BIBLE A KIGEN PETER -Valte Ginkhenpau

User Rating: 0 / 5

Star InactiveStar InactiveStar InactiveStar InactiveStar Inactive
 

Peter min tuamtuamte leh a khiaknate:

Bible a Peter kigen pen Hebrew-mi ahi a, a min diktak Simeon (Simon) ahi (Matthai 10:2; Nas. 15:14). Toupa Jesu’n a min tuh Cephas (Kifa) chi in kheksak a, “huai tuh Peter chihna ahi” (Jn. 1:42). Hun tamzawte ah “Simon Peter” chih in om hi. “Simeon” pen a Hebrew min hi a, akhiakna tuh “za,” “ngaikhia,” ahihkeileh “thumang” chih ahi. “Peter” kichi pen ahihleh a Greek min ahi a “suang” (suangtum) chihna ahi a, Aramaic a “Cephas” chih toh a khiakna kibang hi.

 

Simon Peter ahihleh Toupa Jesu’ nungzui masate lak a khat (Matt. 4:18-22) ahihban ah sawltak sawm-le-nihte (Matt. 10:1-4) lak a atallang pawl ahi (Matt. 10:2; 17:1; Nas. 2:14; 10:5). Bible ah Simon chih min nei tampi om mahleh Peter chih min nei amah kia ahi hi.

 

Ama’n Thukhun Thak Laisiangthoute lak ah laikhak nih ana gelh a, huaite tuh Peter Laikhak Khatna leh Nihna i chihte ahi. Khenkhatte’n huai amah min a laikhak nih omte lak a anihna pen amah khak hilou ding in muangmoh mahle uh Peter mah khak ahihdan chetna ding tampi om hi.

 

Nu leh pa leh sanggamte:

Simon Peter’ pianna pa’ min ahihleh Johan (Jonas/Jonah) ahihdan Johan 1:42; 21:15 leh Matthai 16:17 ah muh theih in om hi. Himahleh, Simon Peter’ pianna nu’ min Bible ah kigelh lou hi. A sanggampa Andrew ahi a, amau tegel min bel gelh khawm in om sek hi (Matt. 4:18; Mk. 1:16, 29; Jn. 1:40-42).

 

Zi leh ta:

Matthai 8:14, 15 ah Peter’ sunghnu damlou a om ahihdan muh theih hi. Marka 1:30 leh Luka 4:38 ah leng hiai toh kibang mah thu kimu hi. Peter in zi nei mah ahihdan chetna nawn dang khat ahihleh I Korinthte 9:5 ahi a, huai ah sawltak Paul in, “Sawltak dangte leh Toupa’ unaute leh Kifa bang in zi gingtami pi vialvial ding in thu ka nei kei ua hia?,” ana chi hi.

 

Zi ana nei ahihban ah tate leng ana nei hi ding in gintakhuai hi. Aziakbel, Peter in amah mah a kigenna ah “saptuam upa” ahihdan ana genlang hi (I Pet. 5:1). Tita 1:6 ah saptuam upate tuh “zi khat pasal, tate ginom nei” chih ahi a, Peter ngei leng saptuam upa khat ahihna ah “tate ginom” nei hi peuhmah ding chihna ahi. Huaiban ah, I Peter 5:13 a “ka tapa Marka” chi a ana gen pen amah sisan apan tapa ahi chi pawl toh, ginna tungtawn a khalam a a tapa gen hizaw ahi chi om tuaktuak hi.

 

Khomi hihna leh nekzonna:

Galilee gam a om Bethsaida khomi ahi chih Johan 1:44 ah muh theih in om hi. Toupa Jesu’n Galilee gam a nasepna A neih lai hun in Peter leh a sanggampa Andrew in Capernaum khua ah inn nei in khosa hi (Mk. 1:21, 29). Galilee gam a khosa leh khanglian khat ahihna ah amah aa ding khop Greek pau thei a, himahleh a awphawidante apan bel mite’n mankhe pah thei veve uh hihtuak hi (Matt. 26:69 73).

 

Tanchinhoih Matthai 4:18 leh Luka 5:1-10 chihte i simleh Simon Peter tuh ngabengmi (ngamanmi) ahihdan muh theih in om a, a nekzonna pipen tuh ngasa mat ahi chihna ahi hi. Toupa Jesu Khrist in “hon zui un, huchi in mihing man ding in ka hon bawl ding” chi a A sapte lak a khat leng ahi (Matt. 4:19; Mk. 1:17; Lk. 5:10).

 

A miziate:

Peter i chih mi hivilvel leh thathou ban ah sep lit leng nei lou, lungsim siangthoutak nei mi khat hihtuak hi. Thukhun Thak Bible ah amah kampau zaknophuai tamkhop muh ding om sek hi. Huaite lak a khenkhatte ahihleh “Toupa, hon paisan in, mikhial ka hi” (Luka 5:8), “Toupa, Nang na hihleh, tui tung ah Nang kiang a hong pai thu hon pia in... Toupa, hon hondam in” (Matt. 14:28,30), “Huai gentehna thu hon hilhchian tanla” (Matt. 15:15), “Khrist, Pathian Hing’ Tapa tuh Na hi” (Matt. 16:16; Mk. 8:29), “Toupa, hi hetkei hen! Huaite na tung ah tung ngei hetkei hen!” (Matt. 16:22), “Toupa, kua kiang ah ahia ka pai ding uh? Nangma’n khantawn hinna thu Na nei hi” (Jn. 6:68), “Toupa, Nang tel in ka khe Na sil di’a hia?... Toupa, ka khe kia hilou in, ka khut leh ka lutang leng aw” (Jn. 13:6, 9), “Kua thu pen ahia a gen, hon hilh dih... Toupa, koi a hoh ding Na hia?... Toupa, bang ding in ahia tua leng k’on zuih theih louh ding? Nang mah ziak in ka hinna ka pai ding “ (Jn.13:24, 36, 37), “Toupa, hiai gentehna thu koumau kia hia Na hon hilh, mi tengteng?” (Lk. 12:41), “Toupa, ei di’n hiai a om a hoih, Na utleh hiai ah aidakbuk thum ka bawl ding a; Nang a ding in khat, Mosi ding in khat, Elija ding in khat” (Matt. 17:4; Mk. 9:5; Lk. 9:33), “Toupa, ka unau in bangzah vei ahia ka tung ah khialleh ka ngaihdam ding? Sagihvei tan in ahi diam?” (Matt. 18:21), “Ngaidih, kou bangkim paisan in ka hon zuita ua; bang ka mu ding uale?” (Matt. 19:27; Mk. 10:28; Lk. 18:28), “Heutupa, endih: theipi kung hamsiat Na loh ana vuai khin vekta” (Mk. 11:21), “A vek un lungkia in hon taisan mahle uh, ke’n zaw k’on taisan kei ding... Na sihna a leng si sam ding himah leng k’on kitheihmohbawl kei hial ding” (Mk.14:29; Matt. 26:33, 35), “Toupa, na kiang ah suangkulh ah leh sihna ah leng pai sam ngap ka hi” (Luka 22:33), “Mihing aw, ka hi kei... na thugen ka thei kei” (Lk. 22:58, 60; Jn. 18:18, 25), chihte leh a dangdang ahi hi.

 

Peter tuh mi khut kingang leng hihtuak hi. Getsemani huan sung a Toupa Jesu mat a om dek lai in temsau dokkhia in Siampu Lianpen’ sikha Malka’ bil satkhiaksak hi (Jn. 18:10).

 

Toupa Jesu leh Peter:

Toupa Jesu leh Peter in kichimat diakna mahmah khat nei uh bang hi. Hiai anuai ah tamloute ensuk ni.

 

Nungzui masate A saplai in Peter telkha pah a (Mk. 1:16-20; Luka 5:1-11), sawltak sawm-le-nihte leh nungzuite’ minte gen ahih chiang in leng Peter’ min genlat masak in om gige hi (Matt. 10:2-4; Mk. 3:16-19; Lk. 6:14-16; Nas. 1:13-14).

 

Toupa Jesu’n Jairus’ inn a A tonpih mi thumte lak ah Peter tel hi (Mk. 5:37; Lk. 8:51).

 

Mellamdanna taang a Toupa Jesu’n mi thum a tonpihte lak ah Peter tel hi (Matt, 17: 1; Mk. 9:2; Lk. 9:28).

 

Getsemani huan a lungkhamtak a A omlai a Toupa Jesu’n A Kha venpih ding a mi thum A chial biikte lak ah leng Peter telkha hi (Matt. 26:37-38; Mk. 14:33).

 

Jesu leh Peter kihouna nih en zual ni:

Luka 22:31-32:

“‘Simon, Simon, ngai in, setan in buh seep bang a a hon seep theihna ding in, noute hon ngen eive; himahleh, na ginna a man louhna di’n ka hon thumsak ahi; na kihei nawn chiang in nang na unaute hihkip in,’ a chi a.”

 

Hiai atung a tang 31na a “noute” kichi a Greek ah “humas” ahi a, “humeis” chih apan kila ahihman in “nang” chi a letkhiak sang in “noute” chi a kiletkhia pen dik mahmah hi. Tang 32na a “na ginna,” “na kihei nawn” chih leh “na unaute” a chihna munte a “na” chih genna a Greek kammal kizangte pen “sou” leh “su” hi a, mimal khat genna ahi hi. Hiai apan a i muh theih ahihleh, Peter in thum vei hial a Toupa kitheihmohbawl mahleh a “kihei nawn chiang” a a “unaute hihkip” ding pen Peter mohpuakna tuambik deuh a Toupa Jesu’n koih ahi chihna ahi.

 

Johan 21:14-17:

Toupa Jesu’n hankhuk apan A thohkik zoh a nungzuite kiang a thum vei A kilaak nung in Peter houlimpih hi. “A thum veina di’n a kiang ah, ‘Simon, Johan’ tapa, nang kei n’on it hia?,’ A chi a. Huan, thum veina a ‘nang kei n’on it hia?’ a kiang a A chih ziak in Peter a lungkham a, A kiang ah, ‘Toupa, bangkim Na thei a, k’on it ahi, chih na thei hi.’” Toupa Jesu’n sawltak Peter kiang a dotna kibang akizom a thum vei bawl thakthak ahi chih i mu hi. Bangziak a Jesu’n thum vei hilhial dong tuantuan ahi ding?

 

Thukhun Thak kigelhna Greek pau ah itna kichi gendan tuamtuam sagih hiam giat hiam vel in kigen thei hi. Huaite lak a kithei tangpi deuhte leh Bible a tangtak hiam ahihkeileh a hemgen a kimute ahihleh agape, philo, storge leh eros kichite ahi hi. Toupa Jesu’n “nang hiaite sang in Kei n’on it zaw hia?” A chih hun a “it” chih thumal genna a A zat Greek kammal ahihleh “agapao” ahi a, “agape” kichi apan ahi. Himahleh Peter in “He, Toupa, k’on it chih na thei hi” a chihna ah “it” chihna in “agapao” zang lou in “phileo” zang zaw a, huai pen atung a “philo” i chih apan ahi. Itna genna kammalte laklak ah “agape” tungnung penpen a, “philo” ahih chiang in mihinpihte khawng leh laiguizomte ban ah lawmte itna genna ahi tangpi hi. Toupa Jesu’n “itna lianpen in n’on it hia?” a chih lai in Peter in “lawmta khat bang in zaw hon it mah veng aw” chi a dawng toh kibang chihna suak hi. Jesu’n a lametna zah a lian itna toh dawnna ngahkik lou kisa ahikha maithei hi. Nih vei akizom a Jesu’n “agapao” chih thumal zang a A dot nung in Peter in “phileo” chih zang in dawng tuaktuak hi. Atawp in, Toupa Jesu’n a thum veina ah, Peter kammal zat “phileo” kichi zang khong in, “Nang kei n’on it (phileo) hia?,” chi in dong hi. Peter in, “Toupa, bangkim Na thei a, k’on it (phileo) ahi, chih na thei hi,” chi in dawng a houlimna khawl uhi.

 

Peter sihdan:

Khangthu khawng a kigendan in, sawltak Peter tuh Rome khopi ah Ukpipa Nero in singleek ah kilhlum hi. Toupa kikilhlupdan bang a singlamteh a kilhlup a a om hial ding ngaingam lou leh phu kisa lou in Peter in bungbutun a amah kilhlum ding in ngen a, a ngetna bang in bungbutunsa in kilhlum uh kichi hi.

 

 

Laibu ette leh pansante:

  1. The New Compact Bible Dictionary, edited by T. Alton Bryant, ©1967: Zondervan Publishing House, Grand Rapids, Michigan.
  2. The New Testament Documents: Are they reliable?, F.F. Bruce, ©1960: Inter-Varsity Press, Leicester LEI 7GP, England.
  3. Dickson Teacher’s Bible, “1 Peter,” Roger E. Dickson, ©1982, 2006: Africa International Missions, Hutchinson, Kansas U.S.A., Cape Town, South Africa
  4. Dickson Teacher’s Bible, “2 Peter,” Roger E. Dickson, ©1982, 2006: Africa International Missions, Hutchinson, Kansas U.S.A., Cape Town, South Africa
  5. Dickson Teacher’s Bible, “John,” Roger E. Dickson, ©1982, 2006: Africa International Missions, Hutchinson, Kansas U.S.A., Cape Town, South Africa
  6. MySword for Android version 5.4
  7. https://thoughtcatalog.com/rania-naim/2016/02/the-7-kinds-of-love-and-how-they-can-help-you-define-yours-according-to-the-ancient-greeks/
  8. https://lonerwolf.com/different-types-of-love/
  9. https://www.thoughtco.com/types-of-love-in-the-bible-700177
  10. https://en.m.wikipedia.org/wiki/Saint_Peter

 

 

©Valte Ginkhenpau, 2019

Search