PUPA NGEINA DAN LEH A KIZATNATE

Star InactiveStar InactiveStar InactiveStar InactiveStar Inactive
 

 

PAITE PUPA NGEINA DAN LEH KIZATNATE

 

KITENNA:

 

MOU KIHEL DAN : 

Tangval piching khat in numei piching khat ZI ding a a deih chiang in, nu leh pate'n Inndongta sam in Nungak nu leh pa Inn ah Zu/Singpi va pua in Mou hel uhi. Ana man uhleh Zu/Singpi ana dawn sak ua, ana man kei uh leh Zu/Singpi ana dawn sak kei uh. Huan kilemna singpi ana dawnsak nung ua, banghiam kituahlouhna aneih uhleh, numei lamte'n Inndongta sawl in Zu/Singpi a valeh uhi. Huan, kilemna a neih uhleh, kiten ni ding a bikhiak uhi. 

 

ZAWLTHU KAL-A SIAL THAWL: 

Tangval leh nungak kiteng dia kilemna om khit nung in, tangval dang hiam nungak dang hiam in a suksiat a,kitenna ding a kikhel aleh, 'Zawlthu Kal A Sial Thawl' hiam 'Sialkhau Sattat' a kichi a, Sialding khat, Sasat leh Zubel/Singpi a liautheina ahi. 

 

 

KITENNA:

Tangval leh nungak kitenni ding a bikhiak tana bangmah buaina a om keileh, Inndongta leh mipi theipih a kitenna bawl ahi a, huai ni akipan 'Nupa' ahi uhi. (Tulai in saptuam kitenna dan kizui hi).

 

MOU LIAH/LAWM: 

Nungak in pasal a neih (kiten) chiang a a kiang a aliahtu numei dang khat ahi a, 'Mou liah' hiam 'Mou Lawm' akichi; Mou liah man chih bikhiak sum in hiam van in hiam a omkei a, Mou neipa'n a kilemna bang ua a piak theih ahi. 

 

LAWICHAL: 

Mou nu pianna nu leh pa Inn apan a Mouthakna Inn zuan a apai chiang in, Inndongtate laka Upa khat in makaih in a va kha zel hi. Huai tuh 'Lawichal' a kichi, Mou neipa'n a kihoulem bangbang un sum hiam a pe zel.

 

TUKLI LEH THAMAN: 

Thaman kichi Mou nei theihna leh Mou sita leh sivui theihna chihna ahi. Tukli leh Thaman akichi. Nidanglai in Voktal tukli man Rs.4/- (teng li) ahi a, Thaman Rs.2/- (teng nih) ahi. Tuma in Vok tukli man Rs.40/- (teng sawmli) ahi a, Thaman Rs.20/- ( teng sawm nih) aki la a, tuni chiang in, Tukli Vokman Rs.400/- ( Teng za li) akipom a, Thaman Rs.200 /- (Teng za nih) pom ahita.

 

MOU MAN: 

Nidanglai in i pu i pate'n gouneih mantam pen Sial in man leh mual ana gen ua, a tangpi in Mou Man Sial 2 (nih) ahi a, Sial nuta leng akichi. Amau hun leh tuhun kidangta ahihman in Sial omlouhna ah Sialpi khat man di'n Rs. 2000/- leh Sial nou khat man di'n Rs. 1000/- pom ahi. 

 

MOU MAN PIAK DAN: 

Nidanglai in mi'n Mou aneih chiang un hiai a nuai a kigen bang in man ana kipia uhi: 

 

i) Voktal Tukli:  Tangval khat in nungak khat zi ding in tonpih taleh, Inndongtate'n numei sungkuan te kianga maivilna in Voktal tukli gou in Ankuang lui uh. Voktal tukli hiam Sum Rs.4/- a kipia, Tuchiang in Rs.400/- pom ahita. 'Tukli' kichi nungak tangval kigute laka zat (fine) ahi a, kihel thoh a maisa tawngsate tung a lak teitei a kulkei. 

 

ii) Thaman:   Thaman kichi Mou neihtheina leh sivui theihna ahi. Nidanglai in sum Rs.2/- aki pia a, tun Rs.200/- pom ahi ta. 

 

iii) Manpi:   Sial nuta ahi, nidanglai in sum in Rs.40/- leh Rs.20/- ahi. Sial omlouhna a tuchiang in Rs.2000/- leh Rs. 1000/- pom ahi. 

 

iv) Ukan Man:   Nungak nauzaw in a U hiam a U -te sang a pasal a neih masak zawk chiang in U Kan Man kichi mouneipa a kipan van hiam sum hiam a ngen thei a, van ahihleh Puandum, a sum in ahihleh kihoulemna bangbang un a pia hi. 

 

v) Pu Sum:   Mou pu'n a tunu in pasal nei a khakchiang in, Mouneipa lak apan Pu Sum kichi van hiam sum hiam in ala hi. 

 

vi) Mou Tutphah:   Mou Man kipiak chiang in Mou nu leh pa'n mou man kipia sum pen amau hoihsak zahzah Mou neipa lak/kiang ah a pekik ua, huai sum piak kik pen 'Mou Tutphah' a kichi hi.

 

vii) Min Man:   Nungak khat in pasal a neihchiang in Nungak min phuaktu in mou neipa akipan van hiam sum hiam a la a, tua pen 'Min Man' a kichi a, Van ahihleh puandum hiam ahi a, sum ahihleh kihoulemna bang ahi.

 

 

MOU MAN PIAKLOUH THEIHNA LEH PIAK TEITEINA DAN: 

i) Mouman Piaklouhna:   Mou nu leh pa'n Mou neipa a kipan in "Mou man sum in hiam van in hiam ka la kei ding uh a chih" a a lak keileh, Mou neipa'n mou man piak teitei a kulkei ding. Ahihhang in sivui theihna 'Thaman' bel piak teitei ahi. 

 

ii) Mou man piak teitei kulna:   Mou nu leh pa'n mou man a lak khit vek ma ua, a tanu a sih leh mou man a lak khit vek ma ua, a tanu a sih leh mou neipa'n mou man a piak khitloute a piak khit ding ahi. Mou nu leh pa'n a ngaihdam kei ua leh. 

 

SIALKHUMSA: 

Mou man ding a Sial nuta mahmah a kikhum chiang in, Mou nu leh pa'n Sialkhumsa Vok hiam Bawng hiam a goh ding ahi. 

 

SIALKHUM SA GOHLOUH THEIHNA: 

Mou Man Sial in a kigen hi. Nidanglai in pupa-te'n Sial mahmah in Mou man akipia ua, Inntek in Vok/Bawng na goh zel hi. Huai pen Sialkhumsa akichi hi. Mou man ding a Sial a kikhum kei leh, Sialkhumsa goh a kul kei. Hiai Sialkhumsa tang in chih a om tuan kei. 

 

TANU SAGOH: 

Mou nu leh pa'n a tanu uh deihsakna in chiklai peuh in Vok hiam Bawng hiam a gohthei ua, huai sagoh tuh 'Tanu Sagoh' a kichi hi. 

 

MOU VANKEN: 

Mou nu leh pate'n a tanu uh pasal a neih chiang in van a deihna bang un a pe thei uhi. Himahleh a tanu uh a khakni un, hiai a nuai a kigen vante a piak ding uh ahi:

i) Puanpi/Kantha/Rizai;

ii) Seng leh Nam;

iii) Tutang leh Heitang;

iv) Lel/Singkuang/Singlem;

v) Sathau leh abing/a thawl;

vi) Zuthawl/Singpi (Mou Zupuak); leh

vii) Saseng sin/Puandum (Mou neipa tanu pi tan ding) 

viii) Moutam: Mounu'n a pasal innkuante leh tanaute laka deihsak thilpiak dia apuan kente 'Moutam' a kichi. 

Hiai a tunga teng pupa ngeina dan a mou van kente ahi uh hi. Huaite chihlou mou nu leh pa'n a tanu a deihsak ua Van-got dang a kensak ua leh Mou van ken a sim thei hilou in, gift (thilpiak) bang a ngaih ahi dia, a khakni hilou nidang a piakkhiak ding ahi. Huai teng mah thusia lasia a omleh genbei ahi ding. 

 

SA SENGSIN: 

Mou nu leh pa'n a tanu uh Mou Van ken a got chiang un, sengkhuhna puandum tuh Sa sengsin a kichi hi. Hiai Saseng sin Puandum tuh mouneipa Tanupi tan ding ahi. 

 

U KAN MAN:

Numei in koppih (pasal) a neih hun in, a U nungak lai pasal neihsan taleh, huai tuh UKan a kichi. Mou sanggam numei in UKan man in puandum khat hiam a kikim pih sum hiam a la zel hi. 

 

ANGPUAN: 

Unau numei laka a nautum pen in pasal a neih chiang in, a pasal in a zi nu (mother) Puandum a pe ding a, huai puandum bel 'Angpuan' a kichi hi. 

 

MOU IN A PASAL DAN KOPPIH:

Mou leh a pasal kikal a, tawndan, chindan a kibanglou om taleh, Mou in a pasal neih ni a kipan in a nu leh pa dante a nuse ding hi. Mou man piak khit leh piak khit lou thu bang mah gen a om kei ding. 

 

ZAWLTAI: 

Pasal khat leh numei khat a innkuante theihpih louh leh lemsakpihna tellou in, nupa bang in na omkhawm in, a inn pan taikhe taleh 'Zawltai' a kichi hi. Sialding khat sang a tamzo lou a gaptheih ahi.  

 

 

PAITE PUPA NGEINA DAN LEH A KIZATNATE (2-vei puahphatna, 2013) Paite Tribe Council General Headquarter te laibu suah khiak a pat laksawn ahi. Thumal leh laimal khat lel leng suklamdang ahi kei.. ahi bangbang a laksawn ahi.. 

By. Barakhaih  Langel  Paite

Search