DIKTATNA KICHI NEU CHIKCHIK A HONG KIPAN AHI

User Rating: 0 / 5

Star InactiveStar InactiveStar InactiveStar InactiveStar Inactive
 

DIKTATNA KICHI NEU CHIKCHIK A HONG KIPAN AHI

 

Thumapi:

Matthai 23:23 a i Toupa Jesu’n a thuvual tawpna a, “…hiaite eive na hih ding uh, adangte hih lou tuanlou in,” a chih bang deuh in diktatna tungtang ah leng alianpi a kilangte ban ah aneute ah leng diktat poimoh hi. Diktatna kichi pen khatvei thu a zohvek a, ‘tun ah zaw ka awlmoh a ngai nawn kei’ chih theih thil ahi kei; niteng, hun teng a diktatna i suah poimoh ahi. Himahleh mihingte pen bukimlouhna toh kidim mihing i hi uh chih mangngilh kei ni in, himahleh diktatna mah delh (I Tim. 6:11; II Tim. 2:22) chinten in pangni. Hiai thugelh na sim toh kiton in agelhtu sangmah in a thutunte sutzaw di’n ka hon chial hi.

Diktatna hong kipatdan:

Thupil khat in “Tuimal neu nounoute kigawmkhawm in tuipi bawl ahi” achi hi. Huai kia hilou in, telsuimite gendan in, mit a muhtheih thilliantaktakte ngei leng khovel a thilneupen (atom) a hong kipan ahi chih ahi. Diktatna kichi leng, huaibangmah in, thu neuchikchikte mah a hong kipankhia ahi hi. Mi pawlkhatte’n diktatna pen a thupi lua leh lianpi a hong kipan dingdan bang in a koihkha maithei, himahleh huaidan ana hi tuanlou in, i gintat louh leh houchik i sakte mah apan in leng diktatna hong kipankhe thei hi.

 

Hiai anuai ah diktatna a kiptak a kibulphuh theihna ding a poimoh mahmah chi bangzahhiamte i ensuk ding.

 

I. Mimal a diktat ding ahi: Diktatna taktak michih lungtang a hong kipat poimoh hi. Insung hiam ahihkeileh pawlpi leh saptuam lak ah kithuhilhna poimoh in phatuam lawtel tham mahleh alinglou leh suksiatzohlouh ding diktatna tuh mimal lungtang a hong kipatkhiat poimoh hi. Mite genhatthu leh sawlhatthu hiam ahihkeileh zakmun ziak a thilhihte’n gah suang zelsam mahleh vuiching zou lou leh dengdel deuh nuamsek a, haksatnate ban ah ze-etnate leh chounate’n amaituah chiang in pukse baih kholdiak hi.

 

United States a President masapen leh a gammite’ “Pa” chih a om George Washington in a pa’ deihthoh mahmah ‘Cherry’ singkung ana phuksak lai in zuau siangthou gen in a kisiamtan thei tham hi. Himahleh hiai thil neuchik pen thupitak a ngai in, a pa’n a dotna tuh “Zuau gen thei vual ka hi kei, Pa” chi in dawng giugeu hi. Amah tanchin gelhtute’n hiai thu ziak in anunglam in nu leh pa tamtakte’n a tate uh amah diktatna pansan in thuhilhna neisek uh chi uhi.

 

II. Siamsinna mun a diktat ding ahi: India Nampi Pa chih a om Mohandas Karamchand Gandhi in a siamsinna mun a etkhiatna a neihna hun uah a heutupa uh simhilhna zui in, thumal nga gelh dik dingte lak a thumal khat lel a gelhkhelh pen a lawmte gelhdiksa engu in “kettle” chi in sudikleh a heutupa phat loh ding hi. A diktatna ziak in a heutupa uh salhna tuak in a lawmte mai ah selphouna tuah kholoh hi. Himahleh, amah tanchin i suileh, a hinkhua ah hiai a diktatna ziak in lohsapna ngah tuanlou in, huainaksang in India zalenna ding sualna ah mipite thupitak in lohchinpih zaw hi.

 

III. Inkuan a diktat ding a kisinsak ding ahi: Sungkuan a diktatna kisinsak a huai bangmah a sepsuah poimoh nawn hi. Hiai ah leng mimal ah lianpi kinga veve hi. Nu leh pate’n tate lak ah thuhoih-lahoih gengen napi in amau ah diktatna muh ding om keileh amau leh amau kikhem banglel hi ding ua, tate’n etton ding diktatna amaute tung ah mu lou ding uhi. Tate kiang a leisak louh dingpi leisak dingdan a thuchiam bawl; hohpih louhna dingpi a hohpih dingdan a gen; inkuan kithumantuah ding ahihdan gengen napi a pa leh nu kiselsel; diktat ding gengen napi a skul apan naute’n alawmte theihpihna leh phalna tellou a laikung hiam ahihkeileh van khatpeuh a hon puak chiang ua poilemsa in ngaizamsuk; zu-le-sa leh nungak a kibual louh ding ahihdan inkuan kikhopna khawng a gengen napi a nu leh pate kidek zou lou; kinak-kisual louh ding gengen napi a nupa a kinana a kiselsel; chih leh adangdang tampi omlaite neuchikchik bangmahle uh nu leh pate’n chiin louh ding in hoih hi.

 

Tate’n, “Nou leng na huchive uai!,” a chihthuk chiang bang a, “Kou chu piching hita; nu leh pa hita keive uai!,” chihsan lelaw maimah. Ahihleh, na tate hong pichin chiang ua tua na thilhoihlou hihte tengteng hon hihthei ding uh na chihna adiamleh?

Nidang in skul khat a ka sepna ah aneulamte lak ah hiaibang thiltung om mawk a, lamdang ka sa thei mahmah mai uhi. Exam-na ah naupang khat in laithem pawgu in engu hi. Matkhiat in om a huaitak in heutute’n, “Bang ding a hiai laithem na puak hiam?,” chi in dong uhi. Sia-le-pha leng thei kichian nailou huai naupang dawnna tuh hiai ahi: “Ka nu’n ah na theih louh om chiang in hiai na en zel ding hon chi ahi.” Tate thuhilh dingdan diktak mah ahi diam?

 

IV. Nekzonna leh sepna mun a diktat ding ahi: Nezonna mun leh sepna mun kibang vek lou hi. Hinapi in eimah hihna chiat ah i diktatna dinmun etkhiat in om thei tek hi. Alek-aval a thilpiak; kaisanna ding deihna ziak a heutute golhguk; sepna leh dinmun toh kituak a loh nei hinazenpi khamzou lou dingdan a khosa; a sep ding hinazenpi koihdap masa in mite piakbeh ding ngakbawl; tagah-meithaite neksik teng neksak; kimtak a piakkhiat theih hinazenpi eukhe chitchiatse; alek-aval a kiliansaktak a om pheuphau; chih leh adangdang tampi chiin louh hoih hi. Laizial man ding leh singpi man ding amanzah sang a tamzaw latu hih sawm kei ni.

Na nekzonna hiam ahihkeileh na sepna mun apan khatvei na khawl ngeingei ding a, huai hun chiang in mite’n bangchibang a hon gen a hon theih det ding uh na ut a?

V. Bible ah kiphutkipni: “A paina ding lampi ah naupang chiil in, huchi in a hong pichin chiang in huai apan a pialmang kei ding” (Pau. 22:6). “Huan utna in nou a pai a, gilou a hong pichin in sihna a suaksak zel hi” (Jakob 1:15). “Ka diktatna ka lenchinten a, ka khah kei ding hi…” (Job. 27:6). “Diktatna lunggulh a gilkial a dangtakte a hampha uh; tai ding ahi ngal ua” (Matt. 5:6). “Ka diktatna ka silh a, huan a hon tuam hi: ka dikna puannak thupi bang leh suangmantam bang ahi” (Job. 29:4). “Ka hinna a hon bawlhoihsak zel a, Amah min ziak in diktatna lampi ah hon pi zel hi” (Sam 23:3). “Kikhopna thupitak ah diktatna thu hoih ka tangkoupih…” (Sam 40:9). “Diktatna in nam pahtawi a; khelhna in bel nam khatpeuh daisak hi” (Pau. 14:34). “Dikna tellou a hauhna tampi neih sang a, diktatna toh tawmchik neih mah hoihzaw hi (Pau. 16:8).

 

Thukhitna:

Ni khat thu a Rome khopi thupitak kibawlkhia ahi kei chih bangdeuh in diktatna ngei leng ni khat hiam ahihkeileh khatveithu a thupitak a hong omkhe guih mawk ding ahi zenzen kei. Houchik, neuchik leh zuau siangthou chi a kigente a diktatzohna in alianzaw a kigen diktatnate ah hon kipsak thei pan hi. Laisiangthou in, “Tawmchik toh kisai a muanhuai mi mah, tampi toh kisai in a muanhuai a; tawmchik toh kisai a diktatlou mi mah, tampi toh kisai in a diktat kei hi” (Luka 16:10) chi in na gen hi.

Eimite lak ah Pu V. Dongzathang, IRS (Retd.) leh Pu H. Chinkhenthang, IAS (Rtd.) ngaihsanghuai diak ua, enhuai petmah uhi. Aziak bel, amaute min genkhak ahih peuhmah chiang in mite lungsim ah diktatna, chihtak leh kuhkalna chihte dawk pah a, diktatna lam toh kisai liauliau ah mi etton thamching a chiamteh ahi hilhial tel mawk uhi.

 

©Valte Ginkhenpau, 2016

Search