neu leh lehkhabu bangzah hiam Tedim lam apat kilakhawm hi. Paite puan bangtuh nalh petmah a Aizawl khopi neh deuhin ana diah zou hi. Laibu poimoh deuhte Manipur leh Myanmar pan lakhawmin MPCS Library-ah hoih taka kep ahi a, hun poimoh tuamtuam Chapchar Kut, Republic Day leh thil lopna (function) ah sap leh theisak a om ihihbangin Paite nam zia tuamtuamte phoulang  in midangte theihphakin ki om hi. All India Radio, Aizawl Station apan Paite laluite phoulatna kineikhata a, Paite Cultural Society (MPCS) a Art & Culture Department-a Fine Arts heutu Pu S.B. Piangsiandong, President masapenin pang hi.‘Culture’ lam a theihtheihna neithuk mahmah mi ahi a, a panlakna leh deihthohna in midang thathousak diak hi. Vangsiathuaitak in honna sih san thut a, poi kisalua ahi a, mapitudi omlouh ziak Mizoram Paite Cultural Society tuh kum 10 val bangmah bawlkhe theilou in awlden kha hi. MPCS chu solkar ‘Registered’ fel diam ahi a, MPCS a ding mapek in Champhai lam ah Zomi Cultural Club (ZCC) ana kiphutkheta pai tuang zel hi. Solkar leh Pawl khenkhatin poimoh hunchia hon chialsek ua, kipaak huai petmah ahi. February 21, 2004 in Aizawl a nam vei mite pungkhawmin MPCS bawl thakdi thu ana kikum ua, a pitu leh bultumtudi in Ad-hoc Committee nakiguat ngal uhi. Hun sawt louin Mizoram Paite Union (MPU) hongki bawlkhepah a, a buaipih tute leh heutu akiguatte toh MPCS a omte kibang vek sim ahihchiah ana lenkhawm touzel uhi.  MPCS Constitution bawlphatna kinei a, tua a laibu in kibawl lel ahi. ‘Culture’ lam vaisaitudi mi kiphal leh kipezou khenkhatte guang in Cultural Society Conference masapen pompihdi (nemkip) in MPCS Constitution kibawl thak tuh apomzoh chiang ua MPCS heutu guatsa a omte toh khawmpi masapen ah nemkip ahihkeileh kitelna alemtang dandan a vai hawm dandi thu gel in om hi. Tu’n MPCS heututen nnasem panpahngal ua, thil kipakhuai pipi ana bawlkheta uhi. Champhai MPU General Assembly masa pen leh MPCS Cultural Meet (khawmpi) a diin NEC (North East Council) hukna ana ngen ua, NEC Secy. Pu H.V.Lalringa, Mizoram Chief Secretary alet lai ahi a, phattuamngai takin ana buaipih a, Rs. 5,00,000 ana kipia uhi. MPCS heutute phattuam ngaina ziak toh Pu Lalringa panpihna leh deihsakna ziakin Khawmpi tuh thupi taka kizang theidi ahi hi. Tua MPCS heutute hiai dan ahi uh:

 President                 - Gin Za Go

 Vice-President        - V.Thangsonmung

Secretary                  - Ngulzathuam Guite

Treasurer                  - Hang Thawn Tuang        

Asstt.Secretary        - Thanglianzau

Financial Secretary  - Kham Suan Pau.

Nam ze hoihtak leh fel, ngeina puah thak ngaite kem hoihin, hon tuamhoih dingdan thil poimohte ngaihtuah thak thei lehang a deihhuai a, ‘Culture’ lui zat tâk nawn lou honsubuai thei maimai omte i paihkhiak ngam kûl bawk hi. Kristian I hivekta ua, i sabiakna toh kilemlou omthei ahi a, etsakna’n, Paite dan ah ZAWL GAI’ man Rs. 23 chauh ahi a. Huan, nupa kitengdi kum thum a omkhawm phot ngai huaizoh ta aneih uh leh kiteng taktak theidi huailou kikhen theih lai chih dan ineih uh koihkhiak mah hoih hi.

POLITICS LAM:

Mizoram a politics lam khanghalhna taktak tuh kidopi II-na zohin kum 1946 a kipan ahi a. India independence buaipihna a hon gahsuah dekta a, huai hun in Mizoram mabandi ngaihtuahtu political party masa pen Mizo Union in na ngaikhawk mahmah hi. A kum non in Mizo Zalen Pawl kichi  minloh United Mizo Freedom Organisation (UMFO) 1947 in honki phutkhepah ngal a, huai hun laiin Paite mi politics lama kipei ana omnailou kichileh a khial keidi. British hun laia Mizoram namlian guk lak a telpha Paite tuh Scheduled Tribe List thak a ana tel khaklouh uh buaipihtudi kuamah ana om louhziak ahi hi.

PAITE REGIONAL COUNCIL:

Lushai Hills District Council(huai zoh a Mizo District Council) kha kum 1952 akipat kinei ahi a, a kum nawn in Pawi-Lakher Regional Council piangpah ngal hi. Hiai kha Nam tuantual leh mun kilkawi a om akihihziak masawnna ahàt theihsem nadia Solkarin a piak ahi hi. India Danbupi in nam neunou leh tuantual diakte om khawmna mun Solkar in Regional Council tuam saitheih ahidi chih ahi a, huai kha Assam a singtangmite adi leuleu a kibawl ahi hi. Danpi Sixth Schedule-ah tuang sakin om ngal hi. Kum 1964-65 sungin Assam Chief Minister leh India Solkar kiang ah Sialkal taang leh akiim a Paite om tamna khuate huam phadi in Paite Regional Council ngetna Memorandum ana theh lut ua, Masawnna hatzawk deuh deihna hanga nget ahi hi. A buaipihtute tuh Manipur lam unaute, PNC heutute anahi daih ua, Mizoram sunga ana mit vaak deuh mi tamlou omte’n ana kihelpih uhi. Regional Council ngetna ahihziakin amun a enkhe tudi leh ngaihdan pelut diin Assam Solkar in huai hun laia Mizoram Borhsap K.Saigal, IAS a sawl a, December 28,1964-a apat kum thak January 19 vel tan amah vazin in va enkhia hi. Central Solkar in leng kum 1965 March 27-in Assam tanggam puahphat ngetna a chiang zaw a theihtheihna diin Commission ana guat a, a Chairman H.V. Pataskar ahi a,‘Pataskar Commission’ kichi hi. Hiai Commission in Pawi- Lakher Regional Council dingsate nasepdan leh ana etkaizohdan uh hong enkhia ua, Solkar kinepdan bangin ana semkhalou uh hihchituak Regional Council thakdang bawldi thu genlouh omsate le phiat a hihtawpdi hoih asak thu Solkar kiang ah tut maimah hi.

MIZORAM PAITE ORGANISATION:

Mizoram Paite Organisation (MPO) tuh Mizoram, Assam leh Meghalaya State-a Scheduled Tribe List-a Paite telsak dinga ngatna kibawl bohzuina dia phutkhiak ahi a, April 10, 1980-in Teikhang a khawmpi kisam a, vaihawmna leh bawlkhe tute lam et bangin MPO hoihkisa chiat hi. Kho tuamtuam ah Unit bawlkhia in thilpiak kikhonzel a Aizawl a heutu omte panlatu leh semkhetudi ahihziak un akhut uah thunneihna piakin om hi. MPO HQ's Teikhang ahi a, heutu hiai dan in kiguat uhi:

President                 - Thangzakap, Teikhang

Vice-President        -Phungkhai, Kawlbem

General Secretary  -Dal kam, Hiangmun

Secretary                 -Hnunlian, Teikhang

Treasurer                 -Thangzalian, Hnahlan

Financial Secretary-Thangthui, Mimbung.

Aizawl a Action Committee heutute-

Chairman-H.Thansanga

Secretary-K.Vungzamuan

Treasurer-Chalthiang

 Action Committee in HQ's toh kithuzakin nasem ua, Recognition ngetna Memorandum kibawl Prime Minister kiang ah pelut diin Pu L.V. Zahnuna-Chaltlang leh K. Vungzamuan in Delhi-ana zuan uhi. Manipur M.P. Pu N. Gouzagin in ana naihpah ngal a amaut’n Memorandum bawl in Prime Minister kiang ah ana pelut uhi. Action Committee Chairman inle  Assam leh Meghalaya Chief Ministerte kimuhpihdi in ahong zin ua. Action Committee tuh nasemtu pentak ahihziakin Aizawl a heutute kiphattuampih mahmahhi. Sum leh pai, hun leh tha tampi sengin Manipur PNC HQ's inleng Memorandum tuam bawl in India solkar ana tosawn pah kawmkawm uhi. Sinlai Pawl, Siamsinpawlpi (SSPP) inzong Manipur leh Mizoram lamte ana bohzui in hahpang petmah uhi. Action Committee Chairman in Delhi a abuaipihtu Ministry ana ngaihven gige ua, recognition ngetna State tuamtuam pan a tampi om ahihmanin akigual a ngaihtuah ngai ahihna ah hun sawtpi kivei hih tuak. Mizoram SSPP leh Zoumi/Paite Student Federation inle ana bohzui gige a, Mizoram PNC Heutute’n hihtheih dandan in pan ana latou den uhi. Delhi-a SSPP Branch heutute pahtak huai petmah ua Delhi a ana khosa ahihziak un solkar kalsuandan thei ahihna uah zatmahpha diak uhi. Huai dana pangkhawmna gah tuh kum 2003-in muh theihin hong omta a, Constitutioal (Scheduled Tribes) Orders, 1950 bawlthakna leh a behlapna Order tuh India Solkar in hong puang kheta a, Parliament in hiai tungtang a Home Minisry official Bill ana pass thak ziaka kibawl thei ahi hi. Huan, India Constitution-in Mizorama Scheduled Tribe List a Paite hong tuangsakta hi. Recognition lopna May 14 &15, 2003-in Mimbung a neih in om a, mi khenkhat in Paite Recognition tuh nam kilak tuamna bangin ana ngai mahleh uh, kilaktuam nalam hilouin, Zousuan nam kikhat Mizoram a tengte a lian diak deuhte lak a tel Paite kichite British hun laia solkar theih leh chiamteh sa hinazenpi unau dangte’n India Phualpi Solkar chiamtehna anei ahihlaia, telhkhaklouh tuam a om sese tuh adiksamkei chihziak ahi. Zousuante ki-unauna leh kipumkhatna subuai zawnga lakdi zaw ahisamkei.

PAITE NATIONAL COUNCIL:

Recognition muh mapek in, Paite Recognition ngetna gah muhtheih a ompahlou ahihna ah ana delh zui zeldi pawl thak Paite Federation, Aizawl ah mi phattuam ngaite’n July 17, 1990-in ana phutkhia ua ahihhang asepsuah uh gendi tamkhollou hi. A thilhih uh poimoh khat tuh kum 1991 March 6-9-in Mimbung a khawmpi ana sam ua, hiai kimuhkhawmna ah PNC Mizoram chidan in anading sakzaw uhi. Mizoram PNC Heutu masate hiai dan ahi uh:

President                -H.Zathuama

Vice-President       -Dampau Guite

General Secretary - Muan Hangsing

Treasurer               -Damsavung.

PAITE AUTONOMOUS DISTRICT COUNCIL:

Kum 1985 March 27 in Mizoram a Paite District Council tuam ngetna Manipur PNC HQ's tungtawn in India Prime Minister kiang ah piakin om a, Mizoram PNC inle kum 1991 August 28 in Mizoram Governor kiang ah Memorandum napelut in Central sorkar kiang ah ngiat uhi. Huan ah Mizoram a Paite tamna bial tuantual petmah tuh dopsang ahihna diin Autonomous District Council ki-ngiat gige ahi hi.

SIAMSIN PAWL (Paite Student’s Organisation): Paite Siamsin Pawl ‘SIAMSINPAWLPI’ (SSPP) tuh January 13, 1947-a kiphutkhia a, Headquarters, Lamka, Manipur ahi. SSPP Branch Mizoram tuh October 20, 1990 in dingkhe pan a, MZP (Mizo Zillai Pawl) toh hoih tak a kithutuak kawmin nna semkhawm in siamsinna lam kia hilou apoimoh dan zilin nam thil ana ngaihtuah khawm zel uhi. Paite Recognition nget lai inle SSPP HQ's toh pangkhawm in kal suankhawm zel uhi. Delhi SSPP Branch bang tuh amun a om ahihna uah kituak ichidiam; office paidan thi ah ana theisiam mahmah ua Delhi a mi poimoh kimuhpih ngaite ana houpih ngalzel ua zatmanpha diak ahihna uah lungdam huai lua hi. Kum 1997-a Manipur a buai ziak Paite hong gal taite etkol leh panpihna hoih takin ana petu ahi uhi.

ZOUMI/PAITE STUDENTS FEDERATION:

SSPP chihlouh Zoumi/Paite Students Federation (ZPSF) tuh August 30, 1994 Aizawl a phutkhiak in om a, I tawm uh toh Sinlai Pawl nih om sese a kul hia chih ngaihdan akinei a abang hilehle ana dingkhin ahihchia ZPSF inle siamsinna kia buaipih louin nam thil himhim apoimohna mun ah panmun na lazel hi. Akipat lai un MZP a puksiat deklai ahi a tungdingnadi seppihtu panpihtu in ana pang kha uhi. Paite Recognition ngetna, galtaite panpihna leh kum 1994 vel a Mizoram a gamdang mi/Foreigner nohkhiak ahihlai in leng i unaupihte theih dandan a buaipihtu in pang uhi. Hiai Siamsin Pawl nih kinei kha gawmkhawm kul sakna om ahihziakin Aizawl a nam ngainatute kimukhawmte’n pan honlak ua pawl nih tuh khatsuah dingdan lampi hoihtak hon ngaihtuah uh kilam-et hi. Sinlaite ichih khangnoute ahi ua I khut leh khedi ahi uh, houlungtuak tak a sepkhawm poimoh petmah ahi.

MIZORAM PAITE UNION (MPU):

Adiak in Mizoram sung ah Paite tampi ki om a, a tuamtuam a kikhen louin Mizo/Zoumi kipumkhat theihnading dan leh tha-khat a luangkhawm ahoihthu kigensek mahleh mihing tuh thukhatin I om gige kei ua mun khenkhat a mimal hamphatna zonga thil hoihlou hih ki-om khazel ahihna ah I kimekton deuh a ki-etkai dingdan ngaihtuah ngai ahi hi. Etsakna in, Mizoram a General Election a om changin mimal ahihkeileh, political party candidate adi ‘campaign’ a meithal tawi pawl ZRA-te anatel khazel a, ami deih zawngte ‘campaign’ ngeina dan kalh mi vau kawm a deihte chingsak sawm ana omkha sek uhi. Kum 2003 General Election laiin Ngoupa bial leh Champhai bial a meithal tawikawm a ‘campagn' khenkhat mi vau om uh hihtuak, mualphou tak a police’n mat in om ua huai in Mizoram mipi’n Paite mi hong etdan tuamsak vek a, thil chiindan hoihlou Mizoram a laluttu bangin honna en uhi. A nam zawnga minsiatna tanpha kithuak a, huai zohin Policete’n ‘Paite maimai hong that lengle kakigen fel theilawdi uh chidanin’ ana vau uh hihtuak, Rabung khua a Paite tangval Malsawma bang tuh Police khut thuakin sihloh hi. Hiai dan thil hong tung ahihchianga MPU heutute’n Home Minister kimuhpih un tu a kipan Policete’n a thil hihdan a pilvang takdi uh hihkhialte mat a kituak a gawtna piakdi chih ngetna kipia hi. Mi lepchiah thilhih gah tuh nam pumpi in ana thuak mawk ahihna ah huchidan thil hong omthei thil ah Paite mipite I pangkhawm thak a mimal zalenna zahtaklou zawnga Zousuante nam kikhat kipumkhatna hihse zawng lama kiven siam a ki-etkai thak hong poimoh petmah hi. Kigawmkhawm a ki-etkai dingdan fel deuh I neih uh hun lawta ahihziakin nam veitu mi bangzah hiam in Aizawl ah kimukhawm in tuhun zel ah pilvang taka kipitheihna diin Paite INNPI, MIZORAM PAITE UNION (MPU)’ phutkhiakdi thu kikum uhi. A kilemsakpih bangin June 10, 2004-in bawlfelta uhi. MPU phutkhiak ahihna san thil tampi om a, a taangpi genbeh deuh lehang:

  1. Innkuan bang ihi ua thu pha leh sia gelfel nadi, puaklut theihnadi Innpi ineih angai.
  2. Mi buching i omkei ua, thilbawlkhelh I neih chiang I ki-pukpih zawzen louhna diin itna toh hon thuhilh theidi, lampi hoih hon hilh tudi kipoimoh.
  3. Vangsiatna i neih chiangin, thil khial I va hihkha thei a, huai huna ikipiak lut nadi neih angai.
  4. Masawnna lam leh i nek zonna lam a kitoudelh theihnadi taima leh gin om kawma thildik sep hong thuhilh gige tudi neih angai.
  5. Mizoram polam pan a i unaute mangbang leh panpih ngai hong lut a omchiang un, hoihtak a enkol a ana tuam hoih theitu a I pangtheihna diin eimah pangkhawm siam angai.
  6. Polam mi I unaute Mizoram a hong lutte hindan hoih I sinsak uh angai, thudik kawkmuhtheidi Innpi neih angai.
  7. Nekzonna leh i nasep dan akibang kei a, huan ah i ngaih dan leh I khuak ana kibanglou thei bawk hi. Hon kaikhawm a hon siamlemtu gintak huai i neih a poimoh.
  8. Migenthei leh hausa kikal, mi mawl leh mi siam kikal, huan ah milian leh mi neu kukal alet luat khakdi veng a, kibang vek a hon entkaitu, nu leh pa tanga hong huaikhawmtu kipomoh hi.
  9. Eimah kia a khosathei I hikei ua, Mizo/Zoumi nam Sungkuanpih nei ihihna ah, Sungkuanpih kitam/kekthei laka i venbit i mohpuakna ahi. Eimah ngaihdan chauh a kalsuanpih mailouin, Innpi ngaihdan leh kipidan zuisiam lehang ahoihlouhnadi himhim gen in bawl sawm keileng.
  10. Kigensiat, mi dem leh ki phunsan gige chihbang midang bangmahlou in I mu chihna ahi a, huaiin gah hoih a suah ngeikei. Kingaihdam, kidohsiam, kipahtaaksiam kha i nam mel cheimawitudi ahi.

GAM VAIHAWM NA : I gensa mah bangin laisiam leh solkar nalian sêm I mimasate ana omkei ua, tunbel Graduate bangzah hiam I neita uh, Solkar nna sang deuh sem Officer zong hongki behlap tou zel a, ‘Doctor’ zilkhin mi-nga tak kineita hihtuak. Gam vaihawmnalam kawk thu genzual lehang Politics louin tuh gam leh nam heutu dinmun poimoh muh phak vualdi ahikei a, Mizoram in politics lam buaipih akipat laiin Paite mi khat le a omkei uh chileng a khial keidi tuh, politics lam ah pan mun ana kinei nailou ahi a, District Council term nanung pen 1970-kitelna ah Pu Zalawma leh Pu Vanlalhruai-te MDC-a I tel ching amasapente ahi uh. Pu Zalawma bangtuh Chief Executive Member (CEM) ana hingalpah hi. Kum 1972-in Union Territory, Legislative Assembly kineita a, District Council phiat in om hi. General Election masapen akineingal a, U.T Assembly Election masa pen ah Pu Zalawma leh Pu Vanlalhruai zong MLA-in kitel ching hi. Pu H.Thansang leng solkar nasep tawpsan in election ah kihel telching hiin Legislative Assembly masapen ‘Speaker’ –hihna ana lenkha pahngal hi. Kum 1975-in Pu H.Thansanga tuh Minister a guat in om a, Pu Zalawma Deputy Minister hiin Pu Vanlalhruai zong Chief Whip in ana kiguat kha hi. Mizoram leh Mizo mipite adi nasem dia sehkhiak ahihna uah Paite mite adi kia buaipih theilou uhi. Huan gam vaihawmna dinmun poimoh tak ana len ahihman un, a chipihte’n hamphatpih ua maingal tuan mahmah uhi. Khovel huih kilumletdan leh thil paidan ah I mut uh hong vaak tuan mahmah a, tu malam a kisuanglahna toh midang kal a khosatei maimai thil hoih leh thupi beisei phalou a omte i hong ngampa samtei ua huai in tua I dinmun adiin lampi ana phusuah toutou anahi hi. General Election hong om zeuhzeuh zel a, Pu Zalawma leh Pu H.Thansangte Minister’n pangtou zel uhi. Kum 1993 Election-ah Pu H.Zathuama, PNC andidate hiin MLA-a telchingin om nawn a, Kum 2003 Election in Pu H.Rohluna telchingin om a tutanin hitouden lai ahi. Kum1991 Lok Sabha kitel laiin PNC candidate Pu Paul T.K.Dong ana ding a vote tamtawk ana mu hi.

ZOUSUANTE KIPUMKHATNA: Zousuan khen tuamtuamte’n ei-adi kia buaipih a dingkhe dia kinem I hihlebel khovel theihphak a ki-om ngeiloudi ahi a, kizomtuahna omte Mizoram sung chauhdi ahihlebel fuhlou maithei. Nam teng theih tham I hihtheihna diin saupi ngaihtuah a ngaia, ngaihtuahna lianpi neikawm a hong subuai theidite pilvangtak a kinlawlou a phel touzel mah ngaidi ahi hi. Hiai tungtang ah thu tawmchik kongelh khia zualdi: ..........

KAMPAU: Pau ichih thil hing leh thil hihtheinanei ahi a, thangtou zeldi thil ahi. English pau ichihbang athang dan nasalua thang behlap toutou laidi hizomah. Dictionary i et leh namdang pau azat uh atam mahmah mai a, huaite kha midang pau ahi chih theihtheihna diin laibu phek tawpna ah French, Latin etc.chidan in taklang zel uhi. Nam kikhat pau i zat lemtângte uh kemmang keileng i kampau uh honhih hausatudi khat ahi. Zousuan kikhat tuamtuamte lak a tua I zatlai kampau kholai pau/tualleng thil genna a I zatte midang kampau hilehle ei a bangin tuahlut siam leng kiphattuampih maithei ahi. Etsakna in: Kikhop Pitu Chairman (Mizo) Hunuk/Hunukpa (Paite) Chief Guest Khuallian (Mizo) Tulpi (Paite) House Owner/Host In neitu/In neitupa (Mizo) Intek/Intekpa (Paite). Pau kaih nuam thumal tom leh fel deuh a zattheih I zat nuam nakleh tam ahi. Pawi leh Hmar kampau a leng lemtang banga thukhat genna zatkoptheih om diin kagingta. Mizo pau chauh zatdi chidana a kikhen dangte kampau khoih mang sawmna in tuh bangchikmah chiangin hong kaikhawm keidi. Literature lam ah pan nasatak a kila chiat ahihchia, Mizo pau ahausatna diin huaite tuahlut poisa keileng I pau un awl chikchik a eilak a kizopna bawltudi ahi. A lemtang dan in namtuam a literature lam ngaihtuah mite toh Joint Meeting nei in kal kisuan theileng atualleng zatdi hong piangtheih kagingta. .

LÂM (CULTURAL DANCE): Zousuante laam leh laa-te lakhawmin Art & Culture Department Fine Arts programme te a telsakin kisinsak theileng, laam peuhpeuh siam diin sinsak sawm leng hon kainaihsaktudi thil manpha ahitheidi e. A laibuin kibawlkhia hileh naupangte'n olsam deuh in ana sintheidi uh ahi.

Hiai nam ‘Ngeina’ kepbit lam ah masawnzel in lungsim kihong na toh, Lusei hih dan, Pawi hih dan, Mara hih dan, Paite hih dan, Hmar hih dan, Ralte hih dan, chih omtuan sese louin kibangvek in kingai poimoh sak chiat lehang thil phatuam leh kipumkhatna piang theidi ahi hi. A pumpi a adawk khiat dandi tuh Mizo/Zoumi lam chih hong hithouthoudi lah ahingal a. Lungtang lama min zohlouhna  leh dawllou chi a ingaihtuahte hihkiam kûl ahi hi.

“I hongtunna i ngahna chiang uah muanhuai in kip peuhmah ni uh” - Philippite 3:16

(Mizo a kigelh Paite a kiletkhia ahi)

 

Search