GITLOUHNA ZIA TUAMTUAMTE

User Rating: 0 / 5

Star InactiveStar InactiveStar InactiveStar InactiveStar Inactive
 

GITLOUHNA ZIA TUAMTUAMTE

-Valte Ginkhenpau

 

Thagum a kisual leh kilai kia gitlouhna ahi kei chih thei kawm in gitlouhna zia tuamtuam omte kikum leng uthuai i sa ahi. Saupi gen masa duanduan tuanlou in, hiai anuai ah gitlouhna zia tuamtuam omtheite i ban et suk daudau ding.

 

I. Thagum-thatang a gitlouhna.

'Gitlouhna' chih thumal i ngaihtuahna a a hong lutkhak chiang in thagum-thatang a sepsuahna lam toh kisai hong lut pah tangpi hi. Huaiziak in, hiai thagum-thatang a gitlouhna kichi pen gitlouhna zia tuamtuam i gen utte lak ah amasapen in i koih ahi. Lawmta kal, mimal kal, nupa kal, pawl khat leh pawl khat kikal ah hitaleh hichibang thagum-thatang a gitlouhna suah ahih chiang in kinakna, kiselna, kimuhdahna leh kimelmakna liantak piangsak a, hindan ngeina nuamlousak thei hi.

 

Hondampa Toupa’n, “...namsau pan peuhmah tuh namsau mah a a sih ding ziak in,” chi hi (Matt. 26:52). Hiai pen thagum suahna in thagum suahna mah pawkhe ding ahi chihna in leng a laak theih ding hi.

 

 

 

II. Kampau a gitlouhna.

Mi pawlkhat paunuam huntawk thou, nuihmai hiuhiau zawmah, kam bang leng siam huntawk thou napi a kampau uh kha mahmah pawl omthei thepthup hi. Kamtam khollou napi paukhiat sunsunte bang zakdahhuai velvul; mel bang leng nunnem mel mahmah thou napi khatvei va houpih nung houpih nawn ding lithuai tuntun chih pawl bang leng om thei mawk hi. Paukhiat sunsun chiang bang a kamsia leh huham taktak thute khawng gen khe toihtoih mai pawl bang leng om thei veve hi. Kampau a gitlouhna i chih pen huchibangte genna ahi hi.

 

Jakob in, “Kuapeuh thugen lam a a gitlouh keileh, huai mi tuh piching ahi,” ana chi hi (Jak. 3:2).

 

III. Gamtat-khohei a gitlouhna.

Gamtat-khohei a gitlouhna kichi khat omthei nawn leuleu hi. Mi toh kisual leh kilai chihna hipah kei mahleh, nna khatpeuh sep chiang a mi philkhase hiam ahihkeileh midangte hetkhase chihte hiai gamtat-khohei a gitlouhna in huamkha thei ding hi. Hiai in huandai leh gamgi guuk keekna toh kisai bang, nekguk-takgukna leh diktatlouhna chichihte zong huamtel thei ding hi. Upate kampau kheel zualle, a kamsung ah khut koih lengle hon kei ke'nte chih theih ding bang hial napi a a gamtatdan, khoheidan a mi nawkkhase chihte pawl bang leng huamkha thei ding hi.

 

Sawltak Paul in, “Na omdan uh Khrist tanchin hoih toh kituaksak photphot un,” chi hi (Phil. 1:27).

IV. Lungsim a gitlouhna.

Thagum-thatang a bel buaina bangmah bawl ngeilou leh kampau bang a leng gilou khollou napi a lungsim a ana guuk gitlouh mahmah chih pawl zong omkha thei veve hi. Thagumsuahna leh kampau a gitlouhna kichite pen akilangkhe baih mahmah gitlouhnate hi a, himahleh hiai lungsim a gitlouhna kichi pen kilangkhe pahpah khollou tangpi hi. A gitlouhna uh a lungsim sung ua ki-um nilouh ahihman in lungsim a giloute lungnuam, maitai leh kipahmel gige a om tam ding un gintakhuai lou hi. Dik kim kholkei mahleh, mi pawlkhat in bel mi lungsim siate (giloute) in kipahna (lungkimna) ding hau khollou ua, sungnaa (gilpi natna) in bawm nuam mahmah in a taksa uh thau mitmet thei lou a, atangpi in gawng uh chi hial uhi.

 

Hiai lungsim a gitlouhna kichi pen Toupa Jesu’n, “Mihing polam a kipan a a sung a lut amah hihnin thei bangmah a om kei; mihing sung a kipan a hong pawt, huaite ngei tuh mihing hihnin ahi zaw,” A na chih pentak ahi hi (Marka 7:15; Matt. 15:18).

Thukhitna.

Hiai atung a kigen gitlouhnate khatmah leng a hoih chih tuam ding a om kei. Thukhun Thak Greek ah ‘gitlouhna’ kichi pen ‘kakia’ hi a, huaimah tuh ‘huatna, mi sukliam utna nei’ ahihkeileh ‘daan palsat ding nasan poisa lou khop a gitlouhna’ chihna ahi chi in Thayer in gen hi. Huchibang ahihna ah, ei khristiante tuh gitlouhna zia tuamtuam omtheite tengteng tawpsan ding a hasot i hi uh ahi (I Pet. 2:1; Eph. 4:31).

 

 

©Valte Ginkhenpau, 2018

Search